20- ജൂലായ് 2026

ഇന്ന്, ജൂലൈ 20, അന്താരാഷ്ട്ര ചന്ദ്രദിനമായി (International Moon Day) ആചരിക്കുന്നു. 1969-ലെ ഇതേ ദിവസമാണ് അപ്പോളോ 11 ദൗത്യത്തിലൂടെ മനുഷ്യൻ ആദ്യമായി ചന്ദ്രനിലിറങ്ങിയതെന്നതിനാലാണ് എന്നതാണ് ഈ ദിവസത്തിന്റെ മഹത്വം. നീൽ ആംസ്ട്രോങും ബസ് ആൽഡ്രിനും ചന്ദ്രനിൽ  ഇറങ്ങുകയും മൈക്കിൾ കോളിൻസ് കൊളംബിയ പേടകത്തിൽ ചന്ദ്രനെ വലംവയ്ക്കുകയും ചെയ്തു. മനുഷ്യരാശിയുടെ ചന്ദ്രപര്യവേക്ഷണത്തിലെ ഈ നിർണായക നേട്ടത്തെ അനുസ്മരിക്കാനും സമാധാനപരമായ ബഹിരാകാശ ഗവേഷണം, അന്താരാഷ്ട്ര സഹകരണം, ചന്ദ്രന്റെ സുസ്ഥിരമായ ഉപയോഗം എന്നിവ പ്രോത്സാഹിപ്പിക്കാനുമായി ഐക്യരാഷ്ട്രസഭ 2021-ൽ ജൂലൈ 20-നെ അന്താരാഷ്ട്ര ചന്ദ്രദിനമായി പ്രഖ്യാപിച്ചു. 2022 മുതലാണ് ദിനാചരണം ഔദ്യോഗികമായി ആരംഭിച്ചത്. ഈ ദൗത്യത്തിൽ പങ്കെടുത്ത മൂന്നുപേരുടേയും ജീവിതാനുഭവങ്ങളെപറ്റി ഈ പരമ്പരയിൽ…

കാറിന് മുമ്പേ വിമാനം പറത്തിയ നീൽ

1930 ഓഗസ്റ്റ് 5-ന് അമേരിക്കയിലെ ഒഹായോ സംസ്ഥാനത്തെ വാപ്പാക്കൊനെറ്റയിലാണ് നീൽ ആംസ്ട്രോങ് ജനിച്ചത്. കുട്ടിക്കാലം മുതൽ വിമാനങ്ങളോടായിരുന്നു നീലിന് കൗതുകം. ആറാം വയസ്സിൽ ആദ്യമായി വിമാനത്തിൽ കയറി. പതിനാറാം വയസ്സിൽ കാർ ഓടിക്കാനുള്ള ലൈസൻസ് ലഭിക്കുന്നതിനുമുമ്പുതന്നെ വിമാനം പറത്താനുള്ള ലൈസൻസ് സ്വന്തമാക്കി.

പർഡ്യൂ സർവകലാശാലയിൽ എയറോനോട്ടിക്കൽ എൻജിനിയറിങ് പഠിക്കുന്നതിനിടെ കൊറിയൻ യുദ്ധം ആരംഭിച്ചു. അമേരിക്കൻ നാവികസേനയുടെ വൈമാനികനായി യുദ്ധരംഗത്തെത്തിയ നീൽ 78 യുദ്ധദൗത്യങ്ങളിൽ പങ്കെടുത്തു. ഒരിക്കൽ വിമാനം ശത്രുക്കളുടെ വെടിയേറ്റ് നിയന്ത്രണം നഷ്ടപ്പെട്ടപ്പോൾ അവസാനനിമിഷം പുറത്തേക്കു ചാടിയാണ് രക്ഷപ്പെട്ടത്.

അപകടത്തിലും പതറാത്ത പരീക്ഷണ പൈലറ്റ്

യുദ്ധത്തിനുശേഷം പഠനം പൂർത്തിയാക്കിയ നീൽ പരീക്ഷണ പൈലറ്റായി. മനുഷ്യൻ മുമ്പ് സഞ്ചരിക്കാത്ത വേഗത്തിലും ഉയരത്തിലും പറക്കുന്ന വിമാനങ്ങൾ പരീക്ഷിക്കുകയായിരുന്നു ജോലി. 1955-ൽ NASAയുടെ മുൻഗാമിയായ നാഷണൽ അഡ്വൈസറി കമ്മിറ്റി ഫോർ എയറോനോട്ടിക്സിൽ ചേർന്നു. അപകടനിമിഷങ്ങളിലും സമചിത്തത കൈവിടാത്ത സ്വഭാവമാണ് അദ്ദേഹത്തെ വേറിട്ടുനിർത്തിയത്.

