പ്രിയദര്‍ശിനി ഫ്‌ളാഗ് ഓഫ് വിവാദം; തിരൂരങ്ങാടിയില്‍ യൂത്ത് കോണ്‍ഗ്രസ് സമാന്തര പ്രതിഷേധം

മലപ്പുറം, 2026 ജൂണ്‍ 15 –

തിരൂരങ്ങാടി മണ്ഡലത്തില്‍ കെഎസ്ആര്‍ടിസി പ്രിയദര്‍ശിനി സൗജന്യ യാത്ര പദ്ധതിയുടെ ഫ്‌ളാഗ് ഓഫ് പരിപാടി നടത്തിയ രീതിക്കെതിരെ യൂത്ത് കോണ്‍ഗ്രസ് പ്രതിഷേധിച്ചു. സമാന്തര ഫ്‌ളാഗ് ഓഫ് സംഘടിപ്പിച്ചായിരുന്നു പ്രതിഷേധം. യുഡിഎഫിന്റെയും കെഎസ്ആര്‍ടിസിയുടെയും ഭാഗത്തുനിന്ന് അവഹേളനം ഉണ്ടായതായി യൂത്ത് കോണ്‍ഗ്രസ് നിയോജക മണ്ഡലം പ്രസിഡന്റ് റഫീഖ് ചോലയില്‍ ആരോപിച്ചു.

ലീഗ് എംഎല്‍എ ഫ്‌ളാഗ് ഓഫ് ചെയ്ത പരിപാടിയില്‍ മുഖ്യമന്ത്രിയുടെ ചിത്രമുള്ള ഫ്‌ളക്‌സ് പോലും സ്ഥാപിച്ചില്ലെന്നും ഇത് അവഹേളിക്കുന്ന സമീപനമായിരുന്നുവെന്നും യൂത്ത് കോണ്‍ഗ്രസ് നേതാക്കള്‍ പറഞ്ഞു. ഇത്തരം അവഹേളനങ്ങള്‍ ഉണ്ടായാല്‍ അത് തിരുത്തി മുന്നോട്ടുപോകാനാണ് സംഘടനയുടെ തീരുമാനമെന്നും വീഴ്ചകള്‍ ആവര്‍ത്തിക്കാതിരിക്കാനുള്ള മുന്‍കരുതലിന്റെ ഭാഗമായാണ് പ്രതിഷേധമെന്നും പ്രവര്‍ത്തകര്‍ വ്യക്തമാക്കി.

അതേസമയം, സ്ത്രീകള്‍ക്ക് കെഎസ്ആര്‍ടിസി ഓര്‍ഡിനറി ബസുകളില്‍ സൗജന്യ യാത്ര അനുവദിക്കുന്ന പ്രിയദര്‍ശിനി പദ്ധതിക്ക് സംസ്ഥാനത്ത് തുടക്കമായി. തിരുവനന്തപുരത്ത് മുഖ്യമന്ത്രി വി ഡി സതീശന്‍ സംസ്ഥാനതല ഉദ്ഘാടനം നിര്‍വഹിച്ചു. 3,125 ബസുകളിലാണ് സൗജന്യ യാത്രാ സൗകര്യം ലഭ്യമാകുക. ഓര്‍ഡിനറി, സിറ്റി ഓര്‍ഡിനറി, ലിമിറ്റഡ് സ്റ്റോപ്പ്/ഓര്‍ഡിനറി, ടൗണ്‍ ടു ടൗണ്‍, ഫെയര്‍സ്റ്റേജ് ലിമിറ്റഡ് സ്റ്റോപ്പ്, പോയിന്റ് ടു പോയിന്റ്/ഓര്‍ഡിനറി, ഗ്രാമവണ്ടി എന്നീ ഏഴ് വിഭാഗം ബസുകളിലാണ് സ്ത്രീകള്‍ക്കും ട്രാന്‍സ്ജെന്‍ഡര്‍മാര്‍ക്കും സൗജന്യ യാത്ര ലഭിക്കുക.