ന്യൂഡൽഹി  / 2026  / ഒക്ടോബർ 16

സൈബർ തട്ടിപ്പുകളിൽനിന്ന് രക്ഷനേടാനും ഇലക്ട്രോണിക് മാലിന്യങ്ങൾ സുരക്ഷിതമായി കൈകാര്യം ചെയ്യാനും ഉദ്യോഗസ്ഥർക്ക് പരിശീലനം നൽകി കേന്ദ്ര ടെക്സ്റ്റൈൽസ് മന്ത്രാലയം. പ്രത്യേക ശുചീകരണ പ്രചാരണത്തിന്റെ ആറാം ഘട്ടത്തിന്റെ ഭാഗമായി ഒക്ടോബർ 15നാണ് ശിൽപ്പശാലകൾ സംഘടിപ്പിച്ചത്. എല്ലാ നോഡൽ ഓഫീസർമാരും ഉൾപ്പെടെ 85ലധികം ഉദ്യോഗസ്ഥർ പങ്കെടുത്തു. ഉത്തരവാദിത്തത്തോടെയുള്ള ഇ മാലിന്യ സംസ്കരണം, സൈബർ സുരക്ഷയെക്കുറിച്ചുള്ള അവബോധം, ജോലിസ്ഥലത്തെ സുരക്ഷിത ഡിജിറ്റൽ ഇടപാടുകൾ എന്നിവ പ്രോത്സാഹിപ്പിക്കുകയായിരുന്നു ലക്ഷ്യം.

പരിചയമുള്ളവരുടെ പേരിലെത്തുന്ന സന്ദേശങ്ങളും ശ്രദ്ധിക്കണം

പുതിയ സൈബർ ഭീഷണികളെക്കുറിച്ച് ഉദ്യോഗസ്ഥരെയും ജീവനക്കാരെയും പരിചയപ്പെടുത്താൻ പ്രത്യേക ബോധവത്കരണ പരിപാടി നടത്തി. വിവരങ്ങൾ തട്ടിയെടുക്കാനുള്ള ഫിഷിങ് ആക്രമണങ്ങൾ, ഉപകരണങ്ങൾക്ക് ദോഷം ചെയ്യുന്ന മാൽവെയർ, വ്യാജ വാട്സ്ആപ്പ് സന്ദേശങ്ങൾ, ഡിജിറ്റൽ അറസ്റ്റ് തട്ടിപ്പുകൾ എന്നിവ വിശദീകരിച്ചു. പരിചയമുള്ളവരെന്ന വ്യാജേന എത്തുന്ന സന്ദേശങ്ങളും പണം, ഒറ്റത്തവണ പാസ്‌വേഡ്, വ്യക്തിവിവരങ്ങൾ എന്നിവ ആവശ്യപ്പെടുന്ന സന്ദേശങ്ങളും തിരിച്ചറിയേണ്ടതിന്റെ പ്രാധാന്യം ചൂണ്ടിക്കാട്ടി.

സംശയകരമായ ഇമെയിലുകൾ, ലിങ്കുകൾ, അറ്റാച്ച്മെന്റുകൾ, സന്ദേശങ്ങൾ എന്നിവ കൈകാര്യം ചെയ്യുമ്പോൾ ജാഗ്രത വേണമെന്ന് നിർദേശിച്ചു. അറിയാത്ത ലിങ്കുകളിൽ ക്ലിക്ക് ചെയ്യരുത്. വിശ്വാസ്യത ഉറപ്പാക്കാത്ത ഫയലുകൾ ഡൗൺലോഡ് ചെയ്യുകയോ രഹസ്യവിവരങ്ങൾ പങ്കുവെക്കുകയോ അരുത്. സംശയകരമായ സന്ദേശങ്ങളോട് പ്രതികരിക്കുംമുമ്പ് അവയുടെ ആധികാരികത പരിശോധിക്കണം. ഔദ്യോഗികവും വ്യക്തിപരവുമായ വിവരങ്ങൾ സംരക്ഷിക്കാൻ സുരക്ഷിത ഡിജിറ്റൽ ശീലങ്ങൾ പാലിക്കാനും സൈബർ സംഭവങ്ങൾ സമയബന്ധിതമായി റിപ്പോർട്ട് ചെയ്യാനും നിർദേശിച്ചു.

