നാഗ്പുർ ഗഡ്ചിറോളി  / 2026  / നവംബർ 05

നക്സൽമുക്ത ഭാരതം എന്ന വിഷയത്തിൽ നാഗ്പുർ പ്രസ് ഇൻഫർമേഷൻ ബ്യൂറോയും ഗഡ്ചിറോളി പൊലീസും ചേർന്ന് ഏകദിന വാർത്താലാപ് മാധ്യമ ശിൽപ്പശാല സംഘടിപ്പിച്ചു. നവംബർ നാലിന് ഗഡ്ചിറോളി പൊലീസ് ആസ്ഥാനത്തെ ഏകലവ്യ ഹാളിലായിരുന്നു പരിപാടി. ജില്ലയിലെ നിരവധി മാധ്യമപ്രവർത്തകർ പങ്കെടുത്തു. മുതിർന്ന പൊലീസ് ഉദ്യോഗസ്ഥരും വിഷയവിദഗ്ധരും മാധ്യമപ്രവർത്തകരും ചേർന്ന് മേഖലയിലെ സുരക്ഷയിലും വികസനത്തിലും വരുന്ന മാറ്റങ്ങൾ ചർച്ച ചെയ്തു. ഇടതുപക്ഷ തീവ്രവാദത്തെ നേരിടാൻ രാജ്യം നടത്തുന്ന ശ്രമങ്ങളും ചർച്ചയായി.

വിശിഷ്ടാതിഥികളെ സ്വാഗതം ചെയ്തുകൊണ്ടാണ് പരിപാടി ആരംഭിച്ചത്. നാഗ്പുർ പ്രസ് ഇൻഫർമേഷൻ ബ്യൂറോയിലെ മാധ്യമ ആശയവിനിമയ ഉദ്യോഗസ്ഥൻ സൗരഭ് ഖേഖ്ഡെ ആമുഖപ്രസംഗം നടത്തി. സർക്കാരും മാധ്യമങ്ങളും തമ്മിലുള്ള ആശയവിനിമയത്തിനുള്ള വേദിയാണ് വാർത്താലാപ് എന്ന് അദ്ദേഹം പറഞ്ഞു. സർക്കാർ പദ്ധതികളെക്കുറിച്ചും മേഖലയിലെ മാറ്റങ്ങളെക്കുറിച്ചും കൃത്യമായ വിവരങ്ങൾ ജനങ്ങളിലെത്തിക്കുന്നതിൽ പ്രാദേശിക മാധ്യമപ്രവർത്തകരുടെ പങ്കും അദ്ദേഹം ചൂണ്ടിക്കാട്ടി.

സുരക്ഷാ നടപടികൾക്കൊപ്പം ജനാധിപത്യ സ്ഥാപനങ്ങളും ശക്തമാകണം

നാഗ്പുർ റേഞ്ചിലെ നക്സൽവിരുദ്ധ പ്രവർത്തനങ്ങളുടെ ചുമതലയുള്ള സ്പെഷ്യൽ ഇൻസ്പെക്ടർ ജനറൽ ഓഫ് പൊലീസ് സന്ദീപ് പാട്ടീൽ ഓൺലൈനായി പരിപാടിയെ അഭിസംബോധന ചെയ്തു. നഗര മാവോയിസവും അതിന്റെ വിപുലമായ പ്രത്യാഘാതങ്ങളുമായിരുന്നു അദ്ദേഹത്തിന്റെ വിഷയം. തുടർച്ചയായ ശ്രമങ്ങളും ദൃഢമായ സുരക്ഷാ നടപടികളും ദേശീയ പ്രാധാന്യമുള്ള നിരവധി ദൗത്യങ്ങളും വഴി ഗഡ്ചിറോളി മാവോയിസ്റ്റ് ബാധിത മേഖലയിൽനിന്ന് നക്സൽമുക്ത ജില്ലയായി മാറിയെന്ന് അദ്ദേഹം പറഞ്ഞു. സുരക്ഷാസേനകളും കാര്യക്ഷമമായ പൊലീസ് പ്രവർത്തനവും വികസനപദ്ധതികളും ഏകോപിച്ചാൽ നിലനിൽക്കുന്ന മാറ്റം കൊണ്ടുവരാമെന്നാണ് ഗഡ്ചിറോളിയുടെ അനുഭവം കാണിക്കുന്നത്. നക്സൽമുക്ത ഭാരതത്തിനായുള്ള ദേശീയ ശ്രമങ്ങൾക്ക് ജില്ല ഇപ്പോൾ മാതൃകയാകുകയാണെന്നും അദ്ദേഹം വ്യക്തമാക്കി.

