ലോക പരിസ്ഥിതി ദിനാചരണത്തിന്റെ സംസ്ഥാനതല ഉദ്ഘാടനം തിരുവനന്തപുരം മാസ്‌കറ്റ് ഹോട്ടൽ സിംഫണി ഹാളിൽ മുഖ്യമന്ത്രി വി.ഡി. സതീശൻ നിർവഹിച്ചു. പരിസ്ഥിതി സംരക്ഷണത്തിനും കാലാവസ്ഥാ വ്യതിയാന പ്രതിരോധത്തിനും പ്രാധാന്യം നൽകുന്ന വികസന നയങ്ങളാണ് സർക്കാർ പിന്തുടരുന്നതെന്ന് അദ്ദേഹം വ്യക്തമാക്കി. രാജ്യതലത്തിൽ 2070-ഓടെ കാർബൺ ന്യൂട്രൽ ലക്ഷ്യമിടുമ്പോൾ കേരളം 2050-ഓടെ കാർബൺ ന്യൂട്രൽ സംസ്ഥാനമായി മാറാൻ ശ്രമിക്കുന്നതായും മുഖ്യമന്ത്രി പറഞ്ഞു. കാലാവസ്ഥാ വ്യതിയാനം ലോകം നേരിടുന്ന ഏറ്റവും വലിയ വെല്ലുവിളിയാണെന്നും അദ്ദേഹം ചൂണ്ടിക്കാട്ടി.

പ്രകൃതിയെ തകർക്കുന്ന വികസന പ്രവർത്തനങ്ങൾ സർക്കാരിന്റെ ഭാഗത്തുനിന്ന് ഉണ്ടാകില്ലെന്നും സന്തുലിതവും സുസ്ഥിരവുമായ വികസനമാണ് ലക്ഷ്യമെന്നും മുഖ്യമന്ത്രി പറഞ്ഞു. ബംഗാൾ ഉൾക്കടലിൽ മാത്രം കണ്ടിരുന്ന കാലാവസ്ഥാ വ്യതിയാന പ്രതിഭാസങ്ങൾ ഇപ്പോൾ അറബിക്കടലിലും പ്രകടമാകുന്നുണ്ടെന്ന് അദ്ദേഹം മുന്നറിയിപ്പ് നൽകി. അതിതീവ്ര മഴയും മേഘവിസ്‌ഫോടനങ്ങളും ഏത് സമയത്തും സംഭവിക്കാമെന്നും കൊച്ചി, മുംബൈ പോലുള്ള നഗരങ്ങൾക്ക് ഇത് വലിയ ഭീഷണിയാണെന്നും വ്യക്തമാക്കി. മനുഷ്യന്റെയും പ്രകൃതിയുടെയും ആരോഗ്യം പരസ്പരം ബന്ധപ്പെട്ടതാണെന്ന ആശയം കൂടുതൽ പ്രചരിപ്പിക്കണമെന്നും അദ്ദേഹം ആവശ്യപ്പെട്ടു.

കേരളത്തിന്റെ 600 കിലോമീറ്റർ നീളമുള്ള കടൽത്തീരം, 44 നദികൾ, പശ്ചിമഘട്ടം, തടാകങ്ങൾ എന്നിവ സംരക്ഷിക്കേണ്ടത് അനിവാര്യമാണെന്ന് മുഖ്യമന്ത്രി പറഞ്ഞു. കാർബൺ ന്യൂട്രൽ ലക്ഷ്യം ഒരു തലമുറയുടെ മാത്രം ദൗത്യമല്ലെന്നും വരും തലമുറകൾക്കും കൈമാറേണ്ട ഉത്തരവാദിത്തമാണെന്നും അദ്ദേഹം വ്യക്തമാക്കി. ചടങ്ങിൽ ‘കേരള കാർബൺ ന്യൂട്രൽ പാത്ത്‌വേ 2050’യും സംസ്ഥാന മാലിന്യ സംസ്കരണ സൗകര്യങ്ങളെക്കുറിച്ചുള്ള ഓഡിറ്റ് റിപ്പോർട്ടും പ്രകാശനം ചെയ്തു. പത്മശ്രീ കൊല്ലയിൽ ദേവകി അമ്മയെ ആദരിക്കുകയും പരിസ്ഥിതി മിത്രം പുരസ്‌കാരങ്ങൾ വിതരണം ചെയ്യുകയും ചെയ്തു. പരിസ്ഥിതി വകുപ്പ് മന്ത്രി സണ്ണി ജോസഫ് അധ്യക്ഷത വഹിച്ച ചടങ്ങിൽ ആരോഗ്യ വകുപ്പ് മന്ത്രി കെ. മുരളീധരൻ മുഖ്യപ്രഭാഷണം നടത്തി.

.