തെറ്റായ മാലിന്യസംസ്കരണം മണ്ണിനെയും വെള്ളത്തെയും ബാധിക്കും

ഇ മാലിന്യങ്ങൾ ശരിയായ രീതിയിൽ സംസ്കരിക്കാതിരുന്നാലുള്ള പരിസ്ഥിതി പ്രശ്നങ്ങളാണ് മറ്റൊരു പരിശീലനത്തിൽ വിശദീകരിച്ചത്. മണ്ണും വെള്ളവും മലിനമാകാനും അപകടകരമായ പദാർഥങ്ങൾ പുറത്തുവരാനും ഇത് കാരണമാകും. മനുഷ്യരുടെ ആരോഗ്യത്തിനും ആവാസവ്യവസ്ഥകൾക്കും ഇത്തരം പദാർഥങ്ങൾ ഭീഷണിയാകാമെന്നും ഉദ്യോഗസ്ഥരെ ബോധവത്കരിച്ചു.

സാധ്യമാകുന്നിടത്തെല്ലാം ഇലക്ട്രോണിക് ഉപകരണങ്ങൾ വീണ്ടും ഉപയോഗിക്കാനും പുതുക്കിയെടുക്കാനും പുനഃചംക്രമണം ചെയ്യാനും പ്രാധാന്യം നൽകണം. ഇതിലൂടെ വിലപിടിപ്പുള്ള വസ്തുക്കൾ വീണ്ടെടുക്കാം. പുതിയ അസംസ്കൃത വസ്തുക്കളുടെ ആവശ്യവും മാലിന്യനിക്ഷേപ കേന്ദ്രങ്ങളിലെത്തുന്ന മാലിന്യത്തിന്റെ അളവും കുറയ്ക്കാം. ഉപയോഗശൂന്യമായ ഇലക്ട്രോണിക്, വൈദ്യുത ഉപകരണങ്ങൾ ശരിയായി വേർതിരിച്ച് സുരക്ഷിതമായി കൈകാര്യം ചെയ്യണം. നിലവിലുള്ള ഇ മാലിന്യ സംസ്കരണ ചട്ടങ്ങൾ പാലിച്ച് അംഗീകൃത സംവിധാനങ്ങളിലൂടെ അവ സംസ്കരിക്കണമെന്നും നിർദേശിച്ചു.

ഓഫീസിലെ പഴയ ഉപകരണങ്ങൾ ശേഖരിക്കാനും നടപടി

മന്ത്രാലയത്തിന്റെ പരിസരത്ത് ഉണ്ടാകുന്ന ഇ മാലിന്യങ്ങൾ ശേഖരിക്കാനും ശരിയായി കൈകാര്യം ചെയ്യാനുമുള്ള നടപടികളും സ്വീകരിച്ചിട്ടുണ്ട്. കാലഹരണപ്പെട്ടതും ഉപേക്ഷിച്ചതുമായ ഇലക്ട്രോണിക്, വൈദ്യുത ഉപകരണങ്ങൾ നിലവിലുള്ള മാർഗനിർദേശങ്ങൾ പാലിച്ച് ഉത്തരവാദിത്തത്തോടെ സംസ്കരിക്കുന്നതിനാണ് ഊന്നൽ.

ഉപയോഗകാലാവധി കഴിഞ്ഞ ഡെസ്ക്ടോപ്പ് കംപ്യൂട്ടറുകൾ, കീബോർഡുകൾ, ഫോട്ടോകോപ്പിയറുകൾ അഥവാ സെറോക്സ് യന്ത്രങ്ങൾ, വായു ശുദ്ധീകരണ ഉപകരണങ്ങൾ, ഭക്ഷണം ചൂടോടെ സൂക്ഷിക്കാനുള്ള വൈദ്യുത ഹോട്ട് കേസുകൾ എന്നിവയും ഇതിൽപ്പെടും. ഇത്തരം ഉപകരണങ്ങൾ കണ്ടെത്തി ഉചിതമായി വേർതിരിക്കുകയും അംഗീകൃത സംവിധാനങ്ങളിലൂടെ സംസ്കരിക്കാൻ സൗകര്യമൊരുക്കുകയും വേണം. ഇത് പരിസ്ഥിതി മലിനീകരണം തടയാനും വിലപിടിപ്പുള്ള വസ്തുക്കൾ വീണ്ടെടുക്കാനും വിഭവങ്ങൾ കാര്യക്ഷമമായി ഉപയോഗിക്കാനും സഹായിക്കും.

