ആലപ്പുഴ, 2026 ജൂൺ 29 –
മൈക്രോഫിനാൻസ് തട്ടിപ്പ് കേസിൽ വെള്ളാപ്പള്ളി നടേശനെതിരെ കുറ്റപത്രം സമർപ്പിച്ചതിനെ മുൻ മുഖ്യമന്ത്രി വി.എസ്. അച്യുതാനന്ദൻ വർഷങ്ങൾക്കുമുമ്പ് ആരംഭിച്ച വിട്ടുവീഴ്ചയില്ലാത്ത നിയമപോരാട്ടത്തിന്റെ വലിയ വിജയമായി വിശേഷിപ്പിച്ച് വി.എ. അരുണ്കുമാർ. ഫേസ്ബുക്ക് പോസ്റ്റിലൂടെയായിരുന്നു അദ്ദേഹത്തിന്റെ പ്രതികരണം. ഭരണകൂടങ്ങൾ മാറിയാലും നീതിയുടെ വഴി അത്ര എളുപ്പത്തിൽ അടഞ്ഞുപോകില്ലെന്ന് ഈ കുറ്റപത്രം തെളിയിക്കുന്നുവെന്നും അദ്ദേഹം പറഞ്ഞു.
ഈ കേസിന്റെ നിയമനടപടികൾ ഒരിക്കലും എളുപ്പമായിരുന്നില്ലെന്നും അരുണ്കുമാർ കുറിച്ചു. ഒരുഘട്ടത്തിൽ ‘തുടർനടപടികൾ അവസാനിപ്പിച്ചു’ എന്ന നിലപാട് സ്വീകരിച്ച് കേസ് റഫർ ചെയ്ത് അട്ടിമറിക്കാൻ പൊലീസ് ശ്രമിച്ചിരുന്നുവെന്നും അദ്ദേഹം ആരോപിച്ചു. അച്യുതാനന്ദന്റെ പ്രായവും ആരോഗ്യപ്രശ്നങ്ങളും മുതലെടുത്ത് നിയമപോരാട്ടം ദുർബലപ്പെടുത്താൻ ശ്രമം നടന്നുവെന്നും അദ്ദേഹം ഫേസ്ബുക്ക് കുറിപ്പിൽ വ്യക്തമാക്കി.
അച്ഛന്റെ നിർദേശപ്രകാരവും അദ്ദേഹത്തിന്റെ പ്രതിനിധിയായും കോടതികളിൽ നേരിട്ട് ഹാജരായ ദിവസങ്ങൾ ഇന്നും ഓർമയിലുണ്ടെന്ന് അരുണ്കുമാർ പറഞ്ഞു. അച്യുതാനന്ദൻ ആരംഭിച്ച നീതിപോരാട്ടങ്ങൾ അവസാന വിജയം കാണുന്നതുവരെ ഒപ്പമുണ്ടാകുമെന്നും, കള്ളങ്ങൾ എത്ര മറച്ചുവെച്ചാലും അധികാരത്തിന്റെ ഏത് തണലുണ്ടായാലും നിയമത്തിന്റെ വഴിയിൽ സത്യം പുറത്തുവരുമെന്നും അദ്ദേഹം കൂട്ടിച്ചേർത്തു.
