ന്യൂഡൽഹി / 2026 / ഒക്ടോബർ 16
ഡാറ്റാ സെന്ററുകളുടെ സുസ്ഥിര വളർച്ച ആസൂത്രണം ചെയ്യാൻ സംസ്ഥാനങ്ങളെ സഹായിക്കുന്ന വിലയിരുത്തൽ മാർഗരേഖ നീതി ആയോഗിന്റെ ഫ്രോണ്ടിയർ ടെക് ഹബ് പുറത്തിറക്കി. ഒക്ടോബർ 14നായിരുന്നു പ്രകാശനം. നിക്ഷേപം ആകർഷിക്കുന്നതിനൊപ്പം അതിനാവശ്യമായ അടിസ്ഥാനസൗകര്യങ്ങൾ ഒരുക്കാനും നിർണായക വിഭവങ്ങൾ സംരക്ഷിക്കാനും ദീർഘകാല സാമ്പത്തിക നേട്ടം ഉറപ്പാക്കാനും സംസ്ഥാനങ്ങളെ സഹായിക്കുകയാണ് ലക്ഷ്യം. വ്യവസായ മേഖല, കേന്ദ്ര ഇലക്ട്രോണിക്സ്–വിവരസാങ്കേതിക മന്ത്രാലയം, ഊർജ മന്ത്രാലയം, വ്യവസായ പ്രോത്സാഹന–ആഭ്യന്തര വ്യാപാര വകുപ്പ് എന്നിവയുടെ നിർദേശങ്ങൾ ഉൾപ്പെടുത്തിയാണ് മാർഗരേഖ തയ്യാറാക്കിയത്.
ശേഷി ഉയർന്നു; വൈദ്യുതിയും വെള്ളവും ഉറപ്പാക്കണം
ഇന്ത്യയിലെ ഡാറ്റാ സെന്ററുകളുടെ ശേഷി 2020ൽ ഏകദേശം 375 മെഗാവാട്ടായിരുന്നു. ഇപ്പോൾ അത് ഏകദേശം ഒന്നര ഗിഗാവാട്ടായി ഉയർന്നു. നിർമിതബുദ്ധി, ക്ലൗഡ് കംപ്യൂട്ടിങ്, ഉയർന്ന പ്രവർത്തനശേഷിയുള്ള കംപ്യൂട്ടിങ്, വലിയ തോതിൽ ഡാറ്റ ഉപയോഗിക്കുന്ന ഡിജിറ്റൽ ആപ്ലിക്കേഷനുകൾ എന്നിവയ്ക്കുള്ള ആവശ്യമാണ് ഈ വളർച്ചയ്ക്ക് പിന്നിൽ. നിർമിതബുദ്ധിയുടെയും ഡിജിറ്റൽ പരിവർത്തനത്തിന്റെയും വേഗം കൂടുമ്പോൾ രാജ്യത്തിന്റെ സാങ്കേതിക, സാമ്പത്തിക ലക്ഷ്യങ്ങൾക്ക് അടിത്തറയാകുന്ന നിർണായക അടിസ്ഥാനസൗകര്യങ്ങളായി ഡാറ്റാ സെന്ററുകൾ മാറുകയാണ്. അതേസമയം, ഇവയുടെ വലുപ്പം കൂടുന്നതോടെ വൈദ്യുതി, വെള്ളം, ഭൂമി, കണക്റ്റിവിറ്റി, പ്രാദേശിക അടിസ്ഥാനസൗകര്യങ്ങൾ എന്നിവയും വലിയ തോതിൽ ആവശ്യമായി വരും. അതുകൊണ്ട് നിക്ഷേപം ആകർഷിക്കുന്നതിൽ മാത്രം ശ്രദ്ധിച്ചാൽ പോരാ. ദീർഘകാലത്തേക്ക് ആവശ്യമായ സൗകര്യങ്ങളും വിഭവങ്ങളും ലഭിക്കുന്ന സ്ഥലങ്ങളിലാണ് പദ്ധതികൾ വരുന്നതെന്ന് ഉറപ്പാക്കണം. ഇന്ത്യയിലെ ഡാറ്റാ സെന്റർ അടിസ്ഥാനസൗകര്യങ്ങൾ ഉപയോഗിക്കുന്ന അർഹരായ വിദേശ ക്ലൗഡ് സേവനദാതാക്കൾക്ക് 2047 വരെ നികുതിയിളവ് നൽകുന്നതുൾപ്പെടെ നിക്ഷേപത്തിന് അനുകൂലമായ നടപടികൾ കേന്ദ്രസർക്കാർ സ്വീകരിച്ചിട്ടുണ്ട്. നിക്ഷേപത്തിന്റെ തോത് ഉയരുമ്പോൾ സംസ്ഥാനതലത്തിലുള്ള ഫലപ്രദമായ ആസൂത്രണവും മുന്നൊരുക്കവും മേഖലയുടെ സുസ്ഥിര വളർച്ചയ്ക്ക് നിർണായകമാകും.