സംഘടിത മാവോയിസ്റ്റ് ശൃംഖലകൾ ഭരണഘടനാധിഷ്ഠിത ജനാധിപത്യത്തിന് ഉയർത്തുന്ന വെല്ലുവിളികളും പാട്ടീൽ വിശദീകരിച്ചു. മാവോയിസ്റ്റ് പ്രസ്ഥാനം വിദൂര പ്രദേശങ്ങളിലെ സായുധപ്രവർത്തനങ്ങളിൽ മാത്രം ഒതുങ്ങുന്നതല്ല. അതിന്റെ സംഘടനാസംവിധാനങ്ങൾ, ആശയപരമായ സ്വാധീനം, സംഘർഷബാധിത പ്രദേശങ്ങൾക്ക് പുറത്തുള്ള ശൃംഖലകൾ എന്നിവയും പരിഗണിക്കണം. സുരക്ഷാ നടപടികൾക്കൊപ്പം വികസനവും പൊതുജന ബോധവൽക്കരണവും ഉൾക്കൊള്ളുന്ന സമഗ്ര സമീപനം വേണം. ജനാധിപത്യ സ്ഥാപനങ്ങൾ ശക്തിപ്പെടുത്തുകയും അടിസ്ഥാനസൗകര്യങ്ങൾ മെച്ചപ്പെടുത്തുകയും സർക്കാർ ക്ഷേമപദ്ധതികൾ ഫലപ്രദമായി ജനങ്ങളിലെത്തിക്കുകയും വേണമെന്നും അദ്ദേഹം പറഞ്ഞു. ഇന്ത്യൻ ഭരണഘടനയിലൂടെ ഉണ്ടാകുന്ന മാറ്റമാണ് യഥാർഥ വിപ്ലവമെന്നും ഭാരതരത്ന ഡോക്ടർ ബാബാസാഹേബ് അംബേദ്കറിന് ഈ ചിന്ത സമർപ്പിക്കുന്നതായും അദ്ദേഹം കൂട്ടിച്ചേർത്തു.

മാവോയിസ്റ്റ് പ്രവർത്തനങ്ങളുടെ സാമ്പത്തിക വശങ്ങളും ചർച്ചയായി

നയവിശകലന വിദഗ്ധൻ പി വൈ രമണ മാവോയിസ്റ്റ് സാമ്പത്തികവ്യവസ്ഥയെക്കുറിച്ചുള്ള സെഷൻ നയിച്ചു. ഇടതുപക്ഷ തീവ്രവാദത്തിന്റെ സാമ്പത്തിക വശങ്ങളും പ്രാദേശിക വിഭവങ്ങളുമായും സാമ്പത്തിക പ്രവർത്തനങ്ങളുമായുമുള്ള ബന്ധവും അദ്ദേഹം വിശദീകരിച്ചു. ധാതുസമ്പത്ത്, പ്രാദേശിക സാമ്പത്തിക ഘടനകൾ, മാവോയിസ്റ്റ് പ്രവർത്തനങ്ങളുമായി ബന്ധപ്പെട്ട സാമ്പത്തിക ശൃംഖലകൾ എന്നിവയുടെ പ്രാധാന്യവും ചർച്ച ചെയ്തു.

ഇത്തരം പ്രവർത്തനങ്ങൾ പ്രാദേശിക സമൂഹങ്ങളെയും വികസനത്തെയും എങ്ങനെ ബാധിക്കുന്നു എന്ന് പരിശോധിക്കുമ്പോൾ സംഘർഷത്തിന്റെ സാമ്പത്തിക വശങ്ങളും മനസ്സിലാക്കണമെന്ന് അദ്ദേഹം പറഞ്ഞു. ഇടതുപക്ഷ തീവ്രവാദത്തിന്റെ സാമ്പത്തിക വശങ്ങളെക്കുറിച്ച് വ്യക്തമായ ധാരണയോടെയും സമതുലിതമായ സമീപനത്തോടെയും മാധ്യമങ്ങൾ റിപ്പോർട്ട് ചെയ്യേണ്ടതിന്റെ ആവശ്യകതയും സെഷൻ ചൂണ്ടിക്കാട്ടി.

