മുസ്‌ലിം ലീഗ് മുൻ സംസ്ഥാന അധ്യക്ഷൻ പാണക്കാട് മുഹമ്മദലി ശിഹാബ് തങ്ങളെക്കുറിച്ച് വ്യാജവും അശ്ലീലവുമായ ചിത്രം പ്രചരിപ്പിച്ച സംഭവത്തിൽ യുവാവിനെതിരെ ചോമ്പാല പൊലീസ് കേസെടുത്തു. കുഞ്ഞിരപ്പള്ളി സ്വദേശി അഫ്‌നാസിനെതിരെയാണ് നടപടി. വാട്സ്ആപ്പ് ഗ്രൂപ്പിലൂടെ വ്യാജ ചിത്രം പ്രചരിപ്പിച്ചെന്ന പരാതിയെ തുടർന്നാണ് കേസ് രജിസ്റ്റർ ചെയ്തത്.

ലീഗ് പ്രവർത്തകൻ നൽകിയ പരാതിയുടെ അടിസ്ഥാനത്തിലാണ് പൊലീസ് നടപടി സ്വീകരിച്ചത്. സമൂഹത്തിൽ ലഹളയുണ്ടാക്കുക എന്ന ഉദ്ദേശ്യത്തോടെ മുഹമ്മദലി ശിഹാബ് തങ്ങൾ ഗർഭിണിയായ ഒരു സ്ത്രീയുടെ വയറിൽ പിടിച്ച് നിൽക്കുന്നതായി തോന്നിക്കുന്ന വ്യാജചിത്രം പ്രതി പ്രചരിപ്പിച്ചെന്നാണ് എഫ്.ഐ.ആറിൽ പറയുന്നത്. “നമ്മൾ രാഷ്ട്രീയം പറയും” എന്ന പേരിലുള്ള വാട്സ്ആപ്പ് ഗ്രൂപ്പിലൂടെയാണ് ചിത്രം പങ്കുവെച്ചതെന്നും പൊലീസ് വ്യക്തമാക്കി.

രണ്ടുമാസം മുൻപും സമാന സംഭവത്തിൽ മറ്റൊരാൾക്കെതിരെ കേസെടുത്തിരുന്നു. ഉറവകുഴി സ്വദേശി കെ. ഇ. നൗഷാദ് ഫേസ്ബുക്കിലൂടെ മുഹമ്മദലി ശിഹാബ് തങ്ങളെ ആർ.എസ്.എസ്. യൂണിഫോമിൽ നിൽക്കുന്നതായി എഡിറ്റ് ചെയ്ത വ്യാജചിത്രം പ്രചരിപ്പിച്ചെന്ന പരാതിയിലായിരുന്നു അന്നത്തെ നടപടി. തുടർച്ചയായി ഇത്തരത്തിലുള്ള വ്യാജചിത്രങ്ങൾ പ്രചരിക്കുന്ന സാഹചര്യത്തിലാണ് പുതിയ കേസും രജിസ്റ്റർ ചെയ്തിരിക്കുന്നത്.