ന്യൂഡൽഹി / 2026 / നവംബർ 22
ന്യൂഡൽഹിയിലെ ഭാരത് മണ്ഡപത്തിൽ നവംബർ 20, 21 തീയതികളിൽ നടന്ന ആഗോള ഡിജിറ്റൽ ആരോഗ്യ ഉച്ചകോടിയിൽ ഡിജിറ്റൽ ഇന്ത്യ ഭാഷിണി വിഭാഗം പങ്കെടുത്തു. രണ്ടുദിവസത്തെ ഉച്ചകോടിയിൽ ബഹുഭാഷാ നിർമിതബുദ്ധി സംവിധാനങ്ങൾ ഭാഷിണി പരിചയപ്പെടുത്തി. ചികിത്സാസേവനങ്ങൾ മെച്ചപ്പെടുത്താനും ആശുപത്രികളിലെ ജോലികൾ എളുപ്പമാക്കാനും ഭാഷാ സാങ്കേതികവിദ്യ എങ്ങനെ ഉപയോഗിക്കാമെന്ന് അവതരിപ്പിച്ചു. സ്വന്തം ഭാഷയിൽ കാര്യങ്ങൾ മനസ്സിലാക്കാനും സംസാരിക്കാനും കഴിയുമ്പോൾ കൂടുതൽ പേർക്ക് ആരോഗ്യസേവനങ്ങൾ പ്രാപ്യമാകുമെന്ന് സമാപനദിവസത്തെ മുഖ്യപ്രഭാഷണത്തിൽ ഭാഷിണി സി.ഇ.ഒ. അമിതാഭ് നാഗ് പറഞ്ഞു. കേന്ദ്ര ഇലക്ട്രോണിക്സ്, വിവരസാങ്കേതികവിദ്യാ മന്ത്രാലയത്തിന് കീഴിലുള്ള ഡിജിറ്റൽ ഇന്ത്യ കോർപ്പറേഷന്റെ ഭാഗമാണ് ഭാഷിണി വിഭാഗം.

രോഗിയുടെ ഭാഷയിൽ സംസാരിക്കുമ്പോൾ
നിർമിതബുദ്ധി ഉപയോഗിച്ച് ആരോഗ്യരംഗത്തെ ഭാഷാതടസ്സങ്ങൾ നീക്കാനുള്ള ഭാഷിണിയുടെ മാതൃകയാണ് അമിതാഭ് നാഗ് മുഖ്യപ്രഭാഷണത്തിൽ വിശദീകരിച്ചത്. ഡിജിറ്റൽ ആരോഗ്യ സംവിധാനങ്ങളിൽ ഭാഷാ സാങ്കേതികവിദ്യ കൂടി ഉൾപ്പെടുത്തണമെന്ന് അദ്ദേഹം പറഞ്ഞു. അങ്ങനെ ചെയ്താൽ രോഗികൾക്ക് ഇഷ്ടമുള്ള ഭാഷയിൽ കാര്യങ്ങൾ മനസ്സിലാക്കാനും ആരോഗ്യപ്രവർത്തകരുമായി സംസാരിക്കാനും സേവനങ്ങൾ ഉപയോഗിക്കാനും കഴിയും. ഡിജിറ്റൽ ആരോഗ്യരംഗത്ത് നിർണായകമായിട്ടും പലപ്പോഴും വേണ്ടത്ര ശ്രദ്ധ കിട്ടാത്ത ഘടകമാണ് ഭാഷ. ഡോക്ടറും രോഗിയും തമ്മിലുള്ള ആശയവിനിമയം മെച്ചപ്പെടുത്താനും ചികിത്സാ രേഖകൾ തയ്യാറാക്കുന്നത് എളുപ്പമാക്കാനും വൈദ്യവിവരങ്ങൾ ലഭ്യമാക്കാനും ബഹുഭാഷാ എഐ എങ്ങനെ സഹായിക്കുമെന്ന് അദ്ദേഹം വിശദീകരിച്ചു.
