ഒഡീഷയിൽ നിന്ന് ഓസ്ട്രിയയിലേക്ക് ആദ്യമായി ഉണങ്ങിയ  മുട്ടപ്പൊടി കയറ്റുമതി

ബലാംഗിർ, 2026 ജൂൺ 20

ഒഡീഷയിലെ ബലാംഗിറിൽ നിന്ന് ഓസ്ട്രിയയിലേക്ക് ഉണങ്ങിയ മുഴുവൻ മുട്ടപ്പൊടിയുടെ ആദ്യ വാണിജ്യ കയറ്റുമതി നടന്നു. കേന്ദ്ര വാണിജ്യ-വ്യവസായ മന്ത്രാലയത്തിന് കീഴിലുള്ള കാർഷിക-സംസ്‌കരിച്ച ഭക്ഷ്യ ഉൽപ്പന്ന കയറ്റുമതി വികസന അതോറിറ്റിയുടെ സഹായത്തോടെയാണ് കയറ്റുമതി നടന്നത്. 22.6 മെട്രിക് ടൺ മുട്ടപ്പൊടിയാണ് ഓസ്ട്രിയയിലേക്ക് അയച്ചത്. ഇത് മൂല്യവർധിത കാർഷിക-ഭക്ഷ്യ ഉൽപ്പന്ന കയറ്റുമതിയിൽ ഒരു പ്രധാന നേട്ടമായാണ് വിലയിരുത്തപ്പെടുന്നത്.

ബലാംഗിറിലെ ഒരു കയറ്റുമതിക്കമ്പനിയാണ് ചരക്ക് അയച്ചത്. പ്രാദേശിക മുട്ട ഉൽപ്പാദന ശൃംഖല ശക്തിപ്പെടുത്താനും കയറ്റുമതി വർധിപ്പിക്കാനുമായി കമ്പനി 2025-ൽ ആധുനിക മുട്ട സംസ്‌കരണ കേന്ദ്രം സ്ഥാപിച്ചിരുന്നു. ദേശീയ-അന്തർദേശീയ ഭക്ഷ്യസുരക്ഷാ മാനദണ്ഡങ്ങൾ പാലിച്ചാണ് ഇവിടെ ഉൽപ്പാദനം നടക്കുന്നത്. ദീർഘകാല സംഭരണശേഷിയും എളുപ്പത്തിലുള്ള ഗതാഗത സൗകര്യവും ഉള്ളതിനാൽ ഈ ഉൽപ്പന്നത്തിന് ഭക്ഷ്യസംസ്‌കരണ, ബേക്കറി, മധുരപലഹാര നിർമാണ, ഔഷധ മേഖലകളിൽ വലിയ ആവശ്യകതയുണ്ട്.

യൂറോപ്യൻ രാജ്യങ്ങളിൽ മുട്ടപ്പൊടിക്ക് നല്ല വിപണിയുണ്ട്. ഈ കയറ്റുമതി ഇന്ത്യൻ സംസ്‌കരിച്ച ഭക്ഷ്യ ഉൽപ്പന്നങ്ങൾക്ക് യൂറോപ്യൻ വിപണിയിൽ വർധിച്ചുവരുന്ന ആവശ്യകത വ്യക്തമാക്കുന്നു. കയറ്റുമതിക്കാരന് അടിസ്ഥാനസൗകര്യ വികസനം, ഗുണനിലവാര നിയന്ത്രണം, പരിശോധനാ ശേഷി വർധനം എന്നിവയിൽ അതോറിറ്റി സഹായം നൽകിയിരുന്നു. ഈ നേട്ടം ഒഡീഷയിലെ കോഴിവളർത്തൽ-ഭക്ഷ്യസംസ്‌കരണ മേഖലയിലേക്ക് കൂടുതൽ നിക്ഷേപം ആകർഷിക്കുമെന്നും സംസ്ഥാനത്തിന്റെ മൂല്യവർധിത ഉൽപ്പന്ന കയറ്റുമതിക്ക് പുതിയ അവസരങ്ങൾ സൃഷ്ടിക്കുമെന്നും പ്രതീക്ഷിക്കുന്നു.