ന്യൂഡൽഹി  / 2026  / ഒക്ടോബർ 16

ഇന്ത്യയുടെ കായിക പ്രകടനം മെച്ചപ്പെടുത്താൻ ദേശീയ കായിക ഫെഡറേഷനുകൾ കൂടുതൽ ഉത്തരവാദിത്വം ഏറ്റെടുക്കണമെന്ന് കേന്ദ്ര കായികമന്ത്രി ഡോ. മൻസുഖ് മാണ്ഡവ്യ. 2026 ഏഷ്യൻ ഗെയിംസിൽ ഇന്ത്യ നാലാം സ്ഥാനത്തെത്തിയതിനു പിന്നാലെ, ഒക്ടോബർ 15ന് ന്യൂഡൽഹിയിൽ നടന്ന അവലോകന യോഗത്തിലാണ് മന്ത്രിയുടെ നിർദേശം. വിവിധ ഫെഡറേഷനുകളുടെ മേധാവികളുമായി അദ്ദേഹം ചർച്ച നടത്തി. മികവുള്ള താരങ്ങളെ തുടർച്ചയായി വളർത്തിയെടുക്കണമെന്നും ഇന്ത്യയുടെ കായികമികവ് നിലനിർത്താൻ കൂടുതൽ ഏകോപനത്തോടെ പ്രവർത്തിക്കണമെന്നും മന്ത്രി പറഞ്ഞു.

ഏതാനും മെഡൽ ജേതാക്കളെ മാത്രം ആശ്രയിച്ചാൽ പോരാ

ചുരുക്കം ചില മെഡൽ ജേതാക്കളെ മാത്രം ആശ്രയിക്കുന്ന സ്ഥിതി മാറണമെന്ന് മാണ്ഡവ്യ ആവശ്യപ്പെട്ടു. ചാമ്പ്യന്മാരുടെ പുതിയ നിര തുടർച്ചയായി ഉയർന്നുവരണം. “മീരാബായ് ചാനു മാത്രം എത്രകാലമാണ് നമുക്കുവേണ്ടി മെഡലുകൾ നേടിക്കൊണ്ടിരിക്കുക? മീരാബായ് ചാനുവിനെപ്പോലെ പത്ത് താരങ്ങളെ കൂടി വളർത്തണം. ഓരോ ഫെഡറേഷനും ഈ ഉത്തരവാദിത്വം ഗൗരവത്തോടെ ഏറ്റെടുക്കണം” എന്ന് അദ്ദേഹം പറഞ്ഞു. പ്രതിഭകളെ കണ്ടെത്തുകയും ശരിയായ പരിശീലനം നൽകുകയും വേണം. താരങ്ങൾക്ക് ഏറ്റവും ഉയർന്ന തലത്തിലേക്ക് വളരാനുള്ള സാഹചര്യവും ഒരുക്കണം. തുടർന്നുവരുന്ന കായികമേളകളിലും ഇന്ത്യയുടെ മെഡൽ പ്രതീക്ഷകൾ നിലനിർത്താൻ കഴിയുന്ന താരങ്ങളെ കണ്ടെത്തി വളർത്തേണ്ടതുണ്ടെന്നും മന്ത്രി വ്യക്തമാക്കി.