രോഗനിർണയത്തിനും മരുന്നിനുമൊപ്പം ഡോക്ടർമാരും പരിചരിക്കുന്നവരും രോഗികളും തമ്മിലുള്ള മനുഷ്യബന്ധത്തിനും രോഗമുക്തിയിൽ പങ്കുണ്ടെന്ന് നാഗ് പറഞ്ഞു. ബോഡോ, മറാത്തി, പഞ്ചാബി, മൈഥിലി തുടങ്ങിയ സ്വന്തം ഭാഷകളിൽ ചികിത്സയെക്കുറിച്ച് സംസാരിക്കുമ്പോൾ രോഗിക്ക് കാര്യങ്ങൾ എളുപ്പം പിടികിട്ടും. പരിചിതമായ ഭാഷയിൽ ആശ്വാസം പകരുകയും രോഗിയുടെ ആശങ്ക മനസ്സിലാക്കുകയും ചെയ്യുന്നത് വിശ്വാസം വളർത്തും. ആരോഗ്യപ്രവർത്തകരുമായുള്ള അടുപ്പവും കൂടും. തങ്ങൾ പറയുന്നത് കേൾക്കുന്നുണ്ടെന്നും മനസ്സിലാക്കുന്നുണ്ടെന്നും രോഗികൾക്ക് തോന്നുന്ന തരത്തിൽ ആശയവിനിമയം മെച്ചപ്പെടുത്താൻ ഭാഷിണിയുടെ സംവിധാനങ്ങൾ സഹായിക്കുമെന്ന് അവതരണത്തിൽ ചൂണ്ടിക്കാട്ടി.

രോഗലക്ഷണങ്ങൾ നാട്ടുഭാഷയിൽ ശേഖരിക്കും
ആരോഗ്യരംഗത്തിനുള്ള ഭാഷാദാൻ പദ്ധതിയും മുഖ്യപ്രഭാഷണത്തിൽ അവതരിപ്പിച്ചു. ചികിത്സയ്ക്കും പൊതുജനാരോഗ്യത്തിനും വേണ്ട ഭാഷാ വിവരങ്ങൾ ഒരുക്കുന്നതിൽ ജനങ്ങളുടെ പങ്കാളിത്തം പ്രധാനമാണെന്ന് നാഗ് പറഞ്ഞു. ഈ സംഭാവനകൾ ആരോഗ്യരംഗത്തെ ബഹുഭാഷാ എഐ സംവിധാനങ്ങൾ മെച്ചപ്പെടുത്താനും സഹായിക്കും.
രോഗലക്ഷണങ്ങളും ആരോഗ്യപ്രശ്നങ്ങളും വിവരിക്കാൻ ആളുകൾ നിത്യജീവിതത്തിൽ ഉപയോഗിക്കുന്ന വാക്കുകളും പ്രയോഗങ്ങളും ശേഖരിക്കുന്ന പദ്ധതിയാണ് ഡാറ്റാ ദാൻ ഫോർ ഹെൽത്ത്. ഓരോ പ്രയോഗത്തിനും ചേരുന്ന വൈദ്യപദവും ഒപ്പം രേഖപ്പെടുത്തി വിവിധ ഭാഷകളിലായി വിവരശേഖരം ഒരുക്കുകയാണ് ലക്ഷ്യം. വൈദ്യശാസ്ത്ര പദങ്ങളുമായി നേരിട്ട് പൊരുത്തപ്പെടാത്ത നാട്ടുപ്രയോഗങ്ങളും ഇതിൽ ഉൾപ്പെടും. ഉദാഹരണമായി, ‘കാലിൽ വെള്ളം നിറഞ്ഞു’ എന്ന പ്രയോഗത്തെ നീർക്കെട്ട് എന്നർഥമുള്ള ‘ഈഡിമ’ എന്ന വൈദ്യപദവുമായി ബന്ധിപ്പിക്കാം. ഇന്ത്യൻ ഭാഷകളിലെ ഇത്തരം പ്രയോഗങ്ങൾ വൈദ്യപദങ്ങളുമായി ചേർത്തുവെക്കുന്നതിലൂടെ രോഗികൾ പറയുന്ന ലക്ഷണങ്ങളും ആരോഗ്യപ്രശ്നങ്ങളും എഐക്ക് കൂടുതൽ നന്നായി തിരിച്ചറിയാൻ കഴിയുമെന്നാണ് പ്രതീക്ഷ. രോഗികളും ആരോഗ്യപ്രവർത്തകരും തമ്മിലുള്ള ആശയവിനിമയം മെച്ചപ്പെടുത്താനും ഇത് ലക്ഷ്യമിടുന്നു.
