ബ്രസൽസ്, 2026 സെപ്റ്റംബർ 8 –

യൂറോപ്പിൽ യുവാക്കളെ ഓൺലൈൻ വഴി അക്രമത്തിലേക്ക് ആകർഷിക്കുന്ന പുതിയൊരു ഭീഷണി വളരുന്നതായി യൂറോപ്യൻ യൂണിയന്റെ മുന്നറിയിപ്പ്. പ്രത്യേക രാഷ്ട്രീയമോ മതപരമോ ആയ ആശയത്തെ പിന്തുടരാതെ, അക്രമത്തോടുള്ള താൽപര്യവും ഓൺലൈൻ ലോകത്ത് ശ്രദ്ധ നേടാനുള്ള ആഗ്രഹവുമാണ് ഇതിന് പിന്നിലെന്ന് അധികൃതർ പറയുന്നു. ‘നിഹിലിസ്റ്റിക് വയലന്റ് എക്സ്ട്രീമിസം’ എന്നാണ് ഈ പ്രവണതയെ വിശേഷിപ്പിക്കുന്നത്. ഒമ്പത് യൂറോപ്യൻ രാജ്യങ്ങളിലെ അന്വേഷണ ഉദ്യോഗസ്ഥർ ജൂൺ, ജൂലൈ മാസങ്ങളിൽ നടത്തിയ പരിശോധനയിൽ ‘ദി കോം’ എന്ന ഓൺലൈൻ സമൂഹവുമായി ബന്ധമുള്ള ഏകദേശം 4,340 വെബ് വിലാസങ്ങൾ കണ്ടെത്തി.

അക്രമം തന്നെ ലക്ഷ്യമാകുന്നു

യൂറോപ്യൻ യൂണിയൻ ഭീകരവിരുദ്ധ കോ-ഓർഡിനേറ്റർ ബാർട്ട്യാൻ വെഗ്റ്റർ പറയുന്നത്, ആശയപ്രചാരണത്തേക്കാൾ അക്രമം തന്നെ ലക്ഷ്യമാക്കുന്ന രീതിയാണ് ഇപ്പോൾ കാണുന്നതെന്നാണ്. ഓൺലൈൻ കൂട്ടായ്മകളിൽ അംഗീകാരവും പ്രശസ്തിയും നേടാൻ യുവാക്കൾ അക്രമത്തിലേക്ക് തിരിയുന്നു. കഴിഞ്ഞ രണ്ടുമൂന്ന് വർഷമായി ഇത്തരം സംഭവങ്ങൾ വർധിക്കുകയാണെന്നും യുവാക്കളും പ്രത്യേകിച്ച് ആൺകുട്ടികളുമാണ് ഈ ശൃംഖലകളിൽ കൂടുതലായി എത്തുന്നതെന്നും അദ്ദേഹം പറയുന്നു.

ഓൺലൈൻ ബന്ധം യഥാർഥ അക്രമത്തിലേക്ക്

2025ൽ ഫിൻലൻഡിൽ 16 വയസ്സുകാരൻ മൂന്ന് വിദ്യാർഥിനികളെ കുത്തിപ്പരിക്കേൽപ്പിച്ച സംഭവം ഇതിന് ഉദാഹരണമായി ചൂണ്ടിക്കാട്ടുന്നു. ആക്രമണം ഇയാൾ സ്നാപ്ചാറ്റിൽ പകർത്തുകയും സമൂഹമാധ്യമങ്ങളിൽ പങ്കുവയ്ക്കാൻ ശ്രമിക്കുകയും ചെയ്തിരുന്നു. രാഷ്ട്രീയ ലക്ഷ്യമൊന്നും കണ്ടെത്തിയില്ല. ഇറ്റലിയിലും ഓൺലൈനിൽ പ്രശസ്തനാകാനായി കൊലപാതകം ആസൂത്രണം ചെയ്ത 15 വയസ്സുകാരനെക്കുറിച്ച് അധികൃതർ റിപ്പോർട്ട് ചെയ്തിട്ടുണ്ട്. ഇത്തരം ഓൺലൈൻ ബന്ധങ്ങൾ ഒടുവിൽ യഥാർഥ ലോകത്തിലെ കുത്തേറ്റങ്ങളും മറ്റ് അക്രമങ്ങളും ആയി മാറുന്നതാണ് ആശങ്ക.