നിക്ഷേപത്തിലൂടെ ഇന്ത്യൻ സാങ്കേതികശേഷിയും വളരണം
നീതി ആയോഗ് അംഗം പ്രൊഫസർ അഭയ് കരന്ദികർ, ചീഫ് എക്സിക്യൂട്ടീവ് ഓഫീസർ അനുരാഗ് ജെയിൻ, ഡിസ്റ്റിംഗ്വിഷ്ഡ് ഫെലോ ദേബ്ജാനി ഘോഷ് എന്നിവരുടെ സാന്നിധ്യത്തിലായിരുന്നു മാർഗരേഖയുടെ പ്രകാശനം. കേന്ദ്ര ഊർജ മന്ത്രാലയം, ഇലക്ട്രോണിക്സ്–വിവരസാങ്കേതിക മന്ത്രാലയം, വാണിജ്യ മന്ത്രാലയത്തിനു കീഴിലുള്ള വ്യവസായ പ്രോത്സാഹന–ആഭ്യന്തര വ്യാപാര വകുപ്പ് എന്നിവയുടെ പ്രതിനിധികളും വ്യവസായ, മാധ്യമ പ്രതിനിധികളും പങ്കെടുത്തു. ഡാറ്റാ സെന്റർ നിക്ഷേപങ്ങൾ ഇന്ത്യയുടെ സാങ്കേതികശേഷി വളർത്താനുള്ള അവസരമാക്കണമെന്ന് അഭയ് കരന്ദികർ പറഞ്ഞു. ആഭ്യന്തര ഗവേഷണവും വികസനവും ശക്തിപ്പെടുത്തണം. വ്യവസായ സ്ഥാപനങ്ങളും അക്കാദമിക സ്ഥാപനങ്ങളും തമ്മിലുള്ള സഹകരണം വർധിപ്പിക്കണം. ഡാറ്റാ സെന്റർ സാങ്കേതികവിദ്യയുടെ മൂല്യശൃംഖലയിലുടനീളം ഇന്ത്യൻ പങ്കാളിത്തം ഉറപ്പാക്കണമെന്നും അദ്ദേഹം ആവശ്യപ്പെട്ടു. നൂതന ശീതീകരണം, ഊർജകാര്യക്ഷമത, കുറഞ്ഞ വിഭവങ്ങൾ ഉപയോഗിച്ചുള്ള കംപ്യൂട്ടിങ് എന്നിവയിൽ പുതിയ പരിഹാരങ്ങൾ വികസിപ്പിക്കാൻ ഇന്ത്യക്ക് കഴിയുമെന്നും അദ്ദേഹം പറഞ്ഞു. ഇതിലൂടെ അടിസ്ഥാനസൗകര്യ നിക്ഷേപങ്ങളെ ദീർഘകാല സാമ്പത്തിക, സാങ്കേതിക നേട്ടങ്ങളാക്കി മാറ്റാനാകും.