‘ബ്രദർ’ വിളിയിൽനിന്ന് പിറന്ന ‘ബസ്’

1930 ജനുവരി 20-ന് ന്യൂജേഴ്‌സിയിലെ മോൺട്ക്ലെയറിലാണ് എഡ്വിൻ യൂജിൻ ആൽഡ്രിൻ ജൂനിയർ ജനിച്ചത്. മൂത്ത സഹോദരി കുട്ടിക്കാലത്ത് ‘ബ്രദർ’ എന്നു വിളിക്കാൻ ശ്രമിച്ചപ്പോൾ അത് ‘ബസർ’ എന്നായി. പിന്നീട് ‘ബസ്’ എന്ന വിളിപ്പേര് അദ്ദേഹത്തോടൊപ്പം ചേർന്നു.

സൈനിക വൈമാനികനായിരുന്നു ബസിന്റെ അച്ഛൻ. അതുകൊണ്ട് ചെറുപ്പം മുതൽ വിമാനങ്ങളും വൈമാനികരുമായിരുന്നു ബസിന്റെ ലോകം. വെസ്റ്റ് പോയിന്റ് സൈനിക അക്കാദമിയിൽ മൂന്നാം റാങ്കോടെ പഠനം പൂർത്തിയാക്കി വ്യോമസേനയിൽ ചേർന്നു. കൊറിയൻ യുദ്ധത്തിൽ 66 യുദ്ധദൗത്യങ്ങൾ നടത്തിയ അദ്ദേഹം രണ്ട് ശത്രുവിമാനങ്ങൾ വെടിവച്ചിട്ടു.

ബഹിരാകാശ കൂടിച്ചേരലിലെ ‘ഡോക്ടർ’

ബസ് വെറുമൊരു യുദ്ധവൈമാനികനായിരുന്നില്ല. ബഹിരാകാശത്ത് രണ്ട് പേടകങ്ങൾ എങ്ങനെ അടുത്തെത്തുകയും ബന്ധിപ്പിക്കുകയും ചെയ്യാമെന്ന വിഷയത്തിൽ മസാച്യുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്‌നോളജിയിൽനിന്ന് ഡോക്ടറേറ്റ് നേടി. അതുകൊണ്ടാണ് സഹപ്രവർത്തകർ അദ്ദേഹത്തെ ‘ഡോക്ടർ റെൻഡേവൂ’ എന്നു വിളിച്ചത്.

ഒരിക്കൽ നിരസിക്കപ്പെട്ട മൈക്കിൾ കോളിൻസ്

മൂന്നാമൻ മൈക്കിൾ കോളിൻസ്. 1930 ഒക്ടോബർ 31-ന് ഇറ്റലിയിലെ റോമിലാണ് ജനിച്ചത്. അമേരിക്കൻ സൈനിക ഉദ്യോഗസ്ഥനായിരുന്ന അച്ഛന്റെ ജോലിയെത്തുടർന്ന് കുടുംബം പല സ്ഥലങ്ങളിലായി താമസിച്ചു. വെസ്റ്റ് പോയിന്റിൽ പഠിച്ച കോളിൻസ് പിന്നീട് അമേരിക്കൻ വ്യോമസേനയുടെ യുദ്ധവൈമാനികനും പരീക്ഷണ പൈലറ്റുമായി.

ജോൺ ഗ്ലെൻ ഭൂമിയെ വലംവച്ചത് കണ്ടപ്പോഴാണ് ബഹിരാകാശയാത്രികനാകണമെന്ന ആഗ്രഹം ശക്തമായത്. NASAയുടെ രണ്ടാമത്തെ ബഹിരാകാശയാത്രിക സംഘത്തിലേക്കുള്ള അപേക്ഷ നിരസിക്കപ്പെട്ടു. എന്നാൽ സ്വപ്നം ഉപേക്ഷിച്ചില്ല. കൂടുതൽ പരിശീലനത്തിനുശേഷം വീണ്ടും അപേക്ഷിച്ചു. 1963-ൽ NASAയുടെ മൂന്നാമത്തെ ബഹിരാകാശയാത്രിക സംഘത്തിലേക്ക് ബസ് ആൽഡ്രിനൊപ്പം കോളിൻസും തിരഞ്ഞെടുക്കപ്പെട്ടു.

മൂന്ന് വഴികൾ ഒരേ ലക്ഷ്യത്തിലേക്ക്

വ്യത്യസ്ത സ്ഥലങ്ങളിൽ വളർന്ന മൂന്ന് പേർ. ഒരാൾ ശാന്തനായ പരീക്ഷണ പൈലറ്റ്. മറ്റൊരാൾ യുദ്ധവൈമാനികനും ബഹിരാകാശ സഞ്ചാരവിദഗ്ധനും. മൂന്നാമൻ ആദ്യ പരാജയത്തിനുശേഷവും സ്വപ്നം കൈവിടാത്ത പൈലറ്റ്. ഇവരുടെ ജീവിതപാതകൾ വൈകാതെ ഒരേ ലക്ഷ്യത്തിലേക്ക് തിരിയുകയായിരുന്നു—ചന്ദ്രൻ.

