ഈടും ജാമ്യക്കാരനും വേണ്ട; ഉന്നതപഠനത്തിന് പി.എം. വിദ്യാലക്ഷ്മി വായ്പ

ന്യൂഡൽഹി / 2026 /ജൂലൈ 29

രാജ്യത്തെ മികച്ച ഉന്നതവിദ്യാഭ്യാസ സ്ഥാപനങ്ങളിൽ പ്രവേശനം നേടുന്ന വിദ്യാർത്ഥികൾക്ക് ഈടോ ജാമ്യക്കാരനോ ഇല്ലാതെ വിദ്യാഭ്യാസ വായ്പ ലഭ്യമാക്കുന്നതാണ് പി.എം. വിദ്യാലക്ഷ്മി പദ്ധതി. കേന്ദ്ര വിദ്യാഭ്യാസ മന്ത്രാലയത്തിന്റെ പദ്ധതിയിൽ നിലവിൽ 1,425 സർക്കാർ, സ്വകാര്യ വിദ്യാഭ്യാസ സ്ഥാപനങ്ങൾ ഉൾപ്പെട്ടിട്ടുണ്ട്. 2024 നവംബർ ആറിനാണ് കേന്ദ്രമന്ത്രിസഭ പദ്ധതിക്ക് അംഗീകാരം നൽകിയത്.

എല്ലാ വരുമാനക്കാർക്കും വായ്പയ്ക്ക് അപേക്ഷിക്കാം

യോഗ്യതയുടെ അടിസ്ഥാനത്തിൽ അംഗീകൃത സ്ഥാപനങ്ങളിൽ പ്രവേശനം നേടിയ വിദ്യാർത്ഥികൾക്കാണ് വായ്പ ലഭിക്കുക. കുടുംബവരുമാന പരിധിയില്ലാതെ വായ്പയ്ക്ക് അപേക്ഷിക്കാം. പഠനഫീസ്, ഹോസ്റ്റൽ ചെലവ്, ഭക്ഷണം, ലാപ്ടോപ്, ജീവിതച്ചെലവ് എന്നിവയും വായ്പയിൽ ഉൾപ്പെടുത്താം. മാനേജ്മെന്റ് ക്വാട്ട, പ്രവാസി ക്വാട്ട പ്രവേശനങ്ങൾക്ക് ആനുകൂല്യം ലഭിക്കില്ല.

എട്ട് ലക്ഷം വരുമാനക്കാർക്ക് പലിശയിളവ്

കുടുംബത്തിന്റെ വാർഷിക വരുമാനം എട്ട് ലക്ഷം രൂപയിൽ താഴെയാണെങ്കിൽ പത്ത് ലക്ഷം രൂപവരെയുള്ള വായ്പയ്ക്ക് മൂന്ന് ശതമാനം പലിശയിളവ് ലഭിക്കും. നാലര ലക്ഷം രൂപവരെ കുടുംബവരുമാനമുള്ള അർഹരായ വിദ്യാർത്ഥികൾക്ക് പഠനകാലത്തും തുടർന്നുള്ള ഒരു വർഷവും മുഴുവൻ പലിശയിളവ് ലഭിക്കും. ഏഴര ലക്ഷം രൂപവരെയുള്ള വായ്പയ്ക്ക് കേന്ദ്രം 75 ശതമാനം വായ്പാ ഉറപ്പും നൽകും.

അപേക്ഷയും നടപടികളും പൂർണമായും ഓൺലൈനിൽ

പി.എം. വിദ്യാലക്ഷ്മി പോർട്ടലിലൂടെ പൊതുവായ അപേക്ഷ നൽകി ബാങ്ക് തിരഞ്ഞെടുക്കാം. അപേക്ഷയുടെ നില പരിശോധിക്കാനും പലിശയിളവിന് അപേക്ഷിക്കാനും പരാതി നൽകാനും സൗകര്യമുണ്ട്. വായ്പ തിരിച്ചടയ്ക്കാൻ പഠനകാലത്തിനും ഒരു വർഷത്തെ ഇടവേളയ്ക്കും ശേഷം പരമാവധി 15 വർഷം ലഭിക്കും. പഠനം തുടരുകയും തൃപ്തികരമായ അക്കാദമിക നിലവാരം നിലനിർത്തുകയും വേണം.

67,728 വിദ്യാർത്ഥികൾക്ക് വായ്പ വിതരണം ചെയ്തു

2025-26 സാമ്പത്തികവർഷത്തിൽ പി.എം. വിദ്യാലക്ഷ്മി പദ്ധതിയിൽ 1,10,667 അപേക്ഷകളാണ് ലഭിച്ചത്. ഇതിൽ 70,852 വായ്പകൾ അനുവദിച്ചു. 67,728 വിദ്യാർത്ഥികൾക്ക് പണം വിതരണം ചെയ്തു. 2024-25 മുതൽ 2030-31 വരെയുള്ള കാലയളവിലേക്ക് കേന്ദ്രം 3,600 കോടി രൂപ വകയിരുത്തിയിട്ടുണ്ട്. ഏഴ് വർഷത്തിനിടെ ഏഴ് ലക്ഷം പുതിയ വിദ്യാർത്ഥികൾക്ക് പലിശയിളവ് നൽകുകയാണ് ലക്ഷ്യം.

.