ന്യൂഡൽഹി / 2026/ സെപ്റ്റംബർ 06
ഡൽഹിയിലെ ശ്രീറാം കോളേജ് ഓഫ് കൊമേഴ്സിന്റെ (എസ്ആർസിസി) ശതാബ്ദി ആഘോഷങ്ങളിൽ പ്രധാനമന്ത്രി നരേന്ദ്ര മോദി പങ്കെടുത്തു. കോളേജിന്റെ നൂറുവർഷത്തെ നേട്ടങ്ങളെ അഭിനന്ദിച്ച പ്രധാനമന്ത്രി, ആഗോള അനിശ്ചിതത്വത്തിനിടയിലും ഇന്ത്യ 7.8 ശതമാനം വളർച്ച കൈവരിച്ചത് രാജ്യത്തിന്റെ സാമ്പത്തിക ശക്തിയുടെ തെളിവാണെന്ന് പറഞ്ഞു. 140 കോടി ഇന്ത്യക്കാരുടെ കൂട്ടായ പരിശ്രമത്തിലൂടെ വികസിതവും സ്വയംപര്യാപ്തവുമായ ഇന്ത്യ സൃഷ്ടിക്കുകയാണ് ലക്ഷ്യമെന്നും അദ്ദേഹം വ്യക്തമാക്കി.
നൂറുവർഷത്തെ എസ്ആർസിസി യാത്ര
ദര്യാഗഞ്ചിലെ ചെറിയ സ്ഥാപനത്തിൽനിന്ന് രാജ്യത്തെ പ്രമുഖ വിദ്യാഭ്യാസ സ്ഥാപനങ്ങളിലൊന്നായി എസ്ആർസിസി വളർന്നുവെന്ന് പ്രധാനമന്ത്രി പറഞ്ഞു. സ്ഥാപനത്തിന്റെ സ്ഥാപകനായ ശ്രീറാമിന് ആദരമർപ്പിച്ച മോദി, നൂറുവർഷം പൂർത്തിയാക്കുന്ന ഒരു സ്ഥാപനം നേട്ടങ്ങളുടെയും പ്രചോദനങ്ങളുടെയും വലിയ ശേഖരമായി മാറുന്നുവെന്ന് അഭിപ്രായപ്പെട്ടു. അന്തരിച്ച അരുൺ ജെയ്റ്റ്ലി, സഞ്ജീവ് സന്യാൽ എന്നിവരുൾപ്പെടെയുള്ള പൂർവവിദ്യാർത്ഥികളുടെ സംഭാവനകളും അദ്ദേഹം പരാമർശിച്ചു.
7.8 ശതമാനം വളർച്ച സാമ്പത്തിക ശക്തിയുടെ തെളിവെന്ന് മോദി
പശ്ചിമേഷ്യയിലെ യുദ്ധവും ആഗോള വ്യാപാരത്തിലെ തടസ്സങ്ങളും നിലനിൽക്കുമ്പോഴും ഇന്ത്യ 7.8 ശതമാനം ത്രൈമാസ വളർച്ച കൈവരിച്ചതായി പ്രധാനമന്ത്രി പറഞ്ഞു. ഏപ്രിൽ മുതൽ ജൂൺ വരെയുള്ള കാലയളവിൽ വൈദ്യുതി ഉൽപ്പാദനം ഒമ്പത് ശതമാനം വർധിച്ചു. വാഹന വിൽപ്പന 20 ശതമാനത്തിലധികവും സ്റ്റീൽ, സിമന്റ് ഉപഭോഗം എട്ട് ശതമാനവും ഉയർന്നതായി അദ്ദേഹം ചൂണ്ടിക്കാട്ടി. നിർമ്മാണം, ഭവനനിർമ്മാണം, വാണിജ്യ പ്രവർത്തനങ്ങൾ എന്നിവ വേഗത്തിൽ വികസിക്കുന്നതിന്റെ സൂചനയാണിതെന്നും മോദി പറഞ്ഞു.
ജൻധൻ മുതൽ മേക്ക് ഇൻ ഇന്ത്യ വരെ
2013ൽ മുന്നോട്ടുവച്ച ജനകേന്ദ്രീകൃത സദ്ഭരണ ആശയത്തിന്റെ ഭാഗമായി നടപ്പാക്കിയ ജൻധൻ യോജനയിലൂടെ ഇന്ന് ഏകദേശം 60 കോടി പേർ ബാങ്കിങ് സംവിധാനവുമായി ബന്ധിപ്പിക്കപ്പെട്ടതായി പ്രധാനമന്ത്രി പറഞ്ഞു. ഇത് ഇന്ത്യയുടെ ഫിൻടെക് വിപ്ലവത്തിന് അടിത്തറയിട്ടെന്നും അദ്ദേഹം അഭിപ്രായപ്പെട്ടു.