കെന്നഡി പ്രഖ്യാപിച്ച അസാധാരണ ലക്ഷ്യം

1961 മേയ് 25-ന് അമേരിക്കൻ പ്രസിഡന്റ് ജോൺ എഫ്. കെന്നഡി രാജ്യത്തിന് മുന്നിൽ അസാധാരണമായൊരു ലക്ഷ്യം പ്രഖ്യാപിച്ചു. 1960-കളുടെ അവസാനം കഴിയുന്നതിനുമുമ്പ് ഒരു മനുഷ്യനെ ചന്ദ്രനിലിറക്കി സുരക്ഷിതമായി ഭൂമിയിലേക്കു തിരിച്ചെത്തിക്കണം.

അന്ന് ബഹിരാകാശ മത്സരത്തിൽ സോവിയറ്റ് യൂണിയനായിരുന്നു മുന്നിൽ. യൂറി ഗഗാറിൻ ബഹിരാകാശത്തെത്തിയ ആദ്യ മനുഷ്യനായി ചരിത്രം കുറിച്ചിരുന്നു. അമേരിക്കയ്ക്ക് ചന്ദ്രയാത്ര ഒരു ശാസ്ത്രദൗത്യം മാത്രമായിരുന്നില്ല; ദേശീയ അഭിമാനത്തിന്റെയും സാങ്കേതികശേഷിയുടെയും പരീക്ഷണംകൂടിയായിരുന്നു.

ദുരന്തത്തിൽ തുടങ്ങിയ അപ്പോളോ യാത്ര

കെന്നഡിയുടെ ലക്ഷ്യത്തിലേക്കുള്ള വഴിയായിരുന്നു അപ്പോളോ പദ്ധതി. എന്നാൽ തുടക്കം ദുരന്തത്തിലായിരുന്നു. 1967-ൽ അപ്പോളോ 1 പേടകത്തിലെ പരിശീലനത്തിനിടെ തീപിടിച്ച് ഗസ് ഗ്രിസം, എഡ് വൈറ്റ്, റോജർ ചാഫി എന്നിവർ മരിച്ചു. അപകടത്തിനുശേഷം പേടകത്തിന്റെ രൂപകൽപ്പനയിലും സുരക്ഷാസംവിധാനങ്ങളിലും വലിയ മാറ്റങ്ങൾ വരുത്തി.

ചന്ദ്രനിലിറങ്ങാനുള്ള പടവുകൾ

അപ്പോളോ 7 ഭൂമിയുടെ ഭ്രമണപഥത്തിൽ പുതിയ പേടകം പരീക്ഷിച്ചു. അപ്പോളോ 8 ആദ്യമായി മനുഷ്യരുമായി ചന്ദ്രനെ വലംവച്ചു. അപ്പോളോ 9 ചാന്ദ്രപേടകത്തെ ഭൂമിയുടെ ഭ്രമണപഥത്തിൽ പരീക്ഷിച്ചു. അപ്പോളോ 10 ചന്ദ്രോപരിതലത്തിന് ഏകദേശം 15 കിലോമീറ്റർ അടുത്തുവരെ ഇറങ്ങി മടങ്ങി. ഇനി ശേഷിച്ചത് യഥാർഥ ലാൻഡിങ് മാത്രം.

മരണച്ചുഴിയിൽനിന്ന് പേടകത്തെ രക്ഷിച്ച നീൽ

1966-ലെ ജെമിനി 8 ദൗത്യത്തിന്റെ കമാൻഡറായിരുന്നു ആംസ്ട്രോങ്. ബഹിരാകാശത്ത് രണ്ട് പേടകങ്ങൾ ആദ്യമായി ബന്ധിപ്പിച്ചെങ്കിലും പിന്നാലെ പേടകം നിയന്ത്രണംവിട്ട് അതിവേഗം കറങ്ങാൻ തുടങ്ങി. ബോധം നഷ്ടപ്പെടാവുന്ന സ്ഥിതിയിലും അദ്ദേഹം അടിയന്തര സംവിധാനം പ്രവർത്തിപ്പിച്ച് പേടകത്തെ നിയന്ത്രിച്ചു. പ്രതിസന്ധിയിലും ശരിയായ തീരുമാനമെടുക്കാനുള്ള ആ കഴിവ് ചാന്ദ്രദൗത്യത്തിലേക്കുള്ള വഴി തുറന്നു.

