റബാത്ത് (മൊറോക്കോ) / 2026 / ഓഗസ്റ്റ് 24
ഇന്ത്യയും മൊറോക്കോയും തമ്മിലുള്ള വ്യാപാരം, നിക്ഷേപം, സാമ്പത്തിക സഹകരണം എന്നിവ കൂടുതൽ ശക്തമാക്കാൻ കേന്ദ്ര വാണിജ്യ-വ്യവസായ, ഇലക്ട്രോണിക്സ്-വിവരസാങ്കേതിക സഹമന്ത്രി ജിതിൻ പ്രസാദ മൊറോക്കോയിൽ ഔദ്യോഗിക സന്ദർശനം നടത്തുന്നു. ഓഗസ്റ്റ് 24 മുതൽ 25 വരെയാണ് സന്ദർശനം. വ്യാപാര ഉൽപ്പന്നങ്ങളുടെ വൈവിധ്യം വർധിപ്പിക്കുന്നതും വിപണി പ്രവേശനത്തിന് കൂടുതൽ അവസരങ്ങൾ ഒരുക്കുന്നതും ഇരുരാജ്യങ്ങളും ചർച്ച ചെയ്യും. ഇന്ത്യ–മൊറോക്കോ സംയുക്ത കമ്മീഷന്റെ ഏഴാമത് യോഗത്തിലും ജിതിൻ പ്രസാദ പങ്കെടുക്കും.
സംയുക്ത കമ്മീഷൻ യോഗത്തിന് സഹ അധ്യക്ഷൻ
മൊറോക്കോ വ്യവസായ-വാണിജ്യ മന്ത്രാലയത്തിലെ വിദേശ വ്യാപാര ചുമതലയുള്ള സ്റ്റേറ്റ് സെക്രട്ടറി ഒമർ ഹെജിറയ്ക്കൊപ്പം ജിതിൻ പ്രസാദ സംയുക്ത കമ്മീഷൻ യോഗത്തിന് സഹ അധ്യക്ഷനാകും. നിലവിലുള്ള സാമ്പത്തിക, വാണിജ്യ സഹകരണ മേഖലകൾ യോഗം വിലയിരുത്തും. ഇരുരാജ്യങ്ങൾക്കും ഗുണകരമായ സഹകരണം കൂടുതൽ വിപുലമാക്കുന്നതിനുള്ള നടപടികളും ചർച്ച ചെയ്യും.
വ്യാപാരവും വിപണി പ്രവേശനവും, വളം ഉൽപ്പാദനവും വിതരണവും, നിക്ഷേപം, വ്യവസായ സഹകരണം, കസ്റ്റംസ്, കൃഷി, ഭക്ഷ്യസുരക്ഷ, ഔഷധ-ആരോഗ്യ മേഖല, ഊർജം, ഖനനം എന്നിവ ചർച്ചയിൽ ഉൾപ്പെടും. പുനരുപയോഗ ഊർജം, ഡിജിറ്റൽ പരിവർത്തനം, ഗതാഗതം, ചരക്കുനീക്കം, ആയുഷ്, വിനോദസഞ്ചാരം, വിദ്യാഭ്യാസം, നൈപുണ്യ വികസനം തുടങ്ങിയ മേഖലകളിലെ സഹകരണവും പരിഗണിക്കും.
ഭക്ഷ്യസുരക്ഷയിൽ ധാരണാപത്രത്തിന് നീക്കം
മൊറോക്കോയിലെ ദേശീയ ഭക്ഷ്യസുരക്ഷാ ഓഫീസും ഇന്ത്യയുടെ ഭക്ഷ്യസുരക്ഷാ നിലവാര അതോറിറ്റിയും തമ്മിൽ ഭക്ഷ്യസുരക്ഷാ സഹകരണത്തിനുള്ള ധാരണാപത്രം ഒപ്പിടുമെന്നാണ് പ്രതീക്ഷ. ഇറക്കുമതി ചെയ്യുന്ന ഭക്ഷ്യവസ്തുക്കളുടെ സുരക്ഷയും ഗുണനിലവാരവും സംബന്ധിച്ച വിവരങ്ങൾ കൈമാറാൻ ഇതിലൂടെ സൗകര്യമൊരുങ്ങും.
ഭക്ഷ്യപരിശോധനാ ലബോറട്ടറികൾ, വിശകലന രീതികൾ എന്നിവ സംബന്ധിച്ച വിവരങ്ങൾ പങ്കിടുന്നതിനും പരസ്പര താൽപര്യമുള്ള മേഖലകളിൽ വൈദഗ്ധ്യം കൈമാറുന്നതിനും ധാരണാപത്രം സഹായിക്കും. ഇറക്കുമതി നടപടിക്രമങ്ങൾ, ഗുണനിലവാര പരിശോധന, സാമ്പിൾ ശേഖരണം, പരിശോധന, പാക്കേജിങ്, ലേബലിങ് തുടങ്ങിയ വിഷയങ്ങളിലെ സാങ്കേതിക വിവര കൈമാറ്റത്തിനും ഇത് വഴിയൊരുക്കും.