സഹായം പ്രഖ്യാപിക്കുംമുമ്പ് സംസ്ഥാനങ്ങൾ കണക്കുകൂട്ടണം
നിക്ഷേപം ആകർഷിക്കുന്നതിനപ്പുറം നിക്ഷേപം സ്വീകരിക്കാനുള്ള സജ്ജതയിലേക്ക് സംസ്ഥാനങ്ങൾ നീങ്ങണമെന്ന് അനുരാഗ് ജെയിൻ പറഞ്ഞു. ഡാറ്റാ സെന്റർ പദ്ധതികൾക്ക് പിന്തുണ ഉറപ്പുനൽകുന്നതിനുമുമ്പ് അടിസ്ഥാനസൗകര്യങ്ങളുടെ ലഭ്യതയും ആവശ്യമായ വിഭവങ്ങളും സാമ്പത്തിക നേട്ടങ്ങളും വിലയിരുത്തണം. വിവരങ്ങൾ പരിശോധിച്ച് തീരുമാനമെടുക്കാനും തടസ്സങ്ങൾ മുൻകൂട്ടി മനസ്സിലാക്കാനും മാർഗരേഖ സഹായിക്കും. അധിക നിയന്ത്രണസംവിധാനം സൃഷ്ടിക്കാതെ പദ്ധതികൾ വേഗത്തിലും കൂടുതൽ പ്രവചനക്ഷമമായ രീതിയിലും നടപ്പാക്കാൻ ഇതിലൂടെ കഴിയുമെന്നും അദ്ദേഹം വ്യക്തമാക്കി. നിർമിതബുദ്ധി ആഗോള സമ്പദ്‌വ്യവസ്ഥയെ മാറ്റിമറിക്കുമ്പോൾ ഡാറ്റാ സെന്ററുകൾ തന്ത്രപ്രധാനമായ അടിസ്ഥാനസൗകര്യങ്ങളായി മാറുകയാണെന്ന് ദേബ്ജാനി ഘോഷ് പറഞ്ഞു. ഇന്ത്യയുടെ അവസരം നിക്ഷേപം ആകർഷിക്കുന്നതിൽ മാത്രം ഒതുങ്ങുന്നില്ല. മത്സരശേഷി ശക്തിപ്പെടുത്തുകയും നിലനിൽക്കുന്ന സാമ്പത്തിക മൂല്യം നൽകുകയും ചെയ്യുന്ന സുസ്ഥിര ശേഷി വളർത്തണം. അനുയോജ്യമായ സ്ഥലങ്ങൾ കണ്ടെത്താനും ആവശ്യം ഉയരുന്നതിനുമുമ്പ് അടിസ്ഥാനസൗകര്യങ്ങൾ ആസൂത്രണം ചെയ്യാനും ഓരോ നിക്ഷേപവും അളക്കാവുന്ന പൊതുനേട്ടം നൽകുന്നുവെന്ന് ഉറപ്പാക്കാനും മാർഗരേഖ സഹായിക്കുമെന്നും അവർ പറഞ്ഞു.
വൈദ്യുതി മുതൽ മാലിന്യസംസ്കരണം വരെ അഞ്ച് അടിസ്ഥാന മേഖലകൾ
വൈദ്യുതിയും ഊർജവും, വെള്ളവും ശീതീകരണവും, സ്ഥലനിർണയവും പരിസ്ഥിതി സുസ്ഥിരതയും, സാമ്പത്തികവും തന്ത്രപരവുമായ മൂല്യം, നയവും ഭരണനിർവഹണവും നടപ്പാക്കലും എന്നിങ്ങനെ അഞ്ച് അടിസ്ഥാന മേഖലകളിലാണ് മാർഗരേഖ തയ്യാറാക്കിയിരിക്കുന്നത്. വിഭവങ്ങളുടെ സുസ്ഥിര ഉപയോഗം ഉറപ്പാക്കാൻ വൈദ്യുതി ഗ്രിഡിന്റെ സജ്ജതയും ഗ്രിഡിൽനിന്ന് യഥാർഥത്തിൽ എടുക്കേണ്ടിവരുന്ന വൈദ്യുതിയുടെ അളവും വിലയിരുത്തണം. പുനരുപയോഗ ഊർജവും ഊർജസംഭരണ സംവിധാനങ്ങളുടെ പിന്തുണയുള്ള വൈദ്യുതിയും പ്രോത്സാഹിപ്പിക്കണം. നദീതടതലത്തിലെ ജലക്ഷാമസാധ്യതയും പൊതുജലവിതരണത്തെ പദ്ധതികൾ എങ്ങനെ ബാധിക്കുമെന്നതും പരിശോധിക്കണം. മഴവെള്ള സംഭരണം, പദ്ധതി സ്ഥലത്തുതന്നെയുള്ള ജലശുദ്ധീകരണം, ജലസംഭരണം എന്നിവയും ശുപാർശ ചെയ്യുന്നു. ഇലക്ട്രോണിക് മാലിന്യം, ബാറ്ററികൾ, മറ്റ് അപകടകരമായ മാലിന്യങ്ങൾ എന്നിവയുടെ മുഴുവൻ ജീവിതചക്രവും പരിഗണിച്ചുള്ള പരിപാലന–സംസ്കരണ പദ്ധതികളും വേണം.