പുതിയ റിക്രൂട്ട്മെന്റ് തടയാനും കീഴടങ്ങൽ പ്രോത്സാഹിപ്പിക്കാനും ശ്രമം

ഗഡ്ചിറോളി പൊലീസ് സൂപ്രണ്ട് എം രമേശ്, ഇടതുപക്ഷ തീവ്രവാദത്തെ നേരിടുന്നതിൽ ജില്ല പിന്നിട്ട വഴിയും വർഷങ്ങളായി സുരക്ഷാസാഹചര്യത്തിലുണ്ടായ മാറ്റങ്ങളും വിശദീകരിച്ചു. തുടർച്ചയായ സുരക്ഷാ നടപടികൾ, മെച്ചപ്പെട്ട രഹസ്യവിവര ശേഖരണം, ഏകോപിത പ്രവർത്തനം എന്നിവയിലൂടെ മാവോയിസ്റ്റ് പ്രവർത്തനങ്ങൾ നിയന്ത്രിക്കുന്നതിൽ കൈവരിച്ച പുരോഗതി അദ്ദേഹം ചൂണ്ടിക്കാട്ടി. സമീപവർഷങ്ങളിൽ മാവോയിസ്റ്റ് പ്രവർത്തകർക്കെതിരെ നടന്ന പ്രധാന ദൗത്യങ്ങളും കീഴടങ്ങുന്നവരുടെ എണ്ണം വർധിക്കുന്നതും അദ്ദേഹം പരാമർശിച്ചു. സുരക്ഷാസേനകളുടെ നിരന്തര ശ്രമങ്ങളിലൂടെ കൈവരിച്ച പുരോഗതിയും ജില്ലയിലെ സുരക്ഷാസാഹചര്യത്തിലെ മാറ്റത്തിന്റെ പ്രാധാന്യവും വിശദീകരിച്ചു. മാവോയിസ്റ്റ് സംഘടനകളിലേക്ക് പുതിയ ആളുകളെ ചേർക്കുന്നത് തടയുന്നതിനും പ്രവർത്തകരെ കീഴടങ്ങി സമൂഹത്തിന്റെ മുഖ്യധാരയിലേക്ക് മടങ്ങാൻ പ്രോത്സാഹിപ്പിക്കുന്നതിനും നൽകുന്ന ശ്രദ്ധയും ചൂണ്ടിക്കാട്ടി.

കലാപവിരുദ്ധ പ്രവർത്തനശേഷി വർധിപ്പിക്കൽ, സംസ്ഥാനങ്ങൾ തമ്മിലുള്ള ഏകോപനം, സുരക്ഷാ അടിസ്ഥാനസൗകര്യങ്ങൾ ശക്തിപ്പെടുത്തൽ, രഹസ്യവിവര ശേഖരണവും നിരീക്ഷണ സംവിധാനങ്ങളും മെച്ചപ്പെടുത്തൽ എന്നിവയും ചർച്ചയായി. മാവോയിസ്റ്റ് പ്രവർത്തനങ്ങളെ നേരിടുന്നതിൽ സി അറുപത് പോലുള്ള പ്രത്യേക സേനകളുടെ പങ്കും വിശദീകരിച്ചു. മുതിർന്ന മാധ്യമപ്രവർത്തകൻ കാർത്തിക് ലോക്ഹണ്ഡെ മാവോയിസ്റ്റ് സ്വാധീനത്തിന് ശേഷമുള്ള സാഹചര്യങ്ങളെക്കുറിച്ച് സംസാരിച്ചു. ഇടതുപക്ഷ തീവ്രവാദം ബാധിച്ച പ്രദേശങ്ങളിലെ മാറ്റങ്ങൾ രേഖപ്പെടുത്തണമെന്നും വികസനവുമായി ബന്ധപ്പെട്ട മാറ്റങ്ങളും അവിടത്തെ യഥാർഥ സാഹചര്യങ്ങളും ജനശ്രദ്ധയിൽ കൊണ്ടുവരണമെന്നും അദ്ദേഹം പറഞ്ഞു.

