ന്യൂഡൽഹി, 2026 സെപ്റ്റംബർ 4 –

യുക്രെയ്‌നുവേണ്ടിയുള്ള ഏകദേശം 70 ദശലക്ഷം യൂറോ, അതായത് ₹768.50 കോടിയിലധികം വരുന്ന വെടിക്കോപ്പ് ഇടപാട് വിവാദമായതോടെ എസ്റ്റോണിയയുടെ പ്രതിരോധമന്ത്രി ഹാനോ പെവ്കുർ രാജിവച്ചു. ബുധനാഴ്ചയാണ് രാജി പ്രഖ്യാപിച്ചത്. യുക്രെയ്‌നിലേക്ക് ആർട്ടിലറി ഷെല്ലുകൾ എത്തിക്കാൻ എസ്റ്റോണിയയുടെ സെന്റർ ഫോർ ഡിഫൻസ് ഇൻവെസ്റ്റ്‌മെന്റ്സ് നടത്തിയ ഇടപാടാണ് വിവാദത്തിലായത്. പ്രതിരോധ മേഖലയിലെ രാഷ്ട്രീയ ഉത്തരവാദിത്തം ഏറ്റെടുത്താണ് രാജിയെന്ന് പെവ്കുർ വ്യക്തമാക്കി.

മുൻപരിചയമില്ലാത്ത കമ്പനിയുമായി കരാർ

2024ലാണ് എസ്റ്റോണിയയുടെ സെന്റർ ഫോർ ഡിഫൻസ് ഇൻവെസ്റ്റ്‌മെന്റ്സ് ഇറ്റലിയിൽ രജിസ്റ്റർ ചെയ്ത ഡാറ്റാസെൽ എസ്‌ആർഎല്ലുമായി കരാറുകൾ ഒപ്പിട്ടത്. അതേ വർഷം ഇന്ത്യൻ കമ്പനിയായ നെക്കോ ഡിഫൻസ് മ്യൂണിഷൻസ് ഡാറ്റാസെലിനെ ഏറ്റെടുത്തിരുന്നു. ആർട്ടിലറി ഷെല്ലുകൾ വിൽക്കുന്നതിൽ മുൻപരിചയമില്ലാത്ത കമ്പനിയുമായാണ് കരാർ നടത്തിയതെന്നാണ് പ്രധാന വിമർശനം. യുക്രെയ്ൻ കടുത്ത വെടിക്കോപ്പ് ക്ഷാമം നേരിട്ട സമയത്ത് സഹായം എത്തിക്കാനായിരുന്നു ഇടപാട്. യൂറോപ്യൻ യൂണിയന്റെ യൂറോപ്യൻ പീസ് ഫെസിലിറ്റിയിൽ നിന്നുള്ള പണമാണ് ഇതിനായി ഉപയോഗിച്ചത്.

മുൻകൂറായി നൽകിയത് 70 ദശലക്ഷം യൂറോ

2024 ഓഗസ്റ്റിലെ ആദ്യ കരാറിൽ ഏകദേശം 15 ദശലക്ഷം യൂറോ മുൻകൂറായി നൽകി. ഒക്ടോബറിലെ മറ്റൊരു കരാറിൽ 10 ദശലക്ഷത്തിലധികം യൂറോ കൂടി നൽകി. പിന്നീട് കൂടുതൽ കരാറുകൾ വന്നതോടെ ആകെ മുൻകൂർ തുക ഏകദേശം 70 ദശലക്ഷം യൂറോയായി. ഏതാനും മാസങ്ങൾക്കുള്ളിൽ വെടിക്കോപ്പ് യുക്രെയ്‌നിലെത്തുമെന്നായിരുന്നു പ്രതീക്ഷ. എന്നാൽ ഉൽപ്പാദന പ്രശ്നങ്ങൾ കാരണം വിതരണം പലതവണ വൈകിയെന്നാണ് റിപ്പോർട്ട്. 2025ൽ ലഭിച്ച വെടിക്കോപ്പ് ഗുണനിലവാര മാനദണ്ഡങ്ങൾ പാലിച്ചില്ലെന്നും എസ്റ്റോണിയൻ മാധ്യമമായ Eesti Ekspress റിപ്പോർട്ട് ചെയ്തു.

ആരോപണങ്ങൾ നിഷേധിച്ച് ഡാറ്റാസെൽ

അതേസമയം ആരോപണങ്ങൾ ഡാറ്റാസെൽ തള്ളുകയാണ്. 59 ദശലക്ഷം യൂറോയുടെ വെടിക്കോപ്പ് എസ്റ്റോണിയയ്ക്ക് നൽകിയെന്നാണ് കമ്പനിയുടെ വാദം. വിതരണത്തിൽ കാലതാമസമുണ്ടായെന്ന് സമ്മതിച്ചെങ്കിലും വെടിക്കോപ്പിന് ഗുണനിലവാരമില്ലെന്ന ആരോപണം കമ്പനി നിഷേധിച്ചു. കരാറുകൾ അവസാനിപ്പിച്ചതിനെതിരെ ഡാറ്റാസെൽ നിയമനടപടിയിലുമാണ്. തർക്കം ഇപ്പോൾ അന്താരാഷ്ട്ര ആർബിട്രേഷനിലെത്തി. എസ്റ്റോണിയ മുൻകൂറായി നൽകിയ 70 ദശലക്ഷം യൂറോ തിരിച്ചുപിടിക്കാനാണ് ശ്രമിക്കുന്നത്.

ഓഡിറ്റ് റിപ്പോർട്ടിന് പിന്നാലെ രാജി

പ്രതിരോധ ഫണ്ടുകളുടെ നടത്തിപ്പിലും സൈനിക സംഭരണത്തിലും പ്രശ്നങ്ങളുണ്ടെന്ന് എസ്റ്റോണിയയുടെ നാഷണൽ ഓഡിറ്റ് ഓഫീസ് ഓഗസ്റ്റ് 28ന് പുറത്തുവിട്ട റിപ്പോർട്ടിൽ ചൂണ്ടിക്കാട്ടിയിരുന്നു. യൂറോപ്യൻ യൂണിയൻ ഫണ്ട് തിരിച്ചുപിടിക്കാനായില്ലെങ്കിൽ ഏകദേശം 70 ദശലക്ഷം യൂറോ എസ്റ്റോണിയ സ്വന്തം ബജറ്റിൽ നിന്ന് കണ്ടെത്തേണ്ടിവരുമെന്നും മുന്നറിയിപ്പുണ്ട്. വ്യക്തിഗത സംഭരണ കരാറുകൾ മന്ത്രി നേരിട്ട് കൈകാര്യം ചെയ്യുന്നില്ലെങ്കിലും രാഷ്ട്രീയ ഉത്തരവാദിത്തം ഏറ്റെടുക്കുകയാണെന്നാണ് പെവ്കുറിന്റെ നിലപാട്. പ്രധാനമന്ത്രി ക്രിസ്റ്റൻ മിഖാലും പെവ്കുറിന് വ്യക്തിപരമായ തെറ്റുണ്ടെന്ന് കരുതുന്നില്ലെന്ന് വ്യക്തമാക്കിയിട്ടുണ്ട്.