തിരുവനന്തപുരം, 2026 ജൂൺ 24 –

മുഖ്യമന്ത്രിക്കെതിരായ പരാമർശങ്ങളുടെ പശ്ചാത്തലത്തിൽ എൻഎസ്എസ് ജനറൽ സെക്രട്ടറി ജി. സുകുമാരൻ നായരെ വിമർശിച്ച് മുൻ മന്ത്രി കെ.ബി. ഗണേഷ് കുമാർ രംഗത്തെത്തി. മുഖ്യമന്ത്രി പദവിയെ അപമാനിക്കുന്ന തരത്തിലുള്ള വാക്കുകൾ അംഗീകരിക്കാനാകില്ലെന്ന് അദ്ദേഹം പറഞ്ഞു. ഏത് പാർട്ടിക്കാരനായാലും മുഖ്യമന്ത്രിക്ക് നൽകേണ്ട മര്യാദ നൽകണമെന്നും അഭിപ്രായപ്പെട്ടു.

മുഖ്യമന്ത്രിയെ “അവൻ”, “ഇവൻ” എന്നൊക്കെ വിളിക്കുന്നത് ശരിയല്ലെന്നും, മുഖ്യമന്ത്രി വന്ന് തന്റെ കാലുപിടിക്കണമെന്ന് പറയുന്നതും ശരിയായ കാര്യമല്ലെന്നും ഗണേഷ് കുമാർ വ്യക്തമാക്കി. ഇത്തരം പ്രയോഗങ്ങൾ അന്തസില്ലായ്മയും തറവാട്ടിത്തമില്ലായ്മയുമാണ് വ്യക്തമാക്കുന്നതെന്നും പറഞ്ഞു. തന്റെ അഡ്രസ് കളയുമെന്ന സുകുമാരൻ നായരുടെ പ്രസ്താവനയോടും പ്രതികരിച്ചു.

ആർ. ബാലകൃഷ്ണപിള്ളയുടെ മകനാണ് തന്റെ അഡ്രസ് എന്നും, 19-ാം വയസിൽ അഭിനയരംഗത്ത് എത്തി ലോകമറിയുന്ന കലാകാരനായി മാറിയെന്നും ഗണേഷ് കുമാർ പറഞ്ഞു. കഴിഞ്ഞ 25 വർഷമായി പൊതുരംഗത്ത് സജീവമായ പൊതുപ്രവർത്തകനാണെന്നും കൂട്ടിച്ചേർത്തു. ജനങ്ങളുടെ ഔദാര്യം മാത്രമാണ് തനിക്കുള്ളതെന്നും, മറ്റാരുടെയും ഔദാര്യത്തിലൂടെയോ വളഞ്ഞ വഴികളിലൂടെയോ നേടിയതല്ലെന്നും വ്യക്തമാക്കി. അതുകൊണ്ട് തന്റെ അഡ്രസ് ഇല്ലാതാക്കാൻ ആർക്കും സാധിക്കില്ലെന്നും അദ്ദേഹം പറഞ്ഞു.