ആനുകൂല്യങ്ങൾക്ക് അളക്കാവുന്ന നേട്ടങ്ങൾ വേണം
സാമ്പത്തിക നേട്ടം പരമാവധി ഉറപ്പാക്കാൻ അനുയോജ്യമായ ഡാറ്റാ സെന്റർ മേഖലകൾ കണ്ടെത്തണമെന്ന് മാർഗരേഖ നിർദേശിക്കുന്നു. ഉപഭോക്താക്കളുടെ സർവറുകളും അനുബന്ധ ഉപകരണങ്ങളും സ്ഥാപിക്കാൻ ഇടവും സൗകര്യവും നൽകുന്ന കൊലൊക്കേഷൻ സേവനങ്ങളെയും നേരിട്ട് കംപ്യൂട്ടിങ് സേവനങ്ങൾ നൽകുന്ന സംവിധാനങ്ങളെയും വേർതിരിച്ച് വിലയിരുത്തണം. സംസ്ഥാനങ്ങൾ നൽകുന്ന ആനുകൂല്യങ്ങൾ അളക്കാവുന്ന ഫലങ്ങളുമായി ബന്ധിപ്പിക്കണം. വിവരസാങ്കേതിക, വിവരസാങ്കേതികേതര അടിസ്ഥാനസൗകര്യങ്ങളിൽ മേക്ക് ഇൻ ഇന്ത്യ പ്രോത്സാഹിപ്പിക്കണം. സമയബന്ധിതമായ അനുമതികളും വ്യക്തമായ ഉത്തരവാദിത്വവും പദ്ധതിയിൽ നൽകിയ വാഗ്ദാനങ്ങൾ പാലിക്കുന്നുണ്ടോ എന്ന നിരീക്ഷണവും ഇതിന് പിന്തുണയാകണം. അടിസ്ഥാനസൗകര്യങ്ങളുടെ ലഭ്യത, പരിസ്ഥിതി സുസ്ഥിരത, സാമ്പത്തിക മൂല്യം, നടപ്പാക്കാനുള്ള സജ്ജത എന്നിവയുടെ അടിസ്ഥാനത്തിൽ നിക്ഷേപ നിർദേശങ്ങൾ വിലയിരുത്താനുള്ള തീരുമാനസഹായ സംവിധാനമായാണ് മാർഗരേഖ പ്രവർത്തിക്കുക. തടസ്സങ്ങൾ നേരത്തേ കണ്ടെത്താനും പദ്ധതികളുടെ ആവശ്യങ്ങളിൽ വ്യക്തത നൽകാനും ഇതിലൂടെ കഴിയും. നിക്ഷേപ തീരുമാനങ്ങൾ മെച്ചപ്പെടുത്താനും നടപ്പാക്കലിലെ അപകടസാധ്യത കുറയ്ക്കാനും ഇന്ത്യയിലെ ഡാറ്റാ സെന്റർ മേഖലയെ സുസ്ഥിരമായി വളർത്താനും ഇത് സഹായിക്കും. സംസ്ഥാനങ്ങൾക്ക് മെച്ചപ്പെട്ട ആസൂത്രണവും വേഗത്തിലുള്ള നടപടികളും സാധ്യമാക്കി അടുത്ത ഘട്ടത്തിലെ നിക്ഷേപങ്ങളെ സുസ്ഥിര ശേഷിയും ദീർഘകാല സാമ്പത്തിക നേട്ടവുമാക്കി മാറ്റുകയാണ് ലക്ഷ്യം.
.