ഡോക്ടർ പറയുന്നത് ചികിത്സാരേഖയാകും
ഭാഷിണിയുടെ പ്രദർശന സ്റ്റാളിൽ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് എന്ന എയിംസ്, ജവാഹർലാൽ ഇൻസ്റ്റിറ്റ്യൂട്ട് ഓഫ് പോസ്റ്റ് ഗ്രാജ്വേറ്റ് മെഡിക്കൽ എജ്യുക്കേഷൻ ആൻഡ് റിസർച്ച് എന്ന ജിപ്മർ, കരസേനയുടെ ഡയറക്ടറേറ്റ് ജനറൽ ഓഫ് മെഡിക്കൽ സർവീസസ് എന്നിവിടങ്ങളിലെ ഉദാഹരണങ്ങൾ അവതരിപ്പിച്ചു. ഇവിടങ്ങളിൽ സംസാരവും ഭാഷയും കൈകാര്യം ചെയ്യുന്ന സാങ്കേതികവിദ്യ ചികിത്സയ്ക്കായി എങ്ങനെ ഉപയോഗിക്കുന്നുവെന്ന് പ്രദർശനം കാണിച്ചു.
ജിപ്മറിൽ ഇ-ഭാഷിണിയെ ഇ-സുശ്രുത് ആശുപത്രി വിവരനിർവഹണ സംവിധാനവുമായി ബന്ധിപ്പിച്ചിട്ടുണ്ട്. രോഗിയുടെ ചികിത്സാ ചരിത്രവും കിടത്തിച്ചികിത്സയിലെ കുറിപ്പുകളും ആശുപത്രി വിടുമ്പോൾ നൽകുന്ന നിർദേശങ്ങളും സംസാരത്തിലൂടെ രേഖപ്പെടുത്താൻ ഇതിലൂടെ കഴിയും. വ്യത്യസ്ത ഭാഷകൾ സംസാരിക്കുന്ന ഡോക്ടർമാർക്കും രോഗികൾക്കും ആശയവിനിമയം നടത്താൻ സഹായിക്കുന്ന സാങ്കേതികവിദ്യ എയിംസ് അവതരിപ്പിച്ചു. സംസാരത്തെ എഴുത്താക്കി മാറ്റുന്ന ഭാഷിണി സൗകര്യം നാഷണൽ ഇൻഫർമാറ്റിക്സ് സെന്ററിന്റെ ഇ-ഹോസ്പിറ്റൽ മരുന്നുകുറിപ്പ് സംവിധാനവുമായി ബന്ധിപ്പിച്ചതും കാണിച്ചു. കരസേനയുടെ ഐ-ധന്വന്തരി സംവിധാനത്തിൽ ഡോക്ടർമാർ പറഞ്ഞുനൽകുന്ന ചികിത്സാക്കുറിപ്പുകൾ എഴുത്തുരൂപത്തിലാക്കി രേഖപ്പെടുത്തുന്നതും പ്രദർശിപ്പിച്ചു.

