ന്യൂഡൽഹി, 2026 ജൂലൈ 8- 

ഇലക്ട്രിക് വാഹനങ്ങളുടെ (EV) ബാറ്ററി സംവിധാനങ്ങളെ നിയന്ത്രിക്കുന്ന മൊബൈൽ ആപ്ലിക്കേഷനുകളിലെ സുരക്ഷാ വീഴ്ചകളെക്കുറിച്ചുള്ള ആശങ്കകൾ ശക്തമായ പശ്ചാത്തലത്തിൽ, വാഹന വ്യവസായ മേഖലയിൽ സൈബർസുരക്ഷ കർശനമാക്കാൻ കേന്ദ്ര സർക്കാർ അടിയന്തര നിർദേശം നൽകി. ഇവി ബാറ്ററികളുടെ കമ്മ്യൂണിക്കേഷൻ ഇന്റർഫേസുകൾ കൃത്യമായി പരിശോധിക്കാനും, സുരക്ഷിതമല്ലാത്ത ഡിഫോൾട്ട് സെറ്റിംഗുകൾ, ദുർബലമായ ഓതന്റിക്കേഷൻ സംവിധാനങ്ങൾ, സുരക്ഷയില്ലാത്ത ‘ഓവർ-ദി-എയർ’ (OTA) അപ്ഡേറ്റുകൾ എന്നിവ അടിയന്തരമായി ഒഴിവാക്കാനുമാണ് നിർദേശം.

വാഹന കമ്പനികൾക്കും പരിശോധനാ ഏജൻസികൾക്കും കർശന മുന്നറിയിപ്പ്

രാജ്യത്തെ വാഹന നിർമ്മാണ മേഖലയ്ക്കും ബന്ധപ്പെട്ട പരിശോധനാ ഏജൻസികൾക്കും കേന്ദ്ര സർക്കാർ രേഖാമൂലം മുന്നറിയിപ്പ് നൽകിയിട്ടുണ്ട്. കൂടുതൽ ജാഗ്രത പുലർത്തുക, സുരക്ഷിതമായ വാഹന രൂപകൽപ്പന ഉറപ്പാക്കുക, ഇന്ത്യയുടെ ഓട്ടോമോട്ടീവ് സൈബർസുരക്ഷാ മാനദണ്ഡങ്ങളായ AIS-189, AIS-190 എന്നിവ സമയബന്ധിതമായി നടപ്പാക്കുക എന്നീ മൂന്ന് പ്രധാന കാര്യങ്ങളാണ് കേന്ദ്രം ആവശ്യപ്പെട്ടിരിക്കുന്നത്. വാഹന നിർമ്മാതാക്കൾ (OEMs) തങ്ങളുടെ ബാറ്ററി സംവിധാനങ്ങളിൽ അടിയന്തരമായി ഓഡിറ്റിംഗ് നടത്തുന്നുണ്ടെന്ന് ഉറപ്പാക്കാൻ ‘സിയാം’ (SIAM) പോലുള്ള വ്യവസായ സംഘടനകളോടും സർക്കാർ നിർദേശിച്ചിട്ടുണ്ട്.

സുരക്ഷ ഇനി രൂപകൽപ്പന ഘട്ടം മുതൽ

വാഹനം വിപണിയിലിറക്കിയ ശേഷം സുരക്ഷാ പ്രശ്നങ്ങൾ പരിഹരിക്കുന്ന രീതിക്ക് പകരം, വാഹന രൂപകൽപ്പനയുടെ പ്രാരംഭ ഘട്ടം മുതൽ തന്നെ സൈബർസുരക്ഷയ്ക്ക് മുൻഗണന നൽകണമെന്നാണ് കേന്ദ്ര നിലപാട്. ഇതിനായി റോഡ് ഗതാഗത-ഹൈവേ മന്ത്രാലയം, ഇലക്ട്രോണിക്സ്-ഐടി മന്ത്രാലയം എന്നിവയുമായി സഹകരിച്ച് കമ്പനികൾ സുരക്ഷാ സംവിധാനങ്ങൾ ശക്തമാക്കണം. കൂടാതെ, ‘സൈബർ സെക്യൂരിറ്റി മാനേജ്മെന്റ് സിസ്റ്റവും’ ‘സോഫ്റ്റ്‌വെയർ അപ്ഡേറ്റ് മാനേജ്മെന്റ് സിസ്റ്റവും’ നിർബന്ധമായും സജ്ജമാക്കേണ്ടതുണ്ട്.

ഏഴ് ബാറ്ററി ആപ്പുകൾക്കെതിരെ നടപടി

ഇ-റിക്ഷകൾ ഉൾപ്പെടെയുള്ള ഇലക്ട്രിക് വാഹനങ്ങളുടെ ബാറ്ററികൾ റിമോട്ടായി (ദൂരത്തിരുന്ന്) പ്രവർത്തനരഹിതമാക്കാൻ ഇത്തരം ആപ്പുകൾ ദുരുപയോഗം ചെയ്യപ്പെട്ടേക്കാമെന്ന കണ്ടെത്തലിനെത്തുടർന്ന്, കഴിഞ്ഞ ആഴ്ച ഇലക്ട്രോണിക്സ്-ഐടി മന്ത്രാലയം ഗൂഗിളിനും ആപ്പിളിനും നോട്ടീസ് നൽകിയിരുന്നു. സുരക്ഷാ ഭീഷണിയുയർത്തുന്ന ഏഴ് ബാറ്ററി മാനേജ്മെന്റ് ആപ്പുകൾ ആൻഡ്രോയ്ഡ്, ഐഒഎസ് ആപ്പ് സ്റ്റോറുകളിൽ നിന്ന് നീക്കം ചെയ്യാനാണ് നിർദേശം. ഇ-റിക്ഷകൾ ഇത്തരത്തിൽ അനായാസം ഓഫ് ചെയ്യുന്ന വീഡിയോകൾ സാമൂഹിക മാധ്യമങ്ങളിൽ പ്രചരിച്ചതിന് പിന്നാലെയാണ് നടപടി.

കുറഞ്ഞ സുരക്ഷയുള്ള ബാറ്ററി പാക്കുകൾ വൻ ഭീഷണി

ചില കുറഞ്ഞ ചെലവിലുള്ള ലിഥിയം ബാറ്ററി പാക്കുകളിൽ ഡിഫോൾട്ട് ഫാക്ടറി സെറ്റിംഗുകൾ നിലനിർത്തുന്നതും, ദുർബലമായ പാസ്‌വേഡുകളും, ബ്ലൂടൂത്ത് ഓതന്റിക്കേഷന്റെ അഭാവവും ഗുരുതരമായ സുരക്ഷാ ഭീഷണിയാണ് ഉയർത്തുന്നത്. ഇത്തരം സുരക്ഷാ വീഴ്ചകൾ ഉള്ളപ്പോൾ, വാഹനത്തിന് 10 മുതൽ 15 മീറ്റർ വരെ പരിധിയിലുള്ള ഏതൊരാൾക്കും ആപ്പ് വഴി ബാറ്ററി മാനേജ്മെന്റ് സിസ്റ്റത്തിലേക്ക് പ്രവേശിച്ച് ബാറ്ററിയുടെ ഡിസ്ചാർജ് ഫംഗ്ഷൻ ഓഫ് ചെയ്യാൻ സാധിക്കും. ഇത് വാഹനം പാതിവഴിയിൽ പെട്ടെന്ന് നിലച്ചുപോകാൻ കാരണമാകുമെന്നും സർക്കാർ ചൂണ്ടിക്കാട്ടുന്നു.