ഏഷ്യൻ ഗെയിംസ് വിലയിരുത്തി; അടുത്ത മേളകൾക്കുള്ള ഒരുക്കവും ചർച്ചയായി

വ്യാഴാഴ്ച നടന്ന സംഗമത്തിൽ 2026 ഏഷ്യൻ ഗെയിംസിലെ ഇന്ത്യയുടെ പ്രകടനം വിലയിരുത്തി. ലോസ് ആഞ്ജലസിൽ നടക്കുന്ന 2028 ഒളിമ്പിക്സ്, 2030 കോമൺവെൽത്ത് ഗെയിംസ്, ദോഹയിലെ 2030 ഏഷ്യൻ ഗെയിംസ് എന്നിവയ്ക്കുള്ള ഒരുക്കങ്ങളും പരിശോധിച്ചു. ഷൂട്ടിങ്, അത്‌ലറ്റിക്സ്, ബോക്സിങ്, അമ്പെയ്ത്ത്, സ്ക്വാഷ്, വുഷു തുടങ്ങി പ്രധാന ദേശീയ കായിക ഫെഡറേഷനുകളുടെയെല്ലാം പ്രതിനിധികൾ പങ്കെടുത്തു. ഖേലോ ഇന്ത്യ പദ്ധതിയും ദേശീയ കായിക ഫെഡറേഷനുകളും തമ്മിലുള്ള പ്രവർത്തന ഏകോപനത്തെക്കുറിച്ച് ഖേലോ ഇന്ത്യയുടെ ചുമതലയുള്ള ജോയിന്റ് സെക്രട്ടറി വിനീൽ കൃഷ്ണ അവതരണം നടത്തി. ടാർഗറ്റ് ഒളിമ്പിക് പോഡിയം സ്കീം ചീഫ് എക്സിക്യൂട്ടീവ് ഓഫീസർ കേണൽ എൻ. എസ്. ജോഹൽ ഐച്ചി–നഗോയ ഏഷ്യൻ ഗെയിംസിലെ പ്രകടനവും ലോസ് ആഞ്ജലസ് ഒളിമ്പിക്സിനുള്ള തയ്യാറെടുപ്പുകളും വിലയിരുത്തി. ദേശീയ കായിക ഫെഡറേഷനുകൾക്കുള്ള സഹായപദ്ധതിയുടെ പരിഷ്കരിച്ച മാർഗനിർദേശങ്ങൾ ഉൾപ്പെടുത്തിയ കൈപ്പുസ്തകവും യോഗത്തിൽ പുറത്തിറക്കി.

വലിയ മത്സരങ്ങളിൽ ശ്രദ്ധ പതറാതിരിക്കാൻ വിദഗ്ധസഹായം

പ്രധാന അന്താരാഷ്ട്ര വേദികളിൽ മത്സരിക്കുമ്പോൾ താരങ്ങൾക്ക് ശ്രദ്ധ നഷ്ടപ്പെടുന്ന സാഹചര്യം കുറയ്ക്കണമെന്ന് മാണ്ഡവ്യ പറഞ്ഞു. ഇതിനായി കൂടുതൽ കായിക മനഃശാസ്ത്രജ്ഞരുടെയും കായികശാസ്ത്ര വിദഗ്ധരുടെയും മികച്ച പ്രകടനത്തിനായി മാനസിക പരിശീലനം നൽകുന്ന പരിശീലകരുടെയും സേവനം ആവശ്യമാണ്. ഓരോ ദേശീയ കായിക ഫെഡറേഷനും കൂടുതൽ മത്സരങ്ങൾ സംഘടിപ്പിക്കണം. താരങ്ങളുടെ തയ്യാറെടുപ്പ് ശക്തമാക്കുകയും പൂർണ സമർപ്പണത്തോടെ പ്രവർത്തിക്കുകയും വേണം. മത്സരപ്രകടനത്തിലും ഭരണനിർവഹണത്തിലുമുള്ള പോരായ്മകൾ സത്യസന്ധമായി വിലയിരുത്തണമെന്നും മന്ത്രി ആവശ്യപ്പെട്ടു.

