കൃഷിക്കും ഗ്രാമവികസനത്തിനും പുതിയ റോഡ്‌മാപ്പ്; പൂസയിൽ ‘സപ്ത ധാര ഓഫ് ശക്തി’ പ്രതിജ്ഞയ്ക്ക് ശിവരാജ് സിങ് ചൗഹാൻ നേതൃത്വം നൽകും

ന്യൂഡൽഹി / 2026 / ഓഗസ്റ്റ് 17

കേന്ദ്ര കൃഷി-കർഷകക്ഷേമ, ഗ്രാമവികസന മന്ത്രി ശിവരാജ് സിങ് ചൗഹാൻ ഓഗസ്റ്റ് 18ന് ന്യൂഡൽഹിയിലെ പൂസ ക്യാമ്പസിൽ ഇരു മന്ത്രാലയങ്ങളിലെയും ഉദ്യോഗസ്ഥർക്ക് ‘സപ്ത ധാര ഓഫ് ശക്തി’ പ്രതിജ്ഞ ചൊല്ലിക്കൊടുക്കും. ഓഗസ്റ്റ് 15ലെ സ്വാതന്ത്ര്യദിന പ്രസംഗത്തിൽ പ്രധാനമന്ത്രി നരേന്ദ്ര മോദി മുന്നോട്ടുവച്ച ആശയങ്ങളുടെ അടിസ്ഥാനത്തിലാണ് പരിപാടി. കൃഷിയും ഗ്രാമവികസനവും 2047ലെ വികസിത ഭാരത ലക്ഷ്യത്തിലേക്ക് എങ്ങനെ മുന്നോട്ടുകൊണ്ടുപോകണം എന്നതിനുള്ള പ്രവർത്തനപദ്ധതി യോഗത്തിൽ ചർച്ച ചെയ്യും.

വികസിത ഭാരതത്തിനായി വകുപ്പുകളുടെ പ്രവർത്തനപദ്ധതി

വിവിധ വകുപ്പുകളുടെ റോഡ്‌മാപ്പ്, ലഖ്പതി ദീദി പദ്ധതിയുടെ വിപുലീകരണം, കർഷകരുടെയും ഗ്രാമീണ സമൂഹങ്ങളുടെയും താൽപര്യവുമായി ബന്ധപ്പെട്ട പ്രധാന തീരുമാനങ്ങൾ എന്നിവയാണ് പരിപാടിയുടെ പ്രധാന വിഷയങ്ങൾ. 2047ലെ വികസിത ഭാരതം എന്ന ലക്ഷ്യം കൃഷി-ഗ്രാമവികസന മേഖലകളിൽ വ്യക്തമായ പ്രവർത്തനപദ്ധതിയാക്കുകയാണ് യോഗത്തിന്റെ ലക്ഷ്യം. പുരോഗമന കർഷകർ, ലഖ്പതി ദീദിമാർ, കാർഷിക കയറ്റുമതിക്കാർ, ഭക്ഷ്യസംസ്കരണ മേഖലയിലെ പ്രതിനിധികൾ എന്നിവരും പരിപാടിയിൽ പങ്കെടുക്കും.

ജനകേന്ദ്രിത പദ്ധതികളിലൂടെ ലക്ഷ്യം നടപ്പാക്കും

പ്രധാനമന്ത്രി മുന്നോട്ടുവച്ച ‘സപ്ത ധാര ഓഫ് ശക്തി’ കൃഷിക്കും ഗ്രാമീണ ഇന്ത്യയ്ക്കും പ്രധാന ദിശാബോധം നൽകുന്നതാണെന്ന് ശിവരാജ് സിങ് ചൗഹാൻ പറഞ്ഞു. ജനകേന്ദ്രിത പദ്ധതികൾ, സുതാര്യമായ നിരീക്ഷണം, ഫലപ്രദമായ നടപ്പാക്കൽ എന്നിവയിലൂടെ ഈ ആശയം പ്രവൃത്തിയിലാക്കുമെന്നും അദ്ദേഹം വ്യക്തമാക്കി. കർഷകർക്കും ഗ്രാമീണ സ്ത്രീകൾക്കും നേരിട്ട് പ്രയോജനം ലഭിക്കണം. അതോടൊപ്പം 2047ലെ വികസിത ഭാരത ലക്ഷ്യത്തിലേക്ക് ശ്രമങ്ങൾ സംഭാവന ചെയ്യണമെന്നും ചൗഹാൻ പറഞ്ഞു. വകുപ്പുകളുടെ റോഡ്‌മാപ്പ് പരിശോധിച്ച് നടപ്പാക്കൽ വേഗത്തിലാക്കുമെന്നും അദ്ദേഹം അറിയിച്ചു.

