ന്യൂഡൽഹി  / 2026 / ഒക്ടോബർ 02 

ഗാന്ധിജയന്തിയുടെ തലേന്ന് ന്യൂഡൽഹിയിലെ വസന്ത് കുഞ്ചിലുള്ള ഇന്ത്യ ഇന്റർനാഷണൽ ആർബിട്രേഷൻ സെന്ററിൽ മരം നടൽ പരിപാടി സംഘടിപ്പിച്ചു. ഒക്ടോബർ ഒന്നിന് നടന്ന പരിപാടി ‘അമ്മയുടെ പേരിൽ ഒരു മരം’ എന്ന ആശയത്തിലായിരുന്നു. പ്രത്യേക ശുചീകരണ യജ്ഞത്തിന്റെ ആറാം ഘട്ടത്തിന്റെയും ‘ശുചിത്വം തന്നെ സേവനം’ പരിപാടിയുടെയും ഭാഗമായാണ് തൈകൾ നട്ടത്.

സ്വതന്ത്ര ചുമതലയുള്ള കേന്ദ്ര നിയമ–നീതി സഹമന്ത്രി അർജുൻ റാം മേഘ്‌വാൾ പരിപാടിക്ക് നേതൃത്വം നൽകി. നിയമകാര്യ വകുപ്പ് സംഘടിപ്പിച്ച ചടങ്ങിൽ വകുപ്പ് സെക്രട്ടറിയും കേന്ദ്രത്തിന്റെ ചെയർപേഴ്‌സണുമായ ഡോ. രാജീവ് മണിയും മുതിർന്ന ഉദ്യോഗസ്ഥരും പങ്കെടുത്തു. പരിസ്ഥിതി സംരക്ഷണവും ശുചിത്വവും പ്രോത്സാഹിപ്പിക്കാനായി മന്ത്രിയും ഉദ്യോഗസ്ഥരും കേന്ദ്രത്തിന്റെ വളപ്പിൽ തൈകൾ നട്ടു.

ശുചിത്വവും അച്ചടക്കവും സേവനവും ഗാന്ധിജിയുടെ സ്വതന്ത്ര ഇന്ത്യയെക്കുറിച്ചുള്ള കാഴ്ചപ്പാടിന്റെ ഭാഗമായിരുന്നുവെന്ന് മന്ത്രി പറഞ്ഞു. 1917ൽ ചമ്പാരനിൽ ഗാന്ധിജി നടത്തിയ ശുചിത്വ പ്രവർത്തനങ്ങളും അദ്ദേഹം ഓർമിപ്പിച്ചു. ശുചീകരണ പ്രവർത്തനങ്ങൾ തുടർന്നുകൊണ്ടുപോകാനും കൂടുതൽ ഹരിതാഭമായ അന്തരീക്ഷം ഒരുക്കാനുമുള്ള പ്രതിജ്ഞയോടെയാണ് പരിപാടി അവസാനിച്ചത്.

തെരുവുകൾക്കൊപ്പം മനസ്സും ശുദ്ധമാകണം

തെരുവുകളും പൊതുസ്ഥലങ്ങളും വൃത്തിയാക്കുന്നതിൽ മാത്രം ശുചിത്വം ഒതുങ്ങുന്നില്ലെന്ന് മേഘ്‌വാൾ പറഞ്ഞു. ശുദ്ധമായ മനസ്സും ചിന്തകളും സമൂഹത്തോടുള്ള കടമബോധവും അതിന്റെ ഭാഗമാണ്. ഓരോ വ്യക്തിക്കും പങ്കുവഹിക്കാനുള്ള ജനകീയ മുന്നേറ്റമാണ് ‘ശുചിത്വം തന്നെ സേവനം’ എന്നും അദ്ദേഹം വ്യക്തമാക്കി.

ചമ്പാരന്റെ പാഠം ഇന്നും പ്രസക്തം

ചമ്പാരനിൽ ഗാന്ധിജി തുടങ്ങിയ ശുചിത്വ പ്രവർത്തനങ്ങൾ പിന്നീട് വലിയ ജനകീയ മുന്നേറ്റത്തിന്റെ ഭാഗമായി. നീലം കൃഷി ചെയ്തിരുന്ന കർഷകരുടെ പ്രശ്നങ്ങൾ പരിഹരിക്കാനുള്ള ശ്രമങ്ങൾക്കും ഇത് സഹായമായെന്ന് മന്ത്രി പറഞ്ഞു. ശുചിത്വം സഹാനുഭൂതിയുടെയും കൂട്ടുത്തരവാദിത്തത്തിന്റെയും ദൗത്യമാണെന്ന പാഠം ഇന്നും പ്രസക്തമാണെന്നും അദ്ദേഹം കൂട്ടിച്ചേർത്തു.

ചുറ്റുപാടും മനസ്സും ഒരുപോലെ വൃത്തിയാകണം

ചുറ്റുപാടിന്റെ ശുചിത്വവും മനസ്സിന്റെ ശുചിത്വവും പരസ്പരം ബന്ധപ്പെട്ടിരിക്കുന്നുവെന്ന് ഡോ. രാജീവ് മണി പറഞ്ഞു. ഒന്നില്ലാതെ മറ്റൊന്ന് പൂർണമാകില്ല. പരിസ്ഥിതിക്ക് അനുയോജ്യമായ രീതികൾ സ്വീകരിക്കാനും സ്വച്ഛ് ഭാരത് ദൗത്യത്തിൽ പങ്കാളികളാകാനും സ്ഥാപനങ്ങൾക്ക് ഉത്തരവാദിത്തമുണ്ടെന്നും അദ്ദേഹം വ്യക്തമാക്കി.

വിശ്വസനീയമായ തർക്കപരിഹാര കേന്ദ്രമാകണം

കൂട്ടായ പ്രവർത്തനത്തിലൂടെ കേന്ദ്രത്തെ കാര്യക്ഷമവും വിശ്വസനീയവുമായ ആഗോള ആർബിട്രേഷൻ സ്ഥാപനമാക്കി വളർത്താനാകുമെന്ന് മന്ത്രി പറഞ്ഞു. സുതാര്യതയും അച്ചടക്കവും സേവനബോധവും പ്രവർത്തനങ്ങളിൽ പ്രതിഫലിക്കണം. പരിസ്ഥിതി സംരക്ഷണത്തിനും സുസ്ഥിര പ്രവർത്തനങ്ങൾക്കും കേന്ദ്രം പ്രതിബദ്ധമാണെന്ന് ചീഫ് എക്സിക്യൂട്ടീവ് ഓഫീസർ നവീൻ കുമാർ സിങ് അറിയിച്ചു.