തമിഴ്നാട് കേന്ദ്ര സർവകലാശാലയുടെ പതിനൊന്നാം ബിരുദദാനച്ചടങ്ങിൽ ഉപരാഷ്ട്രപതി

തിരുവാരൂർ (തമിഴ്നാട്) /  2026 / ഓഗസ്റ്റ് 17

തമിഴ്നാട് കേന്ദ്ര സർവകലാശാലയുടെ പതിനൊന്നാം ബിരുദദാനച്ചടങ്ങിൽ ഉപരാഷ്ട്രപതി സി. പി. രാധാകൃഷ്ണൻ പങ്കെടുത്തു. തിരുവാരൂരിൽ ഓഗസ്റ്റ് 17-ന് നടന്ന ചടങ്ങിൽ ബിരുദം നേടിയ വിദ്യാർഥികളെ അദ്ദേഹം അഭിനന്ദിച്ചു. അറിവ് മാത്രം പോരെന്നും ജീവിതകാലം മുഴുവൻ പഠിക്കാനുള്ള മനസ്സ്, പുതുമ കണ്ടെത്താനുള്ള കഴിവ്, മാറ്റങ്ങളോട് പൊരുത്തപ്പെടാനുള്ള ശേഷി എന്നിവ ഭാവിക്ക് അനിവാര്യമാണെന്നും അദ്ദേഹം പറഞ്ഞു. പരീക്ഷയും മാർക്കും മാത്രമല്ല വിദ്യാഭ്യാസത്തിന്റെ അളവുകോൽ. സ്വതന്ത്രചിന്തയും സർഗാത്മകതയും സാമൂഹിക ഉത്തരവാദിത്വവും വളർത്തുന്നതാകണം വിദ്യാഭ്യാസമെന്നും അദ്ദേഹം വ്യക്തമാക്കി. പൊതുപരീക്ഷകളിലെ ക്രമക്കേടുകൾ തടയാൻ കുറ്റക്കാർക്കെതിരെ നടപടി വേണമെന്നും സത്യസന്ധരായ വിദ്യാർഥികളുടെ താൽപര്യം സംരക്ഷിക്കണമെന്നും അദ്ദേഹം പറഞ്ഞു. ലഹരിക്കെതിരെ കർശന നടപടി സ്വീകരിക്കാൻ പൊലീസിനോടും സുരക്ഷാ ഏജൻസികളോടും ഉപരാഷ്ട്രപതി ആവശ്യപ്പെട്ടു.

ബിരുദം മാത്രമല്ല, വിദ്യാഭ്യാസത്തിന്റെ മാറ്റമുണ്ടാക്കുന്ന ശക്തിയും ആഘോഷിക്കണം

ബിരുദം നൽകുന്ന ചടങ്ങ് മാത്രമല്ല ബിരുദദാനച്ചടങ്ങെന്ന് സി. പി. രാധാകൃഷ്ണൻ പറഞ്ഞു. വിദ്യാഭ്യാസത്തിന്റെ മാറ്റമുണ്ടാക്കുന്ന ശക്തിയും അറിവിനായുള്ള അന്വേഷണവും വിദ്യാർഥികളെ ഈ പ്രധാന ഘട്ടത്തിലെത്തിച്ച സമർപ്പണവും സ്ഥിരോത്സാഹവും പ്രതിസന്ധികളെ അതിജീവിച്ച മനക്കരുത്തുമാണ് ഇവിടെ ആഘോഷിക്കപ്പെടുന്നതെന്ന് അദ്ദേഹം ചൂണ്ടിക്കാട്ടി. കുട്ടികളുടെയും വിദ്യാർഥികളുടെയും നല്ല ഭാവിക്കായി ഇന്നത്തെ പല സൗകര്യങ്ങളും വേണ്ടെന്നുവെച്ച മാതാപിതാക്കളെയും അധ്യാപകരെയും അദ്ദേഹം അഭിനന്ദിച്ചു. അവരുടെ ത്യാഗത്തിനും പങ്കിനും നന്ദി അറിയിച്ചു.

തിരുവാരൂരിന്റെ സവിശേഷ പ്രാധാന്യവും ഉപരാഷ്ട്രപതി എടുത്തുപറഞ്ഞു. ത്യാഗരാജ ക്ഷേത്രം സ്ഥിതി ചെയ്യുന്ന ഈ പുണ്യനഗരം നൂറ്റാണ്ടുകളായി ആത്മീയതയുടെയും പാണ്ഡിത്യത്തിന്റെയും കലാമികവിന്റെയും കേന്ദ്രമാണെന്ന് അദ്ദേഹം പറഞ്ഞു. സന്യാസിമാരെയും പണ്ഡിതരെയും കർണാടക സംഗീതത്തിലെ പ്രശസ്തമായ ത്രിമൂർത്തികളെയും ഈ മണ്ണ് വളർത്തിയെടുത്തിട്ടുണ്ട്. സംസ്കാരവും പഠനവും മൂല്യങ്ങളും ഒരുമിച്ച് വളരുമ്പോഴാണ് യഥാർഥ മഹത്വം ഉണ്ടാകുന്നതെന്നും അദ്ദേഹം പറഞ്ഞു.