പുനരുപയോഗത്തിലൂടെ വിഭവങ്ങൾ സംരക്ഷിക്കാം

പരിസ്ഥിതിക്ക് അനുയോജ്യമായ ഓഫീസ് ശീലങ്ങൾ സ്വീകരിക്കാനും പരിശീലനങ്ങൾ പ്രോത്സാഹനം നൽകി. ഉത്തരവാദിത്തത്തോടെയുള്ള ഇ മാലിന്യ സംസ്കരണം പരിസ്ഥിതി സംരക്ഷണത്തിനും വിഭവങ്ങളുടെ കാര്യക്ഷമമായ ഉപയോഗത്തിനും സഹായിക്കുമെന്ന് വിശദീകരിച്ചു. വസ്തുക്കൾ പുനരുപയോഗിക്കുകയും പുനഃചംക്രമണം ചെയ്യുകയും ചെയ്യുന്ന ചാക്രിക സമ്പദ്‌വ്യവസ്ഥയെ മുന്നോട്ടുകൊണ്ടുപോകാനും ഇതിലൂടെ കഴിയും.

സുസ്ഥിരമായ ഓഫീസ് പ്രവർത്തനങ്ങളെക്കുറിച്ചും ഇ മാലിന്യങ്ങളുടെ ശരിയായ സംസ്കരണത്തെക്കുറിച്ചും ഉദ്യോഗസ്ഥർക്കും ജീവനക്കാർക്കും അവബോധം നൽകുന്നത് മന്ത്രാലയം പ്രോത്സാഹിപ്പിക്കുന്നു. ഇത്തരം ശ്രമങ്ങൾ കൂടുതൽ വൃത്തിയുള്ള തൊഴിൽ അന്തരീക്ഷം ഒരുക്കുന്നതിനൊപ്പം സുസ്ഥിര വികസനമെന്ന വിശാലമായ ദേശീയ ലക്ഷ്യത്തിനും പിന്തുണ നൽകും.

ശുചിത്വത്തിനൊപ്പം ഡിജിറ്റൽ സുരക്ഷയും

വൃത്തിയുള്ള ജോലിസ്ഥലം, ഉത്തരവാദിത്തത്തോടെയുള്ള വിഭവപരിപാലനം, സുരക്ഷിതമായ ഡിജിറ്റൽ അന്തരീക്ഷം എന്നിവയോടുള്ള പ്രതിബദ്ധതയാണ് ഈ പ്രവർത്തനങ്ങളിലൂടെ മന്ത്രാലയം വ്യക്തമാക്കുന്നത്. പരിസ്ഥിതി സുസ്ഥിരതയും സൈബർ സുരക്ഷാ അവബോധവും ഒരുമിപ്പിച്ച് ജോലിസ്ഥലത്തെ പ്രവർത്തനരീതികൾ മെച്ചപ്പെടുത്താനും വിഭവങ്ങൾ സംരക്ഷിക്കാനും ഡിജിറ്റൽ സുരക്ഷ ശക്തമാക്കാനുമാണ് ശ്രമം.

ഓഫീസുകളിലുടനീളം ശുചിത്വം ഉറപ്പാക്കുക, കാലഹരണപ്പെട്ട ഉപകരണങ്ങൾ ശരിയായി സംസ്കരിക്കുക, വിഭവങ്ങൾ കാര്യക്ഷമമായി ഉപയോഗിക്കുക, സുരക്ഷിതമായ ഡിജിറ്റൽ അന്തരീക്ഷം ഒരുക്കുക എന്നിവയിലൂടെ പ്രത്യേക പ്രചാരണത്തിന്റെ ആറാം ഘട്ടത്തിലെ ലക്ഷ്യങ്ങൾ ശക്തിപ്പെടുത്തുകയാണ് മന്ത്രാലയം.

.