കണ്ടെത്താൻ പൊലീസിന് വെല്ലുവിളി

ഇത്തരം ആക്രമണങ്ങൾ മുൻകൂട്ടി കണ്ടെത്തുന്നതും തടയുന്നതും എളുപ്പമല്ല. പല യുവാക്കൾക്കും മുൻ ക്രിമിനൽ പശ്ചാത്തലമുണ്ടാകില്ല. അവരുടെ പ്രവർത്തനത്തിന്റെ സൂചനകൾ ഓൺലൈനിൽ മാത്രമായിരിക്കും. അതും പലപ്പോഴും എൻക്രിപ്റ്റ് ചെയ്ത ഓൺലൈൻ കൂട്ടായ്മകൾക്കുള്ളിലായിരിക്കും. ‘764’ എന്ന ശൃംഖലയും അധികൃതരുടെ നിരീക്ഷണത്തിലാണ്. അതിന്റെ സ്ഥാപകൻ ബ്രാഡ്‌ലി കാഡൻഹെഡ് ജയിലിലാണെങ്കിലും ശൃംഖല ഇപ്പോഴും പ്രവർത്തിക്കുന്നുണ്ടെന്നാണ് റിപ്പോർട്ട്.

ഭീകരാക്രമണങ്ങളിൽ യുവാക്കളുടെ സാന്നിധ്യം

കഴിഞ്ഞ വർഷം യൂറോപ്യൻ യൂണിയനിലെ 27 രാജ്യങ്ങളിൽ പത്ത് രാജ്യങ്ങളിലായി 45 ഭീകരാക്രമണങ്ങളാണ് റിപ്പോർട്ട് ചെയ്തത്. ഇതിൽ ആറ് പേർ കൊല്ലപ്പെട്ടു. ഭീകരബന്ധം സംശയിച്ച് 21 രാജ്യങ്ങളിൽ 486 പേരെ അറസ്റ്റ് ചെയ്തു. അറസ്റ്റിലായവരിൽ ഏകദേശം മൂന്നിലൊന്ന് 18 വയസ്സിന് താഴെയുള്ളവരായിരുന്നു. 24 ആക്രമണങ്ങൾക്ക് പിന്നിൽ ജിഹാദി സംഘങ്ങളായിരുന്നെന്നും യൂറോപോൾ കണക്കുകൾ വ്യക്തമാക്കുന്നു.

എഐയും പുതിയ വെല്ലുവിളി

25 വർഷം മുമ്പുണ്ടായിരുന്ന ഭീകരഭീഷണിയിൽ നിന്ന് വ്യത്യസ്തമായി ഇപ്പോഴത്തെ ഭീഷണിയുടെ വലിയൊരു ഭാഗം ഓൺലൈനിലാണ് രൂപപ്പെടുന്നതെന്ന് അധികൃതർ പറയുന്നു. അന്വേഷണങ്ങളിൽ 85 ശതമാനവും ഡിജിറ്റൽ മേഖലയിലാണ് നടക്കുന്നതെന്ന് വെഗ്റ്റർ വ്യക്തമാക്കി. ഡീപ്ഫേക്കുകൾ, മീമുകൾ, ജിഫുകൾ, എഐ ബോട്ടുകൾ എന്നിവ പ്രചാരണത്തിനും ആളുകളെ ആകർഷിക്കാനും ഉപയോഗിക്കുന്നതായി യൂറോപോൾ പറയുന്നു. ആക്രമണത്തിനുള്ള വിവരശേഖരണത്തിനും എഐ സംവിധാനങ്ങൾ ഉപയോഗിക്കുന്നുണ്ട്. അതിനാൽ സ്വകാര്യത സംരക്ഷിക്കുന്നതിനൊപ്പം ഡിജിറ്റൽ അന്വേഷണ ശേഷിയും ശക്തമാക്കണമെന്നാണ് യൂറോപ്യൻ അധികൃതരുടെ നിലപാട്.