സംസാരിച്ച് ഉപയോഗിക്കാവുന്ന ആരോഗ്യസഹായി
ഡോക്ടറും രോഗിയും വ്യത്യസ്ത ഭാഷകളിൽ സംസാരിക്കുമ്പോഴും പരസ്പരം മനസ്സിലാക്കാൻ ഭാഷിണിയുടെ സംവിധാനങ്ങൾ എങ്ങനെ സഹായിക്കുമെന്ന് സ്റ്റാളിൽ കാണിച്ചു. ചികിത്സാസംബന്ധമായ കാര്യങ്ങൾ രോഗിക്ക് മനസ്സിലാകാനും കൂടുതൽ പേർക്ക് ഇത്തരം സംവിധാനങ്ങൾ ഉപയോഗിക്കാനും ഇതിലൂടെ കഴിയും. സംസാരിച്ച് ഇടപഴകാവുന്ന എഐ ആരോഗ്യസഹായിയെയും സ്റ്റാളിൽ പരിചയപ്പെടുത്തി. ശബ്ദത്തിലൂടെ ചോദ്യങ്ങൾ ചോദിക്കാനും മറുപടി നേടാനും കഴിയുന്ന സംവിധാനം ആരോഗ്യസാങ്കേതിക സേവനങ്ങൾ ഉപയോഗിക്കുന്നത് കൂടുതൽ എളുപ്പവും സ്വാഭാവികവുമാക്കുന്നതെങ്ങനെയെന്ന് പ്രദർശനം വിശദീകരിച്ചു.
വിവർത്തനത്തിനും ശബ്ദം ഉപയോഗിച്ചുള്ള സേവനങ്ങൾക്കുമുള്ള ഭാഷിണി മൊബൈൽ ആപ്പും പ്രദർശിപ്പിച്ചു. പല ഭാഷകളിലെ സംസാരം തത്സമയം എഴുത്താക്കി മാറ്റാനും വിവർത്തനം ചെയ്യാനും കഴിയുന്ന ശ്രുത്ലേഖും അവതരിപ്പിച്ചു. രോഗലക്ഷണങ്ങൾ വിവരിക്കുന്ന നാട്ടുപ്രയോഗങ്ങളും അവയ്ക്കു ചേരുന്ന വൈദ്യപദങ്ങളും ജനപങ്കാളിത്തത്തോടെ ശേഖരിക്കുന്ന ഡാറ്റാ ദാൻ ഫോർ ഹെൽത്ത് പദ്ധതിയും സ്റ്റാളിലുണ്ടായിരുന്നു. എഴുത്തിലും വാമൊഴിയിലുമുള്ള ഭാഷാ വിവരങ്ങൾ ശേഖരിച്ച് ഡിജിറ്റൽ രൂപത്തിലാക്കാൻ വഴികാട്ടുന്ന ഗ്രന്ഥികയും പരിചയപ്പെടുത്തി. ആശുപത്രികളിലെ ഉപയോഗാനുഭവവും ശബ്ദ സാങ്കേതികവിദ്യയും വൈദ്യഭാഷാ വിവരങ്ങളും ജനങ്ങളുടെ സംഭാവനയും ഒന്നിച്ചുചേരുമ്പോൾ ബഹുഭാഷാ എഐക്ക് വിവർത്തനത്തിനപ്പുറം ആരോഗ്യസംവിധാനങ്ങളിൽ പങ്കുവഹിക്കാനാകുമെന്ന് പ്രഭാഷണവും പ്രദർശനവും ചൂണ്ടിക്കാട്ടി. ഇന്ത്യയിലെ ഭാഷാവൈവിധ്യം കണക്കിലെടുത്ത് ആരോഗ്യസേവനങ്ങൾ കൂടുതൽ പ്രാപ്യവും കാര്യക്ഷമവുമാക്കാനും രോഗികളോട് കരുതലോടെ ഇടപെടാനും ഇത്തരം സംവിധാനങ്ങൾ സഹായിക്കുമെന്ന് ഭാഷിണി വ്യക്തമാക്കി.
