ന്യൂഡൽഹി, 2026 ജൂൺ 11 –

ആദിവാസി കാര്യ മന്ത്രാലയവും ട്രൈഫെഡും ചേർന്ന് ആദിവാസി വസ്ത്രങ്ങൾ, എംബ്രോയ്ഡറികൾ, കരകൗശല ഉൽപ്പന്നങ്ങൾ എന്നിവ പ്രോത്സാഹിപ്പിക്കാൻ “റിസ – ടൈംലെസ് ട്രൈബൽ” എന്ന പ്രത്യേക പ്രീമിയം ബ്രാൻഡും പ്രത്യേക റിസ സ്റ്റോറും ന്യൂഡൽഹിയിലെ കണോട്ട് പ്ലേസിലെ രാജീവ് ഗാന്ധി ഹാൻഡിക്രാഫ്റ്റ്സ് ഭവനിൽ ആരംഭിച്ചു. ജൂൺ 10-നാണ് പദ്ധതി പ്രഖ്യാപിക്കുകയും സ്റ്റോർ ഉദ്ഘാടനം ചെയ്യുകയും ചെയ്തത്. ആദിവാസി ഉൽപ്പന്നങ്ങൾക്ക് പ്രത്യേക തിരിച്ചറിയൽ നൽകുകയും ദേശീയ-അന്തർദേശീയ വിപണികളിലേക്ക് എത്തിക്കുകയുമാണ് ലക്ഷ്യം.

ആദിവാസി കാര്യ മന്ത്രാലയ സെക്രട്ടറി രഞ്ജന ചോപ്രയുടെ നേതൃത്വത്തിൽ സ്റ്റോർ ഉദ്ഘാടനം നടന്നു. ട്രൈഫെഡ്, രൂപകൽപന സ്ഥാപനങ്ങൾ, ഫാഷൻ രംഗത്തെ പ്രമുഖർ, കരകൗശല പ്രവർത്തകർ എന്നിവർ ചടങ്ങിൽ പങ്കെടുത്തു. ആദിവാസി കരകൗശല പ്രവർത്തകർക്ക് മികച്ച വിപണി ലഭ്യമാക്കാനും പുതിയ രൂപകൽപനകൾ വികസിപ്പിക്കാനും ഉൽപ്പന്ന വൈവിധ്യം വർധിപ്പിക്കാനുമാണ് പദ്ധതി നടപ്പാക്കുന്നത്. രൂപകൽപന വികസനം, നൈപുണ്യ വർധന, ഉൽപ്പന്ന നവീകരണം, പാക്കേജിങ് മെച്ചപ്പെടുത്തൽ തുടങ്ങിയ കാര്യങ്ങളും പദ്ധതിയുടെ ഭാഗമാണ്.

ആദ്യഘട്ടത്തിൽ അസമിലെ എരി സിൽക്കും മുഗ സിൽക്കും, ജാർഖണ്ഡിലെ സാന്താൽ കോട്ടണും, ലഡാക്കിലെ ചാങ്പ പഷ്മിനയും, ഒഡീഷയിലെ കോട്പാഡ് കോട്ടണും ഡോംഗ്രിയ എംബ്രോയ്ഡറിയും, തമിഴ്നാട്ടിലെ ടോഡ എംബ്രോയ്ഡറിയും ഉൾപ്പെടെ ഏഴ് ആദിവാസി വസ്ത്ര-എംബ്രോയ്ഡറി പാരമ്പര്യങ്ങളെയാണ് തെരഞ്ഞെടുത്തിരിക്കുന്നത്. മണിപ്പൂരിലെ ലോങ്പി മൺപാത്ര നിർമാണം, ലഡാക്കിലെ പിച്ചള കട്ട്ലറി, ഛത്തീസ്ഗഡിലെ ഡോക്ര കലാരൂപം എന്നിവയ്ക്കും പ്രത്യേക പ്രോത്സാഹനം നൽകും. സ്ത്രീകളടക്കമുള്ള ആദിവാസി കരകൗശല പ്രവർത്തകരുടെ സാമ്പത്തിക ശാക്തീകരണത്തിനും പാരമ്പര്യ സംരക്ഷണത്തിനും ഈ സംരംഭം സഹായകരമാകുമെന്നാണ് പ്രതീക്ഷ.