ഉന്നതവിദ്യാഭ്യാസത്തിൽ സ്ത്രീകളുടെ മുന്നേറ്റം സ്വാഗതാർഹം

കഴിഞ്ഞ പന്ത്രണ്ട് വർഷത്തിനിടെ രാജ്യത്തെ ഉന്നതവിദ്യാഭ്യാസ മേഖല വലിയ തോതിൽ വികസിച്ചുവെന്ന് ഉപരാഷ്ട്രപതി പറഞ്ഞു. രാജ്യത്തിന്റെ വിവിധ ഭാഗങ്ങളിലെ ബിരുദദാനച്ചടങ്ങുകളിൽ പങ്കെടുക്കുമ്പോൾ പുരുഷന്മാരേക്കാൾ കൂടുതൽ സ്ത്രീകൾ ബിരുദങ്ങളും മെഡലുകളും നേടുന്നത് പലപ്പോഴും കാണാറുണ്ടെന്നും ഇത് സ്വാഗതാർഹമായ മാറ്റമാണെന്നും അദ്ദേഹം പറഞ്ഞു.

പരീക്ഷയിലോ മാർക്കിലോ മാത്രം വിദ്യാഭ്യാസത്തെ അളക്കാനാകില്ലെന്നും അദ്ദേഹം ആവർത്തിച്ചു. സ്വതന്ത്രമായി ചിന്തിക്കാനുള്ള കഴിവ്, ഫലപ്രദമായി ആശയവിനിമയം നടത്താനുള്ള ശേഷി, മറ്റുള്ളവരുമായി ചേർന്ന് പ്രവർത്തിക്കാനുള്ള കഴിവ്, ജീവിതകാലം മുഴുവൻ പഠനം തുടരാനുള്ള മനോഭാവം എന്നിവയാണ് യഥാർഥ അളവുകോലുകൾ. ബഹുവിഷയ വിദ്യാഭ്യാസം, ഗവേഷണം, പുതുമ, മൂല്യാധിഷ്ഠിത പഠനം എന്നിവയ്ക്ക് പ്രാധാന്യം നൽകി ഈ കാഴ്ചപ്പാട് നടപ്പാക്കുന്ന തമിഴ്നാട് കേന്ദ്ര സർവകലാശാലയെ അദ്ദേഹം അഭിനന്ദിച്ചു.

പൊതുപരീക്ഷകളുടെ വിശ്വാസ്യത കാക്കാൻ ശക്തമായ നടപടി വേണം

പാർലമെന്റ് അടുത്തിടെ പാസാക്കിയ പൊതുപരീക്ഷകളിലെ അന്യായ മാർഗങ്ങൾ തടയുന്നതിനുള്ള ഭേദഗതി ബില്ലിനെക്കുറിച്ചും ഉപരാഷ്ട്രപതി സംസാരിച്ചു. പരീക്ഷകളിലെ ക്രമക്കേടുകൾ തടയുകയും വിദ്യാർഥികളുടെ താൽപര്യം സംരക്ഷിക്കുകയും ചെയ്യുന്നത് അതീവ പ്രധാനമാണെന്ന് അദ്ദേഹം പറഞ്ഞു.

ഝാർഖണ്ഡ് ഗവർണറായിരുന്ന കാലത്തെ അനുഭവവും സി. പി. രാധാകൃഷ്ണൻ ഓർമിപ്പിച്ചു. സമാനമായ ഒരു ബിൽ അന്ന് ഝാർഖണ്ഡ് സർക്കാർ പാസാക്കിയിരുന്നു. ഗവർണറെന്ന നിലയിൽ അത് ലഭിച്ച ഉടൻ തന്നെ താൻ ഒപ്പുവെച്ചതോടെ നിയമമായി മാറിയെന്നും അദ്ദേഹം പറഞ്ഞു. നല്ലവരുടെ താൽപര്യം സംരക്ഷിക്കാൻ സമൂഹത്തിലെ മോശം ഘടകങ്ങൾ ശിക്ഷിക്കപ്പെടണം. പൊതുപരീക്ഷകളുടെ സത്യസന്ധതയും നീതിയും സംരക്ഷിക്കാൻ ശക്തമായ നടപടികൾ ആവശ്യമാണെന്നും അദ്ദേഹം വ്യക്തമാക്കി.

സ്വന്തമായി ജീവിക്കുന്നത് തെറ്റല്ലെന്നും എന്നാൽ സ്വന്തം കാര്യം മാത്രം നോക്കി ജീവിക്കുന്നതാണ് തെറ്റെന്നും ഉപരാഷ്ട്രപതി പറഞ്ഞു. അറിവിന്റെ ഉപഭോക്താക്കളാകാതെ സൃഷ്ടാക്കളാകണം. മറ്റുള്ളവരെ അനുകരിക്കുന്നവരാകാതെ പുതുമ സൃഷ്ടിക്കുന്നവരാകണം. പിന്തുടരുന്നവരാകാതെ നേതൃത്വം നൽകുന്നവരാകണമെന്നും വിദ്യാർഥികളോട് അദ്ദേഹം ആഹ്വാനം ചെയ്തു.