ഭാഷിണിയുടെ സേവനങ്ങളും ഉച്ചകോടിയുടെ ലക്ഷ്യവും
നിർമിതബുദ്ധിയുടെ സഹായത്തോടെ വിവിധ ഭാഷകൾ സംസാരിക്കുന്നവർക്ക് ഡിജിറ്റൽ സേവനങ്ങൾ ലഭ്യമാക്കാനുള്ള ദേശീയ സംവിധാനം ഒരുക്കുകയാണ് ഡിജിറ്റൽ ഇന്ത്യ ഭാഷിണി വിഭാഗം. എഴുത്തുരൂപത്തിൽ 36 ഇന്ത്യൻ ഭാഷകൾക്കും ശബ്ദരൂപത്തിൽ 23 ഇന്ത്യൻ ഭാഷകൾക്കും പുറമെ 35 അന്താരാഷ്ട്ര ഭാഷകൾക്കും ഭാഷിണി പിന്തുണ നൽകുന്നു. സർക്കാർ ഡിജിറ്റൽ സേവനങ്ങളിലും പൊതുജനങ്ങൾ ഉപയോഗിക്കുന്ന മറ്റ് ഡിജിറ്റൽ സേവനങ്ങളിലും ഭാഷാ എഐ സൗകര്യങ്ങൾ ചേർക്കാനും ഇതിലൂടെ കഴിയും. ഭാഷിണിയുടെ എഐ മോഡലുകൾ ഇതുവരെ 1,100 കോടിയിലധികം തവണ ഫലം നൽകിയിട്ടുണ്ട്. പ്രതിദിനം ഏകദേശം 2 കോടി 40 ലക്ഷം തവണയാണ് മോഡലുകൾ ഫലം നൽകുന്നത്. ബഹുഭാഷാ എഐ സാങ്കേതികവിദ്യയുടെ ഉപയോഗം കൂടുന്നതാണ് ഈ കണക്കുകൾ കാണിക്കുന്നത്. വിവർത്തനം, സംസാരം തിരിച്ചറിയൽ, എഴുത്ത് ശബ്ദമാക്കൽ, ഒരു ലിപിയിലെ വാക്ക് മറ്റൊരു ലിപിയിൽ എഴുതൽ എന്നിവയുൾപ്പെടെയുള്ള സേവനങ്ങൾ വിവിധ ഭാഷകൾ സംസാരിക്കുന്നവർക്ക് ഡിജിറ്റൽ വിവരങ്ങളും സേവനങ്ങളും ഉപയോഗിക്കാൻ സഹായിക്കുന്നു.
‘നിർമിതബുദ്ധി നടപ്പാക്കൽ, എഐ പ്രവർത്തനത്തിൽ’ എന്ന പ്രമേയത്തിലാണ് ആഗോള ഡിജിറ്റൽ ആരോഗ്യ ഉച്ചകോടി നടന്നത്. സർക്കാർ, ആരോഗ്യരംഗം, വ്യവസായം, അക്കാദമിക മേഖല എന്നിവിടങ്ങളിൽ നിന്നുള്ളവർ പങ്കെടുത്തു. ആരോഗ്യരംഗത്ത് എഐ പ്രായോഗികമായി എങ്ങനെ നടപ്പാക്കാമെന്ന് സാങ്കേതിക പ്രദർശനങ്ങളിലൂടെയും പ്രവർത്തനാവതരണങ്ങളിലൂടെയും ശാസ്ത്രീയ ചർച്ചകളിലൂടെയും ആശയവിനിമയങ്ങളിലൂടെയും പരിശോധിച്ചു. ഡിജിറ്റൽ ആരോഗ്യ സംവിധാനങ്ങൾ വികസിപ്പിക്കാനും വിവിധ ആരോഗ്യസംവിധാനങ്ങളിൽ അവയുടെ ഉപയോഗം വ്യാപിപ്പിക്കാനുമായിരുന്നു ചർച്ചകൾ.

.
.