ഷിഗെല്ല ബാധിച്ച് ഏഴ് വയസുകാരന്‍ മരിച്ചു; ആശങ്ക വര്‍ധിച്ച് കോഴിക്കോട്

കോഴിക്കോട്, 2026 ജൂണ്‍ 15 –

ഷിഗെല്ല ബാധയെ തുടര്‍ന്ന് കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സയിലായിരുന്ന ഏഴ് വയസുകാരന്‍ മരിച്ചു. മലപ്പുറം പൂക്കോട്ടൂര്‍ സ്വദേശിയായ വിദ്യാര്‍ത്ഥിയാണ് മരിച്ചത്. ഈ മാസം 12നാണ് കുട്ടിയെ ആശുപത്രിയില്‍ പ്രവേശിപ്പിച്ചത്. പനിയും വയറിളക്കവും അനുഭവപ്പെട്ടതിനെ തുടര്‍ന്നാണ് ചികിത്സയ്ക്കായി ആശുപത്രിയിലെത്തിച്ചത്.

ഇതോടെ ഷിഗെല്ല ബാധയുമായി ബന്ധപ്പെട്ട മരണങ്ങളുടെ എണ്ണം വീണ്ടും ഉയര്‍ന്നു. നേരത്തെ കോഴിക്കോട് തലക്കുളത്തൂര്‍ സ്വദേശിയായ നാലര വയസുകാരി നിളയും ഷിഗെല്ല ബാധിച്ച് മരിച്ചിരുന്നു. എല്‍കെജി വിദ്യാര്‍ത്ഥിനിയായ നിള കോഴിക്കോട് മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെയായിരുന്നു മരണം. മലപ്പുറത്ത് വയറിളക്കം ബാധിച്ച് മരിച്ച ഒരു സ്ത്രീയ്ക്കും ഷിഗെല്ല സ്ഥിരീകരിച്ചിരുന്നു.

കഴിഞ്ഞ ദിവസങ്ങളില്‍ കോഴിക്കോട് ജില്ലയില്‍ കൂടുതല്‍ രോഗബാധകളും റിപ്പോര്‍ട്ട് ചെയ്തിരുന്നു. പയ്യോളിയില്‍ മൂന്ന് വയസുകാരനും ഒമ്പത് വയസുകാരനും ഷിഗെല്ല സ്ഥിരീകരിച്ചു. മൂന്ന് വയസുകാരന്റെ ആരോഗ്യനില നിലവില്‍ തൃപ്തികരമാണെന്ന് അധികൃതര്‍ അറിയിച്ചു. തുറയൂര്‍ പഞ്ചായത്തിലെ പതിമൂന്നാം വാര്‍ഡിലാണ് രോഗബാധ റിപ്പോര്‍ട്ട് ചെയ്തിരിക്കുന്നത്.