ന്യൂഡൽഹി, ജൂലൈ 9:

ടെലിവിഷൻ ചാനലുകളിൽ ഓരോ മണിക്കൂറിലും പരസ്യസമയം പരമാവധി 12 മിനിറ്റായി പരിമിതപ്പെടുത്തിയ ടെലികോം റെഗുലേറ്ററി അതോറിറ്റി ഓഫ് ഇന്ത്യയുടെ (TRAI) നടപടി നിയമപരമായി സാധുവാണെന്ന് ഡൽഹി ഹൈക്കോടതി വിധിച്ചു. ട്രായുടെ ഉത്തരവിനെ ചോദ്യം ചെയ്ത് ചാനൽ ഉടമകളും വിവിധ ബ്രോഡ്കാസ്റ്റിംഗ് കൂട്ടായ്മകളും നൽകിയ ഹർജികൾ തള്ളിക്കൊണ്ടാണ് ജസ്റ്റിസ് അനിൽ ക്ഷേത്രപാൽ, ജസ്റ്റിസ് അമിത് മഹാജൻ എന്നിവരുൾപ്പെട്ട ഡിവിഷൻ ബെഞ്ചിന്റെ നിർണായക വിധി. 9എക്സ് മീഡിയ, സൺ ടി.വി നെറ്റ്‌വർക്ക്, ബി4യു, ന്യൂസ് ബ്രോഡ്കാസ്റ്റേഴ്‌സ് തുടങ്ങിയ പ്രമുഖ മാധ്യമസ്ഥാപനങ്ങളാണ് ട്രായിക്കും കേന്ദ്ര സർക്കാരിനുമെതിരെ കോടതിയെ സമീപിച്ചിരുന്നത്.

മണിക്കൂറിൽ 10 മിനിറ്റ് പരസ്യം, 2 മിനിറ്റ് പ്രൊമോ മാത്രം

ഒരു മണിക്കൂറിൽ പരമാവധി 10 മിനിറ്റ് വാണിജ്യ പരസ്യങ്ങളും 2 മിനിറ്റ് ചാനലിന്റെ സ്വന്തം പ്രൊമോഷണൽ ഉള്ളടക്കങ്ങളും മാത്രമേ സംപ്രേഷണം ചെയ്യാവൂ എന്ന ട്രായുടെ നിബന്ധന തികച്ചും ന്യായമാണ്. പ്രേക്ഷകരുടെ കാഴ്ചാനുഭവം മെച്ചപ്പെടുത്താനും അമിത പരസ്യങ്ങൾ നിയന്ത്രിക്കാനും ഇത്തരം മാനദണ്ഡങ്ങൾ അത്യാവശ്യമാണെന്ന് കോടതി വിലയിരുത്തി.

അപരിമിത ലാഭത്തിന് ഭരണഘടനാപരമായ അവകാശമില്ല

പരസ്യസമയത്തിലെ നിയന്ത്രണം തങ്ങളുടെ വ്യാപാരസ്വാതന്ത്ര്യത്തെ ബാധിക്കുന്നുവെന്ന ബ്രോഡ്കാസ്റ്റർമാരുടെ വാദം ഹൈക്കോടതി തള്ളി. പൊതുസമ്പത്തായ ബ്രോഡ്കാസ്റ്റ് സ്പെക്ട്രം ഉപയോഗിച്ച് ചാനലുകൾക്ക് പരിധിയില്ലാതെ ലാഭമുണ്ടാക്കാൻ ഭരണഘടനാപരമായ അവകാശമില്ലെന്ന് കോടതി വ്യക്താമാക്കി.

ട്രായിയുടെ അധികാരപരിധി ശരിവെച്ചു

ടെലിവിഷൻ സംപ്രേഷണ സേവനങ്ങളുടെ ഗുണനിലവാരം ഉറപ്പാക്കാൻ ട്രായിക്ക് പൂർണ നിയമപരമായ അധികാരമുണ്ടെന്ന് ഹൈക്കോടതി നിരീക്ഷിച്ചു. ഉപഭോക്താക്കളുടെ താൽപ്പര്യം സംരക്ഷിക്കുക എന്ന ലക്ഷ്യം ഇതിന് പിന്നിലുണ്ടെന്ന് ഉത്തരവിൽ ചൂണ്ടിക്കാട്ടുന്നു.

2013 മുതലുള്ള നിയമപോരാട്ടത്തിന് അവസാനം

ഹർജികൾ തള്ളിയതോടെ 2013 മുതൽ നിലനിൽക്കുന്ന നിയമപോരാട്ടത്തിനാണ് വിരാമമാകുന്നത്. ഈ വിധിയോടെ ചാനലുകളിൽ പരസ്യപരിധി കർശനമായി നടപ്പാക്കാൻ ട്രായിക്ക് വഴിതെളിഞ്ഞു. രാജ്യത്തെ ടെലിവിഷൻ മാധ്യമരംഗത്തും അവയുടെ വരുമാന മാതൃകയിലും വൻ മാറ്റങ്ങൾ വരുത്താൻ പോകുന്നതാണ് ഹൈക്കോടതിയുടെ ഈ നിർണായക ഉത്തരവ്.