2026–2030 സാംസ്കാരിക വിനിമയ പരിപാടി
2026 മുതൽ 2030 വരെയുള്ള ഇന്ത്യ–മൊറോക്കോ സാംസ്കാരിക വിനിമയ പരിപാടിയും സംയുക്ത കമ്മീഷൻ യോഗത്തിൽ ഒപ്പിടുമെന്നാണ് പ്രതീക്ഷ. കലാകാരന്മാരുടെയും വിവിധ മേഖലകളിലെ വിദഗ്ധരുടെയും പരസ്പര സന്ദർശനം, ഉത്സവങ്ങളിലും പ്രദർശനങ്ങളിലും പങ്കാളിത്തം എന്നിവ ഇതിലൂടെ പ്രോത്സാഹിപ്പിക്കും.
പൈതൃക സംരക്ഷണത്തിലെ സഹകരണവും ശക്തമാക്കും. മ്യൂസിയങ്ങൾ, ലൈബ്രറികൾ, രേഖാശേഖര സ്ഥാപനങ്ങൾ എന്നിവ തമ്മിലുള്ള ബന്ധം കൂടുതൽ വിപുലപ്പെടുത്താനും പരിപാടി ലക്ഷ്യമിടുന്നു.
ഉഭയകക്ഷി വ്യാപാരം 400 കോടി ഡോളറിലെത്തി
ഇന്ത്യയും മൊറോക്കോയും തമ്മിൽ ദീർഘകാലമായുള്ള അടുത്ത ബന്ധമാണുള്ളത്. വ്യാപാരവും നിക്ഷേപവും ഇനിയും വിപുലപ്പെടുത്താൻ വലിയ സാധ്യതയുണ്ടെന്നാണ് വിലയിരുത്തൽ. 2025ൽ ഇരുരാജ്യങ്ങളും തമ്മിലുള്ള ചരക്കുവ്യാപാരം ഏകദേശം 400 കോടി അമേരിക്കൻ ഡോളറിലെത്തി.
ശുദ്ധീകരിച്ച പെട്രോളിയം ഉൽപ്പന്നങ്ങൾ, ഔഷധങ്ങൾ, വാഹനങ്ങൾ, കൃത്രിമ നൂൽവസ്ത്രങ്ങൾ, ഭക്ഷ്യ ഉൽപ്പന്നങ്ങൾ, സുഗന്ധവ്യഞ്ജനങ്ങൾ എന്നിവയാണ് ഇന്ത്യ പ്രധാനമായും മൊറോക്കോയിലേക്ക് കയറ്റുമതി ചെയ്യുന്നത്. ഫോസ്ഫേറ്റുകളും വളങ്ങളുമാണ് മൊറോക്കോയിൽ നിന്ന് ഇന്ത്യയിലേക്കുള്ള പ്രധാന കയറ്റുമതി.
വ്യാപാര-നിക്ഷേപ അവസരങ്ങൾ തേടി കൂടിക്കാഴ്ചകൾ
സന്ദർശനത്തിന്റെ ഭാഗമായി മൊറോക്കോയിലെ മുതിർന്ന നേതാക്കളുമായി ജിതിൻ പ്രസാദ ഉഭയകക്ഷി, ഉന്നതതല കൂടിക്കാഴ്ചകൾ നടത്തും. ഇന്ത്യ–മൊറോക്കോ സംയുക്ത ബിസിനസ് ഫോറത്തിലും അദ്ദേഹം പങ്കെടുക്കും. വ്യാപാരം, നിക്ഷേപം, പങ്കാളിത്തം, സംയുക്ത സംരംഭങ്ങൾ എന്നിവയിൽ പുതിയ അവസരങ്ങൾ കണ്ടെത്താൻ വ്യവസായ സമൂഹവുമായി ചർച്ച നടത്തും. റബാത്തിലെ വ്യവസായ പ്രമുഖരുമായും മന്ത്രി കൂടിക്കാഴ്ച നടത്തും.
2027ൽ ഇന്ത്യയും മൊറോക്കോയും നയതന്ത്രബന്ധം സ്ഥാപിച്ചതിന്റെ 70-ാം വാർഷികം ആചരിക്കാനിരിക്കുകയാണ്. അതിനാൽ ഈ സന്ദർശനത്തിന് കൂടുതൽ പ്രാധാന്യമുണ്ട്. ഇരുരാജ്യങ്ങളും തമ്മിലുള്ള ദീർഘകാല പങ്കാളിത്തം കൂടുതൽ ആഴത്തിലാക്കാനും സാമ്പത്തിക സഹകരണത്തിനുള്ള സ്ഥാപനപരമായ സംവിധാനം ശക്തിപ്പെടുത്താനും സന്ദർശനം സഹായിക്കുമെന്നാണ് പ്രതീക്ഷ. ഉഭയകക്ഷി വ്യാപാരം, നിക്ഷേപം, വ്യവസായ പങ്കാളിത്തം, വ്യവസായ സ്ഥാപനങ്ങൾ തമ്മിലുള്ള നേരിട്ടുള്ള സഹകരണം എന്നിവയ്ക്കും പുതിയ ഊർജം നൽകുകയാണ് ലക്ഷ്യം.