വികസിത ഭാരതത്തിനായി യുവാക്കളുടെ അറിവും നേതൃത്വവും ഉപയോഗിക്കണം

പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ 2047-ലെ വികസിത ഭാരതം എന്ന ലക്ഷ്യത്തിലേക്ക് രാജ്യം മുന്നേറുകയാണെന്ന് സി. പി. രാധാകൃഷ്ണൻ പറഞ്ഞു. രാജ്യമാണ് ആദ്യം എന്ന ചിന്ത എല്ലാ പ്രവർത്തനങ്ങളുടെയും കേന്ദ്രത്തിലുണ്ടാകണം. യുവാക്കൾ അവരുടെ അറിവും കഴിവും നേതൃത്വശേഷിയും രാജ്യത്തിന്റെ വികസനത്തിനായി ഉപയോഗിക്കണമെന്നും അദ്ദേഹം ആവശ്യപ്പെട്ടു.

അറിവ് മാത്രം മതിയാകില്ല. ജീവിതകാലം മുഴുവൻ പഠിക്കാനും പുതുമകൾ സൃഷ്ടിക്കാനും സാഹചര്യങ്ങളോട് പൊരുത്തപ്പെടാനും കഴിയണം. അറിവ് സ്വീകരിക്കുന്നവരായി മാത്രം തുടരാതെ അത് സൃഷ്ടിക്കുന്നവരാകണമെന്നായിരുന്നു വിദ്യാർഥികളോടുള്ള ഉപരാഷ്ട്രപതിയുടെ സന്ദേശം.

ലഹരിവ്യാപാരികൾക്കെതിരെ കർശന നടപടി വേണമെന്ന് ഉപരാഷ്ട്രപതി

ലഹരിമരുന്ന് വിൽക്കുന്നവർക്കും ലഹരി വ്യാപിപ്പിക്കുന്നവർക്കുമെതിരെ പൊലീസ്, സുരക്ഷാ ഏജൻസികൾ കർശന നടപടി സ്വീകരിക്കണമെന്ന് ഉപരാഷ്ട്രപതി ആവശ്യപ്പെട്ടു. ലഹരി ഉപയോഗം ഒരാളുടെ ജീവിതം മാത്രമല്ല നശിപ്പിക്കുന്നത്. കുടുംബത്തെയും സമൂഹത്തെയും അത് ദോഷകരമായി ബാധിക്കും. യുവാക്കളെ ലഹരിയിൽ നിന്ന് സംരക്ഷിക്കുന്നത് എല്ലാവരുടെയും കൂട്ടായ ഉത്തരവാദിത്വമാണെന്നും അദ്ദേഹം പറഞ്ഞു.

ലഹരിയോട് ഇല്ലെന്ന് പറയണമെന്ന് വിദ്യാർഥികളോട് അദ്ദേഹം വീണ്ടും അഭ്യർഥിച്ചു. സുഹൃത്തുക്കളെയും ലഹരിവസ്തുക്കളിൽ നിന്ന് അകന്നുനിൽക്കാൻ പ്രേരിപ്പിക്കണം. പ്രസംഗം അവസാനിപ്പിച്ചുകൊണ്ട് എല്ലാ ബിരുദധാരികൾക്കും വിജയവും സംതൃപ്തിയും നല്ല ആരോഗ്യവും സമൂഹത്തിൽ അർഥവത്തായ മാറ്റം സൃഷ്ടിച്ചതിന്റെ സന്തോഷവും ലഭിക്കട്ടെയെന്ന് ഉപരാഷ്ട്രപതി ആശംസിച്ചു.

ചടങ്ങിൽ ആകെ 1,103 പേർ ബിരുദം ഏറ്റുവാങ്ങി. അക്കാദമിക മികവ് തെളിയിച്ച 50 പേർ സ്വർണമെഡൽ നേടി. ബിരുദം നേടിയ 1,103 പേരിൽ 616 പേർ സ്ത്രീകളായിരുന്നു. 50 സ്വർണമെഡലുകളിൽ 37 എണ്ണവും സ്ത്രീകൾ സ്വന്തമാക്കി.

തമിഴ്നാട് ഗവർണർ രാജേന്ദ്ര വിശ്വനാഥ് അർലേക്കർ, നാഗപട്ടണം ലോക്സഭാംഗം വി. സെൽവരാജ്, ചാൻസലർ പ്രൊഫസർ ജി. പത്മനാഭൻ, വൈസ് ചാൻസലർ സീനിയർ പ്രൊഫസർ സുലോചന ശേഖർ, അധ്യാപകർ, മാതാപിതാക്കൾ, വിദ്യാർഥികൾ എന്നിവരും ചടങ്ങിൽ പങ്കെടുത്തു.