കൃഷി മുതൽ ആഗോള വിപണി വരെ മുൻഗണന

ചെങ്കോട്ടയിലെ സ്വാതന്ത്ര്യദിന പ്രസംഗത്തിൽ പ്രധാനമന്ത്രി നരേന്ദ്ര മോദി വിശദീകരിച്ച ‘സപ്ത ധാര ഓഫ് ശക്തി’യിൽ കൃഷിയും ഭക്ഷ്യോൽപാദനവും ശക്തിപ്പെടുത്തൽ, ഭക്ഷ്യസംസ്കരണം പ്രോത്സാഹിപ്പിക്കൽ, ആഗോള വിപണികളിലേക്കുള്ള പ്രവേശനം വർധിപ്പിക്കൽ എന്നിവ പ്രധാന മുൻഗണനകളാണ്. ആഗോള പ്രതിസന്ധികളും അനിശ്ചിതത്വങ്ങളും നിലനിൽക്കുമ്പോഴും കർഷകർക്ക് സബ്സിഡി നിരക്കിൽ വളം ലഭ്യമാക്കാനുള്ള സർക്കാരിന്റെ പ്രതിബദ്ധതയും പ്രധാനമന്ത്രി ആവർത്തിച്ചു. കൃഷി, സമുദ്രോൽപന്നങ്ങൾ, കടൽഭക്ഷ്യ ഉൽപന്നങ്ങൾ എന്നിവയ്ക്ക് പുതിയ ആഗോള വിപണികളും അവസരങ്ങളും കണ്ടെത്തേണ്ടതുണ്ടെന്നും അദ്ദേഹം ചൂണ്ടിക്കാട്ടി. സ്വയംപര്യാപ്തതയ്ക്കും പദ്ധതിയിൽ പ്രധാന സ്ഥാനമുണ്ട്. വളം, ഇന്ധനം പോലുള്ള അത്യാവശ്യ മേഖലകളിൽ ഇന്ത്യ സുരക്ഷിതവും സ്വയംപര്യാപ്തവുമാകാൻ കഴിഞ്ഞ പത്ത് വർഷമായി ദീർഘകാല നടപടികൾ സ്വീകരിച്ചിട്ടുണ്ടെന്നും പ്രധാനമന്ത്രി പറഞ്ഞു.

മൂന്ന് കോടിയിൽ നിന്ന് ആറുകോടി ലഖ്പതി ദീദിമാരിലേക്ക്

ഗ്രാമവികസന മന്ത്രാലയത്തിന്റെ ലഖ്പതി ദീദി പദ്ധതിയുടെ വിപുലീകരണം ഓഗസ്റ്റ് 18ലെ യോഗത്തിലെ പ്രധാന ചർച്ചാവിഷയമായിരിക്കും. ഇതിനകം മൂന്ന് കോടി ഗ്രാമീണ സ്ത്രീകൾ ലഖ്പതി ദീദിമാരായി മാറിയിട്ടുണ്ട്. ഈ എണ്ണം ആറുകോടിയാക്കാനാണ് പ്രധാനമന്ത്രി പുതിയ ലക്ഷ്യം നിശ്ചയിച്ചിരിക്കുന്നത്. പദ്ധതി കൂടുതൽ വ്യാപിപ്പിക്കാനും ഈ ലക്ഷ്യം കൈവരിക്കാനുമുള്ള നടപ്പാക്കൽ റോഡ്‌മാപ്പ് ശിവരാജ് സിങ് ചൗഹാൻ ചർച്ച ചെയ്യും. സ്വയംസഹായ സംഘങ്ങളുമായി ബന്ധപ്പെട്ട സ്ത്രീകൾക്ക് തൊഴിൽകഴിവ് വികസനവും സാമ്പത്തിക സഹായവും നൽകുന്നുണ്ട്. അവരുടെ ഉപജീവനം ശക്തിപ്പെടുത്തുകയും വരുമാനം വർധിപ്പിക്കുകയും ചെയ്യുകയാണ് ലക്ഷ്യം. സ്ത്രീശാക്തീകരണവും സാമ്പത്തിക സ്വാതന്ത്ര്യവും ഗ്രാമവികസനത്തോടുള്ള സർക്കാരിന്റെ സമീപനത്തിലെ പ്രധാന ഘടകങ്ങളാണ്. സ്ത്രീകളുടെ കഴിവുകൾ അംഗീകരിക്കാനും ബഹുമാനിക്കാനും സാമ്പത്തിക വികസനത്തിൽ അവരുടെ പങ്കാളിത്തം വർധിപ്പിക്കാനും ജനങ്ങളോട് പ്രധാനമന്ത്രി ആവശ്യപ്പെട്ടിട്ടുണ്ട്.

ഗ്രാമീണ വനിതാ സംരംഭങ്ങൾക്ക് കൂടുതൽ വിപണി

സ്ത്രീകൾ നയിക്കുന്ന സംരംഭങ്ങൾക്ക് വിപണി ലഭ്യത ശക്തിപ്പെടുത്താൻ ‘ഷീ മാർട്ട്’ പോലുള്ള പദ്ധതികൾ കേന്ദ്ര ബജറ്റിൽ ഉൾപ്പെടുത്തിയിട്ടുണ്ട്. സ്ത്രീകളുടെ ഉൽപന്നങ്ങൾക്ക് മികച്ച വിപണി കണ്ടെത്താനും ഗ്രാമീണ സംരംഭങ്ങളെ കൂടുതൽ ശക്തമാക്കാനും ഇവ ലക്ഷ്യമിടുന്നു. ‘ഷീ മാർട്ട്’ പദ്ധതികളും ബ്രാൻഡിങ് പ്രവർത്തനങ്ങളും വഴി യോഗ, ആയുർവേദം, കരകൗശലം തുടങ്ങിയ ഗ്രാമീണ സംരംഭങ്ങളുമായി ബന്ധപ്പെട്ട ഉൽപന്നങ്ങൾക്ക് രാജ്യത്തിനകത്തും ആഗോളതലത്തിലും കൂടുതൽ വിപണി ലഭ്യമാക്കും. സ്ത്രീകൾ നിർമ്മിക്കുന്ന ഉൽപന്നങ്ങൾക്ക് ശക്തമായ വിപണി അവസരങ്ങൾ സൃഷ്ടിക്കുന്നത് സ്ത്രീകൾ നയിക്കുന്ന ഗ്രാമവികസനത്തിന്റെ അടുത്ത ഘട്ടത്തിലും പ്രധാന മുൻഗണനയായിരിക്കും.