ജനങ്ങളുടെ വിശ്വാസം നിലനിർത്തുന്നതിന് മുൻഗണന

നന്ദിപ്രസംഗം നടത്തിയ നാഗ്പുർ റേഞ്ച് ഡെപ്യൂട്ടി ഇൻസ്പെക്ടർ ജനറൽ ഓഫ് പൊലീസ് യോഗേഷ് കുമാർ, ഗഡ്ചിറോളിയുടെ മാറ്റത്തിന് ഒരു പതിറ്റാണ്ടിലേറെയായി സാക്ഷിയായ അനുഭവം പങ്കുവച്ചു. മാവോയിസ്റ്റ് ബാധിത പ്രദേശത്തിൽനിന്ന് നക്സൽമുക്ത ജില്ലയിലേക്കുള്ള യാത്രയിലെ ഏറ്റവും വലിയ നേട്ടം സർക്കാരിലും സമൂഹത്തിന്റെ മുഖ്യധാരയിലും പ്രാദേശിക ജനങ്ങളുടെ വിശ്വാസം നേടിയതാണെന്ന് അദ്ദേഹം പറഞ്ഞു. ഗഡ്ചിറോളിയെ നക്സൽമുക്തമാക്കുന്നതിൽ നിർണായക പങ്കുവഹിച്ച പൊലീസ് ഉദ്യോഗസ്ഥരുടെയും കമാൻഡോകളുടെയും സമർപ്പണവും ധീരതയും ജീവത്യാഗവും അദ്ദേഹം അനുസ്മരിച്ചു. സംവിധാനത്തിലുള്ള ജനങ്ങളുടെ വിശ്വാസം നിലനിർത്തുന്നതിന് തുടർന്നും പ്രധാന പരിഗണന നൽകുമെന്നും വ്യക്തമാക്കി. ഗഡ്ചിറോളി അഡീഷണൽ പൊലീസ് സൂപ്രണ്ട് ഓപ്പറേഷൻസ് കാർത്തിക് മധിര, അഡീഷണൽ പൊലീസ് സൂപ്രണ്ട് അഡ്മിനിസ്ട്രേഷൻ ഗോകുൽ രാജ് ജി എന്നിവരും മറ്റു മുതിർന്ന പൊലീസ് ഉദ്യോഗസ്ഥരും പരിപാടിയിൽ പങ്കെടുത്തു.

മാറുന്ന സാമൂഹിക സാമ്പത്തിക സാഹചര്യങ്ങൾ, സുരക്ഷാ നടപടികളുടെ ഫലങ്ങൾ, ബാധിത സമൂഹങ്ങളുടെ പുനരധിവാസം എന്നിവ റിപ്പോർട്ട് ചെയ്യുന്നതിൽ പ്രാദേശിക മാധ്യമങ്ങൾക്കുള്ള ഉത്തരവാദിത്വം ശിൽപ്പശാല ചൂണ്ടിക്കാട്ടി. മേഖലയിലെ വെല്ലുവിളികളും പുരോഗതിയും ഉൾക്കൊള്ളുന്ന, വസ്തുതകളെ അടിസ്ഥാനമാക്കിയ സമതുലിതമായ റിപ്പോർട്ടിങ് വേണമെന്നും വ്യക്തമാക്കി. നക്സൽമുക്ത ഭാരതം സംരംഭത്തിന്റെ സുരക്ഷാ, സാമ്പത്തിക, വികസന വശങ്ങളെക്കുറിച്ച് മുതിർന്ന പൊലീസ് ഉദ്യോഗസ്ഥരുമായും വിദഗ്ധരുമായും സംവദിക്കാൻ മാധ്യമപ്രവർത്തകർക്ക് അവസരം ലഭിച്ചു. നിലനിൽക്കുന്ന സമാധാനത്തിന് സുരക്ഷ, ഭരണനിർവഹണം, അടിസ്ഥാനസൗകര്യ വികസനം, ക്ഷേമപദ്ധതികളുടെ വിതരണം, പുനരധിവാസം, ജനപങ്കാളിത്തം എന്നിവ ഒരുമിക്കുന്ന സമീപനം ആവശ്യമാണെന്നും പരിപാടി ചൂണ്ടിക്കാട്ടി. സർക്കാർ നയങ്ങളും പദ്ധതികളും നേട്ടങ്ങളും സംബന്ധിച്ച വിവരങ്ങൾ പ്രചരിപ്പിക്കുന്നതിൽ പ്രസ് ഇൻഫർമേഷൻ ബ്യൂറോയുടെ പങ്കും പരിചയപ്പെടുത്തി. അറിവോടെയും കൃത്യതയോടെയും ഉത്തരവാദിത്വത്തോടെയും റിപ്പോർട്ട് ചെയ്യേണ്ടതിന്റെ പ്രാധാന്യം ഓർമിപ്പിച്ച പരിപാടി, പങ്കെടുത്ത മാധ്യമപ്രവർത്തകരുടെ അഭിപ്രായങ്ങളും ആശയവിനിമയവുമായി സമാപിച്ചു.

.