പുൽപ്പള്ളി, 2026 ജൂൺ 24 –

നെക്കുപ്പ വനാതിർത്തിയിലെ വേലിയമ്പം, കണ്ടാമല, മരകാവ്, ഭൂദാനം, മൂഴിമല പ്രദേശങ്ങളിൽ കാട്ടാനശല്യം രൂക്ഷമായിട്ടും വനംവകുപ്പ് ഫലപ്രദമായ നടപടികൾ സ്വീകരിക്കുന്നില്ലെന്ന് നാട്ടുകാരും കർഷകരും ആരോപിക്കുന്നു. കഴിഞ്ഞ രണ്ടാഴ്ചയായി കാട്ടാനകൾ കൃഷിയിടങ്ങളിൽ വ്യാപക നാശനഷ്ടമാണ് ഉണ്ടാക്കുന്നത്. സന്ധ്യയോടെ കൃഷിയിടങ്ങളിലെത്തുന്ന ആനകൾ പുലർച്ചെ വരെ പ്രദേശത്ത് തുടരുന്നത് ജനങ്ങളിൽ ഭീതി വർധിപ്പിക്കുകയാണ്.

വനാതിർത്തിയോട് ചേർന്ന ഫെൻസിംഗും ട്രഞ്ചുകളും തകർന്നുകിടക്കുന്നതാണ് കാട്ടാനകൾ കൃഷിയിടങ്ങളിലേക്ക് ഇറങ്ങാൻ പ്രധാന കാരണമെന്ന് നാട്ടുകാർ പറയുന്നു. ആനശല്യം പരിഹരിക്കണമെന്ന് ആവശ്യപ്പെട്ട് നിരവധി തവണ വനംവകുപ്പിനെ സമീപിച്ചിട്ടും നടപടിയുണ്ടായില്ലെന്നാണ് പരാതി. മുമ്പ് ആനശല്യം വർധിക്കുമ്പോൾ വാച്ചർമാരെ നിയോഗിച്ച് ആനകളെ വനത്തിലേക്ക് തുരത്തിയിരുന്നെങ്കിലും ഇപ്പോൾ അത്തരം സംവിധാനങ്ങൾ ഇല്ലെന്നും കർഷകർ ചൂണ്ടിക്കാട്ടുന്നു.

കഴിഞ്ഞ ഒരു മാസത്തിനിടെ ലക്ഷക്കണക്കിന് രൂപയുടെ കാർഷികവിളകളാണ് കാട്ടാനകൾ നശിപ്പിച്ചതെന്നും ഇതിന് അർഹമായ നഷ്ടപരിഹാരം പോലും ലഭിച്ചിട്ടില്ലെന്നും നാട്ടുകാർ ആരോപിച്ചു. തകർന്ന ട്രഞ്ചുകളും ഫെൻസിംഗും അടിയന്തരമായി നവീകരിക്കണമെന്നും വനാതിർത്തിയിൽ വാച്ചർമാരെ നിയമിക്കണമെന്നും അവർ ആവശ്യപ്പെട്ടു. പ്രശ്നത്തിന് ഉടൻ പരിഹാരം കണ്ടില്ലെങ്കിൽ ശക്തമായ സമരപരിപാടികൾ ആരംഭിക്കുമെന്നും കർഷകർ മുന്നറിയിപ്പ് നൽകി.