ന്യൂഡൽഹി, 2026 ജൂൺ 21

അന്താരാഷ്ട്ര യോഗ ദിനത്തിന്റെ പന്ത്രണ്ടാം വാർഷികാഘോഷം സാമൂഹ്യനീതി-ശാക്തീകരണ മന്ത്രാലയത്തിന്റെ നേതൃത്വത്തിൽ ന്യൂഡൽഹിയിലെ ഡോ. അംബേദ്കർ അന്താരാഷ്ട്ര കേന്ദ്രത്തിൽ സംഘടിപ്പിച്ചു. കേന്ദ്ര സാമൂഹ്യനീതി-ശാക്തീകരണ മന്ത്രി ഡോ. വീരേന്ദ്ര കുമാർ പരിപാടിക്ക് നേതൃത്വം നൽകി. ആരോഗ്യകരമായ വാർധക്യത്തിനായുള്ള യോഗം എന്ന ദേശീയ പ്രമേയത്തോടെയായിരുന്നു ഇത്തവണത്തെ ആഘോഷം.

പ്രധാനമന്ത്രിയുടെ സമഗ്ര ആരോഗ്യ-ക്ഷേമ ദർശനം നടപ്പാക്കുന്നതിന്റെ ഭാഗമായാണ് പരിപാടി സംഘടിപ്പിച്ചത്. മതം, ജാതി, വിശ്വാസം എന്നിവയുടെ അതിരുകൾക്കപ്പുറം ലോകമെമ്പാടുമുള്ള ജനങ്ങളെ യോഗ ഒരുമിപ്പിക്കുന്നുവെന്ന് മന്ത്രി ഡോ. വീരേന്ദ്ര കുമാർ പറഞ്ഞു. ശാരീരിക ഉന്മേഷവും മാനസിക വ്യക്തതയും വർധിപ്പിക്കൽ, സമ്മർദ്ദവും ഉത്കണ്ഠയും നേരിടാൻ മനഃസാന്നിധ്യം പ്രോത്സാഹിപ്പിക്കൽ, സമൂഹത്തിലെ വിവിധ വിഭാഗങ്ങളെ ഒരുമിപ്പിക്കൽ എന്നിവയ്ക്കാണ് പരിപാടിയിൽ പ്രധാന ശ്രദ്ധ നൽകിയത്. പരിപാടിക്കിടെ ലഹരിവിമുക്ത ഭാരത അഭിയാനും മുതിർന്ന പൗരന്മാരുടെ സംരക്ഷണവുമായി ബന്ധപ്പെട്ട പ്രതിജ്ഞയും മന്ത്രി ചൊല്ലിക്കൊടുത്തു.

ആരോഗ്യകരവും ഉൾക്കൊള്ളുന്നതുമായ സമൂഹം രൂപപ്പെടുത്താനുള്ള മന്ത്രാലയത്തിന്റെ പ്രതിബദ്ധതയാണ് ഈ ആഘോഷത്തിലൂടെ വീണ്ടും വ്യക്തമാക്കിയത്. സാംസ്കാരിക പാരമ്പര്യവും ആരോഗ്യസംരക്ഷണവും തമ്മിലുള്ള ബന്ധം കൂടുതൽ ശക്തിപ്പെടുത്തുകയെന്ന ലക്ഷ്യവും പരിപാടിക്കുണ്ടായിരുന്നു. സാമൂഹ്യനീതി-ശാക്തീകരണ മന്ത്രാലയത്തിലെയും ഭിന്നശേഷിക്കാരുടെ ശാക്തീകരണ വകുപ്പിലെയും മുതിർന്ന ഉദ്യോഗസ്ഥർ ചടങ്ങിൽ പങ്കെടുത്തു.

15