ന്യൂഡൽഹിയിൽ നടന്ന ലഹരിമരുന്ന് ഏകോപന കേന്ദ്രത്തിന്റെ പത്താമത് ഉന്നതതല യോഗത്തിൽ 2026 മുതൽ 2029 വരെയുള്ള ലഹരിമരുന്ന് നിയന്ത്രണ പ്രവർത്തനരേഖ പുറത്തിറക്കി. ലഹരിമരുന്ന് നിയന്ത്രണ വാർഷിക റിപ്പോർട്ടും പുറത്തിറക്കി. ജമ്മുവിലും ഗുവാഹത്തിയിലും പുതിയ മേഖലാ ഓഫീസുകൾ പ്രവർത്തനസജ്ജമാക്കി. രണ്ടുലക്ഷത്തി ഒൻപതിനായിരത്തി അഞ്ഞൂറ് കിലോഗ്രാം ലഹരിമരുന്ന് നശിപ്പിക്കാൻ പ്രത്യേക രണ്ടാഴ്ചത്തെ പ്രചാരണത്തിനും തുടക്കമായി. ആറായിരം കോടി രൂപ വിലമതിക്കുന്ന ലഹരിവസ്തുക്കൾ നശിപ്പിക്കുകയാണ് ലക്ഷ്യം.

യോഗത്തിൽ ആഭ്യന്തരമന്ത്രി അമിത് ഷാ ലഹരിമരുന്നിനെതിരായ പോരാട്ടം അടുത്ത മൂന്ന് വർഷം നിർണായകമാണെന്ന് പറഞ്ഞു. കണ്ടെത്തുക, തടസ്സപ്പെടുത്തുക, തകർക്കുക എന്ന നയത്തിലൂടെ മുഴുവൻ ലഹരിശൃംഖലയും ഇല്ലാതാക്കണമെന്ന് അദ്ദേഹം ആവശ്യപ്പെട്ടു. ലഹരിക്കടത്തുകാരോട് കർശന നിലപാടും ലഹരിക്ക് അടിമകളായ യുവാക്കളോട് സഹാനുഭൂതിയും വേണമെന്നും വ്യക്തമാക്കി. മനുഷ്യവിവരശേഖരണം, സാങ്കേതിക വിവരശേഖരണം, സമൂഹ അധിഷ്ഠിത പൊലീസ് സംവിധാനം എന്നിവ ശക്തിപ്പെടുത്തണമെന്നും നിർദേശിച്ചു. പ്രധാന കേസുകളിൽ സാമ്പത്തിക അന്വേഷണത്തിനും കുറ്റകൃത്യത്തിലൂടെ സമ്പാദിച്ച സ്വത്ത് മരവിപ്പിക്കാനും പിടിച്ചെടുക്കാനും മുൻഗണന നൽകണമെന്നും സംസ്ഥാനങ്ങളോട് ആവശ്യപ്പെട്ടു.

അതിർത്തികൾ, തുറമുഖങ്ങൾ, വിമാനത്താവളങ്ങൾ, ഗ്രാമങ്ങൾ എന്നിവിടങ്ങളിൽ നിരീക്ഷണം ശക്തമാക്കി ഓരോ ലഹരിശൃംഖലയും കണ്ടെത്തുകയാണ് പ്രവർത്തനരേഖയുടെ ലക്ഷ്യം. ലഹരിമരുന്ന് ആവശ്യകത കുറയ്ക്കാൻ ലഹരിമുക്ത മേഖലകൾ രൂപീകരിക്കുകയും മാതാപിതാക്കൾ, അധ്യാപകർ, വിദ്യാഭ്യാസ സ്ഥാപനങ്ങൾ, യുവജനസംഘടനകൾ എന്നിവരുടെ പങ്കാളിത്തത്തോടെ ബോധവത്കരണ പരിപാടികൾ നടത്തുകയും ചെയ്യും. സംസ്ഥാനങ്ങളിലെ ലഹരിവിരുദ്ധ സേനകളെ മുഴുവൻ സമയവും സജ്ജവുമായ പ്രത്യേക വിഭാഗങ്ങളാക്കി മാറ്റണമെന്നും വിദേശത്ത് ഒളിവിലുള്ള ലഹരിക്കടത്തുകാരെ നാട്ടിലെത്തിക്കാൻ നടപടികൾ വേഗത്തിലാക്കണമെന്നും യോഗത്തിൽ നിർദേശിച്ചു. വലിയ കേസുകളിൽ വേഗത്തിൽ വിചാരണ പൂർത്തിയാക്കാൻ പ്രത്യേക കോടതികൾ സ്ഥാപിക്കുന്നതിനുള്ള നടപടികളും മുന്നോട്ടുകൊണ്ടുപോകുമെന്ന് അറിയിച്ചു.