കൊൽക്കത്ത  /  2026 / സെപ്റ്റംബർ 18 

പരമ്പരാഗത കരകൗശല തൊഴിലാളികൾക്കും ശില്പികൾക്കും സഹായം നൽകുന്ന പി.എം. വിശ്വകർമ പദ്ധതിക്ക് മൂന്ന് വർഷം പൂർത്തിയായി. പദ്ധതിയിൽ രാജ്യത്താകെ 30 ലക്ഷം പേർ രജിസ്റ്റർ ചെയ്തതായി സൂക്ഷ്മ, ചെറുകിട, ഇടത്തരം സംരംഭ മന്ത്രാലയം അറിയിച്ചു. മൂന്നാം വാർഷികാഘോഷം കൊൽക്കത്തയിലെ ധോനോ ധാന്യോ ഓഡിറ്റോറിയത്തിൽ നടന്നു. സെപ്റ്റംബർ 17നായിരുന്നു പരിപാടി.

24.50 ലക്ഷം പേർക്ക് അടിസ്ഥാന നൈപുണ്യ പരിശീലനം

കേന്ദ്ര സൂക്ഷ്മ, ചെറുകിട, ഇടത്തരം സംരംഭ മന്ത്രി ജിതൻ റാം മാഞ്ചി, കേന്ദ്ര സഹമന്ത്രി ശോഭ കരന്ദ്‌ലാജെ, പശ്ചിമ ബംഗാൾ മുഖ്യമന്ത്രി സുവേന്ദു അധികാരി തുടങ്ങിയവർ പരിപാടിയിൽ പങ്കെടുത്തു. രജിസ്റ്റർ ചെയ്തവരിൽ ഏകദേശം 24.50 ലക്ഷം പേർക്ക് അടിസ്ഥാന നൈപുണ്യ പരിശീലനം ലഭിച്ചു. 18.15 ലക്ഷം ആധുനിക ഉപകരണ കിറ്റുകൾ ഇന്ത്യ പോസ്റ്റ് വഴി വിതരണം ചെയ്തു. 6.18 ലക്ഷം ഗുണഭോക്താക്കൾക്ക് അഞ്ചുശതമാനം വാർഷിക പലിശനിരക്കിൽ ഒരു ലക്ഷം രൂപവരെ വായ്പ നൽകി. ആകെ വായ്പാ തുക 5,297 കോടി രൂപയാണ്.

പശ്ചിമ ബംഗാളിൽ ഏഴ് ലക്ഷത്തിലേറെ അപേക്ഷകൾ

2026 മേയിലാണ് പശ്ചിമ ബംഗാൾ പദ്ധതിയുടെ ഭാഗമായത്. സംസ്ഥാനത്ത് ഇതിനകം ഏഴ് ലക്ഷത്തിലധികം അപേക്ഷകൾ ലഭിച്ചതായി മുഖ്യമന്ത്രി സുവേന്ദു അധികാരി പറഞ്ഞു. അർഹരായ പരമ്പരാഗത തൊഴിലാളികളിലേക്ക് പദ്ധതിയുടെ ഗുണങ്ങൾ വേഗത്തിൽ എത്തിക്കാൻ സംസ്ഥാന സർക്കാർ നടപടികൾ ശക്തമാക്കുമെന്നും അദ്ദേഹം അറിയിച്ചു. കേന്ദ്ര മന്ത്രാലയവുമായി ചേർന്ന് പദ്ധതി സമയബന്ധിതമായി നടപ്പാക്കുമെന്നും വ്യക്തമാക്കി.

പരിശീലനം മുതൽ വിപണി ബന്ധം വരെ

പരമ്പരാഗത തൊഴിലാളികളുടെ തൊഴിൽനൈപുണ്യം മെച്ചപ്പെടുത്തുക, ആധുനിക ഉപകരണങ്ങൾ നൽകുക, കുറഞ്ഞ പലിശയിൽ വായ്പ ലഭ്യമാക്കുക, വിപണിയുമായി ബന്ധിപ്പിക്കുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ. പദ്ധതിയിലൂടെ സംരംഭകത്വത്തിലേക്ക് കൂടുതൽ പേരെ എത്തിക്കാനാണ് കേന്ദ്ര സർക്കാർ ലക്ഷ്യമിടുന്നത്. പശ്ചിമ ബംഗാളിലെ വിശ്വകർമ തൊഴിലാളികൾക്ക് അവരുടെ ഉൽപ്പന്നങ്ങളും കരകൗശല വൈദഗ്ധ്യവും അവതരിപ്പിക്കാൻ വാർഷികാഘോഷത്തിന്റെ ഭാഗമായി പ്രദർശനവും സംഘടിപ്പിച്ചു.

2023 സെപ്റ്റംബർ 17ന് തുടക്കം

പ്രധാനമന്ത്രി നരേന്ദ്ര മോദി 2023 സെപ്റ്റംബർ 17നാണ് പി.എം. വിശ്വകർമ പദ്ധതി ആരംഭിച്ചത്. മൂന്നാം വാർഷിക പരിപാടിയിൽ പശ്ചിമ ബംഗാളിലെ ഗുണഭോക്താക്കൾക്ക് തിരിച്ചറിയൽ കാർഡുകളും സർട്ടിഫിക്കറ്റുകളും ഉപകരണ കിറ്റുകളും ഒരു ലക്ഷം രൂപയുടെ ചെക്കുകളും വിതരണം ചെയ്തു. വിവിധ ജില്ലകളിൽ നിന്നുള്ള രണ്ടായിരത്തിലധികം വിശ്വകർമ തൊഴിലാളികളും പഞ്ചായത്ത് പ്രതിനിധികളും പരിപാടിയിൽ പങ്കെടുത്തു.