ശശി തരൂര് വിവാദത്തില് പരസ്യപ്രസ്താവനകള്ക്ക് കര്ശനമായ നിയന്ത്രണം ഏര്പ്പെടുത്തി കെ.പി.സി.സി. പാര്ട്ടിയുടെ ഐക്യത്തേയും കെട്ടുറപ്പിനേയും ബാധിക്കുന്ന പ്രവര്ത്തനങ്ങളും പരസ്യപ്രതികരണങ്ങളും ആരുടെ ഭാഗത്തു നിന്നും ഉണ്ടാകരുതെന്നു കെ.പി.സി.സി. പ്രസിഡന്റ് കെ. സുധാകരന് നിര്ദേശിച്ചു. തരൂരിന് സംസ്ഥാനത്ത് ഒരു വിലക്കുമില്ലെന്നും പാര്ട്ടി പരിപാടികളില് പങ്കെടുക്കുന്നതില് തടസമില്ലെന്നും സുധാകരന് അറിയിച്ചു.
ആഭ്യന്തര ജനാധിപത്യം പൂര്ണമായും ഉറപ്പാക്കുന്ന പ്രസ്ഥാനമാണ് കോണ്ഗ്രസ്. പരസ്യ പ്രതികരണം പാര്ട്ടിക്ക് ഒട്ടും ഗുണകരമല്ല. ശശി തരൂര് വിഷയവുമായി ബന്ധപ്പെട്ട് പൊതുജനമധ്യത്തില് കോണ്ഗ്രസിന് അവമതിപ്പ് ഉണ്ടാക്കുന്ന പ്രവര്ത്തികളില് നിന്നും നേതാക്കള് പിന്തിരിയണം. മറ്റുവിഷയങ്ങള് പാര്ട്ടി ചര്ച്ച ചെയ്യും.
കോണ്ഗ്രസില് സ്വതന്ത്രമായി പ്രവര്ത്തിക്കാനുള്ള എല്ലാ സ്വാതന്ത്ര്യവും ശശി തരൂരിനുണ്ട്. കോണ്ഗ്രസിന്റെ സമുന്നത നേതാവായ ശശി തരൂരിന് ബന്ധപ്പെട്ട ജില്ലാ കോണ്ഗ്രസ് കമ്മിറ്റികളുമായി കൂടിയാലോചിച്ച് ഔദ്യോഗിക പാര്ട്ടി പരിപാടികളില് പങ്കെടുക്കാന് ഒരു തടസവുമില്ല. -കെ. സുധാകരന് പറഞ്ഞു.
കോണ്ഗ്രസിനെ ശക്തിപ്പെടുത്താന് അഹോരാത്രം കഷ്ടപ്പെടുന്ന നേതാക്കള് മോശക്കാരാണെന്ന രീതിയില് സമൂഹമാധ്യമങ്ങളിലും മറ്റും നടക്കുന്ന പ്രചരണങ്ങളുടെ പിന്നിലെ ദുരുദ്ദേശ്യത്തെ ഒരിക്കലും വച്ചു പൊറുപ്പിക്കില്ല. ഒരു കാലത്തും കാണാത്ത ഐക്യത്തോടെ നേതാക്കളും പ്രവര്ത്തകരും ഒരുമിച്ച് നീങ്ങുമ്പോള് അതിനെ തുരങ്കംവയ്ക്കുന്ന എല്ലാ ശ്രമങ്ങളെയും അര്ഹിക്കുന്ന ഗൗരവത്തോടെ കൈകാര്യം ചെയ്യും.
നേതാക്കളുടെ സ്വതന്ത്രമായ സംഘടനാ പ്രവര്ത്തനത്തിന് വിഘാതം സൃഷ്ടിക്കുന്ന നടപടികള് ഉണ്ടാകില്ലെന്ന് ഉറപ്പുവരുത്താന് ഡി.സി.സികള്ക്കു കര്ശന നിര്ദേശം നല്കിയിട്ടുണ്ട്. പൊതുപരിപാടിയില് പങ്കെടുക്കുന്നതില് നിന്നും ശശി തരൂരിനെ തടഞ്ഞെന്ന വാര്ത്ത അടിസ്ഥാനരഹിതമാണ്. വിവാദങ്ങള് മാധ്യമ സൃഷ്ടിയാണ്. അത്തരം വ്യാജ പ്രചാരണങ്ങളില്നിന്നു സ്വയം മാറിനില്ക്കാന് നേതാക്കളും പ്രവര്ത്തകരും ജാഗ്രത പുലര്ത്തണം.- സുധാകരന് പറഞ്ഞു.