ബഹിരാകാശ നടത്തത്തിന് പുതിയ രീതി

ജെമിനി 12 ദൗത്യത്തിലാണ് ബസ് ആൽഡ്രിൻ കഴിവു തെളിയിച്ചത്. നേരത്തെയുള്ള ബഹിരാകാശ നടത്തങ്ങളിൽ യാത്രികർ പെട്ടെന്ന് ക്ഷീണിച്ചിരുന്നു. വെള്ളത്തിനടിയിലെ പരിശീലനത്തിലൂടെ ചലനങ്ങൾ മുൻകൂട്ടി അഭ്യസിക്കണമെന്ന് ബസ് നിർദേശിച്ചു. പിടികളും വിശ്രമക്രമവും ഉപയോഗിച്ച് അദ്ദേഹം ദീർഘമായ ബഹിരാകാശ നടത്തം വിജയകരമാക്കി.

ശസ്ത്രക്രിയയ്ക്കുശേഷമുള്ള തിരിച്ചുവരവ്

മൈക്കിൾ കോളിൻസ് ജെമിനി 10 ദൗത്യത്തിലൂടെ ബഹിരാകാശത്തെത്തി. പേടകങ്ങൾ തമ്മിലുള്ള കൂടിച്ചേരലിലും ബഹിരാകാശ നടത്തത്തിലും പരിചയം നേടി. പിന്നീട് കഴുത്തിലെ നട്ടെല്ലുമായി ബന്ധപ്പെട്ട പ്രശ്നത്തിന് ശസ്ത്രക്രിയ വേണ്ടിവന്നു. ഇതുമൂലം അപ്പോളോ 8 ദൗത്യം നഷ്ടപ്പെട്ടെങ്കിലും സുഖംപ്രാപിച്ച അദ്ദേഹം അപ്പോളോ 11 സംഘത്തിലെത്തി.

അപ്പോളോ 11-ന്റെ മൂന്ന് മുഖങ്ങൾ

1969 ജനുവരിയിൽ നീൽ ആംസ്ട്രോങ്, ബസ് ആൽഡ്രിൻ, മൈക്കിൾ കോളിൻസ് എന്നിവരെ അപ്പോളോ 11-ന്റെ പ്രധാന സംഘമായി പ്രഖ്യാപിച്ചു. ആംസ്ട്രോങ് കമാൻഡർ. ആൽഡ്രിൻ ചാന്ദ്രപേടക പൈലറ്റ്. കോളിൻസ് കമാൻഡ് മൊഡ്യൂൾ പൈലറ്റ്.

ആംസ്ട്രോങും ആൽഡ്രിനും ‘ഈഗിൾ’ എന്ന ചാന്ദ്രപേടകത്തെ പഠിച്ചു. കോളിൻസ് ‘കൊളംബിയ’ എന്ന കമാൻഡ് മൊഡ്യൂളിൽ ഒറ്റയ്ക്ക് പ്രവർത്തിക്കാനുള്ള പരിശീലനം നടത്തി. ചന്ദ്രനിൽ ഇറങ്ങിയവർ തിരിച്ചെത്തിയില്ലെങ്കിൽ കോളിൻസ് തനിച്ച് ഭൂമിയിലേക്കു മടങ്ങേണ്ടിവരുമായിരുന്നു.

അപകടത്തെ അതിജീവിച്ച പരിശീലനം

ചന്ദ്രോപരിതലത്തിലെ നടത്തവും സാമ്പിൾ ശേഖരണവും ശാസ്ത്രീയ ഉപകരണങ്ങൾ സ്ഥാപിക്കുന്നതുമെല്ലാം സംഘം ആവർത്തിച്ച് പരിശീലിച്ചു. ചാന്ദ്രലാൻഡിങ് പരിശീലനവാഹനം നിയന്ത്രണംവിട്ടപ്പോൾ ആംസ്ട്രോങ് അവസാനനിമിഷം പുറത്തേക്കു ചാടി രക്ഷപ്പെട്ടു. വാഹനം നിലത്തുവീണ് കത്തിയെങ്കിലും അദ്ദേഹം അടുത്ത ദിവസം പതിവുപോലെ ജോലിക്കെത്തി.

ലക്ഷക്കണക്കിന് ഘടകങ്ങളുള്ള സാറ്റേൺ V റോക്കറ്റ് തയ്യാറായി. ആയിരക്കണക്കിന് മനുഷ്യരുടെ അധ്വാനം അതിനു പിന്നിലുണ്ടായിരുന്നു. എന്നാൽ അവസാനമായി റോക്കറ്റിന്റെ മുകളിൽ ഇരിക്കേണ്ടത് മൂന്ന് പേർ മാത്രം.

ചന്ദ്രനിലിറങ്ങിയ മൂന്ന് പേരുടെ കഥ വീണ്ടും ഓർമ്മയിൽ- ഭാഗം രണ്ട്