പ്രതിഭയെ കണ്ടെത്തിയാൽ മാത്രം പോരാ; പരിശീലനവും പിന്തുണയും വേണം

എല്ലാ ഫെഡറേഷനുകളും ഖേലോ ഇന്ത്യ മിഷന്റെ ലക്ഷ്യങ്ങൾക്ക് അനുസരിച്ച് പ്രവർത്തിക്കണമെന്ന് കേന്ദ്ര യുവജനകാര്യ, കായിക സഹമന്ത്രി രക്ഷ ഖഡ്സെ പറഞ്ഞു. സംസ്ഥാന, ജില്ലാ തലങ്ങളിലെ ഫെഡറേഷനുകൾ നിലവിലുണ്ടെന്നും ഫലപ്രദമായി പ്രവർത്തിക്കുന്നുണ്ടെന്നും ദേശീയ ഫെഡറേഷനുകൾ ഉറപ്പാക്കണം. പ്രതിഭകളെ കണ്ടെത്തുന്നതിനൊപ്പം ഈ പ്രവർത്തനവും പൂർണ മനസ്സോടെ ഏറ്റെടുക്കണം. “പ്രതിഭയെ കണ്ടെത്തുന്നത് നടപടിക്രമത്തിന്റെ ഒരു ഭാഗം മാത്രമാണ്. താരങ്ങൾക്ക് അവരുടെ കഴിവിനൊത്ത ഉയരത്തിലെത്താൻ ശരിയായ പരിശീലനവും പിന്തുണയും ലഭിക്കണം” എന്ന് അവർ പറഞ്ഞു. സംസ്ഥാന, ജില്ലാ ഫെഡറേഷനുകളുടെ കാര്യക്ഷമമായ പ്രവർത്തനം ഉറപ്പാക്കേണ്ട ഉത്തരവാദിത്വവും ദേശീയ ഫെഡറേഷനുകൾക്കുണ്ടെന്ന് അവർ ആവർത്തിച്ചു. കൂട്ടായ പ്രവർത്തനത്തിലൂടെ മാത്രമേ താരങ്ങളുടെ തയ്യാറെടുപ്പ് ശക്തമാക്കാനും പ്രതിഭകൾക്ക് മുന്നേറാനുള്ള മികച്ച അവസരമൊരുക്കാനും ഇന്ത്യയുടെ മെഡൽനേട്ടം വർധിപ്പിക്കാനും കഴിയൂ എന്നും ഖഡ്സെ വ്യക്തമാക്കി.

ദോഹയിൽ ആദ്യ മൂന്നിൽ എത്തണം; കോമൺവെൽത്തിൽ സ്വന്തം റെക്കോർഡ് മറികടക്കണം

ദോഹയിലെ 2030 ഏഷ്യൻ ഗെയിംസിൽ ഇന്ത്യ ആദ്യ മൂന്ന് സ്ഥാനങ്ങളിലൊന്നിലെത്താൻ ലക്ഷ്യമിടണമെന്ന് കായിക സെക്രട്ടറി ഹരി രഞ്ജൻ റാവു പറഞ്ഞു. മൂന്നാം സ്ഥാനത്തെത്താൻ പരിശ്രമിക്കണമെന്നാണ് അദ്ദേഹം ആവശ്യപ്പെട്ടത്. ഇന്ത്യ ആതിഥേയത്വം വഹിക്കാനിരിക്കുന്ന 2030 കോമൺവെൽത്ത് ഗെയിംസിനെ വലിയ ദേശീയ വെല്ലുവിളിയായി കാണണം. 2010 കോമൺവെൽത്ത് ഗെയിംസിലെ ഇന്ത്യയുടെ സ്വന്തം റെക്കോർഡ് മറികടന്ന് ആദ്യ മൂന്നിൽ ഇടംപിടിക്കണം. ആതിഥേയ രാജ്യമെന്ന നിലയിൽ ഓരോ ഫെഡറേഷനും മത്സരത്തെ ഗൗരവത്തോടെ കണ്ട് അതിനനുസരിച്ച് തയ്യാറെടുക്കണം. ഇപ്പോൾ മുതൽ ഇതിനായി പ്രവർത്തിക്കണമെന്നും അദ്ദേഹം പറഞ്ഞു. കായികമേഖലയെ നാല് ചക്രങ്ങളുള്ള വാഹനത്തോടാണ് റാവു നേരത്തെ ഉപമിച്ചത്. താരങ്ങൾ, പരിശീലകർ, ദേശീയ കായിക ഫെഡറേഷനുകൾ, യുവജനകാര്യ–കായിക മന്ത്രാലയവും സ്പോർട്സ് അതോറിറ്റി ഓഫ് ഇന്ത്യയും ചേർന്ന സംവിധാനം എന്നിവ ഒരുമിച്ച് പ്രവർത്തിച്ചാൽ മാത്രമേ മുന്നോട്ടുപോകാനാകൂ എന്നും അദ്ദേഹം വ്യക്തമാക്കി.

.