മേക്ക് ഇൻ ഇന്ത്യ പദ്ധതിയിലൂടെ ഇറക്കുമതിയെ വലിയ തോതിൽ ആശ്രയിച്ചിരുന്ന ഇന്ത്യ പ്രധാന കയറ്റുമതി രാജ്യമായി മാറുകയാണെന്നും മോദി പറഞ്ഞു. സ്മാർട്ട്ഫോൺ കയറ്റുമതി 2.5 ലക്ഷം കോടി രൂപ കടന്നതായും ആഭ്യന്തര പ്രതിരോധ ഉൽപ്പാദനം ഏകദേശം രണ്ട് ലക്ഷം കോടി രൂപയിലെത്തിയതായും അദ്ദേഹം വ്യക്തമാക്കി. 2013-14ൽ 600 മുതൽ 700 കോടി രൂപ വരെയായിരുന്ന പ്രതിരോധ കയറ്റുമതി ഇപ്പോൾ 40,000 കോടി രൂപയായി ഉയർന്നതായും പ്രധാനമന്ത്രി പറഞ്ഞു.
വികസന പ്രവർത്തനങ്ങൾക്ക് പുതിയ വേഗം
മുമ്പ് പതിറ്റാണ്ടുകൾ എടുത്തിരുന്ന പല വികസന പ്രവർത്തനങ്ങളും ഇപ്പോൾ ഏതാനും വർഷങ്ങൾക്കുള്ളിൽ പൂർത്തിയാകുകയാണെന്ന് പ്രധാനമന്ത്രി പറഞ്ഞു. 1925ൽ ഇന്ത്യയിൽ ആദ്യ വൈദ്യുത ട്രെയിൻ ഓടിയെങ്കിലും 2014 വരെ 30 ശതമാനത്തിൽ താഴെ റെയിൽപാതകൾ മാത്രമാണ് വൈദ്യുതീകരിച്ചിരുന്നത്. കഴിഞ്ഞ 12 വർഷത്തിനിടെ റെയിൽപാതകളുടെ വൈദ്യുതീകരണം ഏകദേശം 100 ശതമാനത്തിലെത്തിച്ചതായി അദ്ദേഹം വ്യക്തമാക്കി.
ലെതർ, ടെക്സ്റ്റൈൽ, സംസ്കരിച്ച ഭക്ഷ്യവസ്തുക്കൾ തുടങ്ങിയ മേഖലകൾക്ക് അവസരങ്ങൾ തുറന്നുകൊണ്ട് 40 രാജ്യങ്ങളുമായി സ്വതന്ത്ര വ്യാപാര കരാറുകൾ ഒപ്പിട്ടതായും മോദി പറഞ്ഞു. ഇത് രാജ്യത്തെ യുവാക്കൾക്ക് പുതിയ അവസരങ്ങൾ സൃഷ്ടിക്കുമെന്നും അദ്ദേഹം അഭിപ്രായപ്പെട്ടു.
യുവാക്കൾ വലിയ സ്വപ്നങ്ങൾ കാണണമെന്ന് ആഹ്വാനം
കൃഷി കയറ്റുമതിയിൽ ഇന്ത്യയെ ആഗോള ശക്തിയാക്കുക, ഇന്ത്യൻ ബഹിരാകാശ നിലയം സ്ഥാപിക്കുക, ഭാവിയിൽ ഒളിമ്പിക് ഗെയിംസിന് ആതിഥേയത്വം വഹിക്കുക തുടങ്ങിയ ലക്ഷ്യങ്ങളും പ്രധാനമന്ത്രി മുന്നോട്ടുവച്ചു. ഇവ വെറും പ്രഖ്യാപനങ്ങളല്ലെന്നും രാജ്യത്തിന്റെ ഉറച്ച തീരുമാനങ്ങളാണെന്നും അദ്ദേഹം പറഞ്ഞു.
യൂണികോൺ കമ്പനികൾ, ഡ്രോൺ സാങ്കേതികവിദ്യ, നിർമിതബുദ്ധി തുടങ്ങിയ മേഖലകളിൽ മുന്നേറുന്ന യുവാക്കൾ കൂടുതൽ വലിയ ലക്ഷ്യങ്ങൾ നിശ്ചയിക്കണമെന്നും മോദി ആവശ്യപ്പെട്ടു. ലോകത്തെ പ്രമുഖ കമ്പനികളെ ഇന്ത്യക്കാർ നയിക്കുന്നുണ്ടെങ്കിൽ ഇന്ത്യക്കാർ സ്ഥാപിക്കുന്ന കമ്പനികൾക്കും ലോകത്തെ നയിക്കാൻ കഴിയുമെന്ന് അദ്ദേഹം പറഞ്ഞു. സ്വയംപര്യാപ്തതയിലേക്കുള്ള പുതിയ പാതയിൽ ഇന്ത്യയുടെ ധൈര്യവും സ്വപ്നങ്ങളും വിജയവും പ്രതിഫലിക്കണമെന്നും പ്രധാനമന്ത്രി ആഹ്വാനം ചെയ്തു.
