ആരോഗ്യ-കുടുംബക്ഷേമ കേന്ദ്ര കൗൺസിലിന്റെ പതിനാറാം സമ്മേളനം ഇരുപത്തൊൻപതിന് ഡൽഹിയിൽ

ന്യൂഡൽഹി, 2026 ജൂൺ 27

ആരോഗ്യ-കുടുംബക്ഷേമ കേന്ദ്ര കൗൺസിലിന്റെ പതിനാറാം സമ്മേളനം ജൂൺ ഇരുപത്തൊൻപതിന് ന്യൂഡൽഹിയിലെ വിജ്ഞാൻ ഭവനിൽ നടക്കും. കേന്ദ്ര ആരോഗ്യ-കുടുംബക്ഷേമ മന്ത്രി ജെ. പി. നദ്ദയുടെ അധ്യക്ഷതയിലാണ് സമ്മേളനം ചേരുന്നത്. കേന്ദ്ര ആരോഗ്യ-കുടുംബക്ഷേമ സഹമന്ത്രിമാരായ അനുപ്രിയ പട്ടേലും പ്രതാപ്‌റാവു ജാധവും സമ്മേളനത്തിൽ പങ്കെടുക്കും.

സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ആരോഗ്യ-കുടുംബക്ഷേമ മന്ത്രിമാർ, പാർലമെന്റ് അംഗങ്ങൾ, കേന്ദ്ര-സംസ്ഥാന സർക്കാരുകളിലെ മുതിർന്ന ഉദ്യോഗസ്ഥർ, ഔദ്യോഗികേതര അംഗങ്ങൾ, പ്രമുഖ വിദഗ്ധർ എന്നിവർ സമ്മേളനത്തിൽ പങ്കെടുക്കും. ദേശീയ ആരോഗ്യ ദൗത്യത്തിന്റെ ലക്ഷ്യങ്ങളും മുൻഗണനകളും, ഭക്ഷ്യ-മരുന്ന് പരിഷ്‌കാരങ്ങൾ, അനുബന്ധ ആരോഗ്യ സേവനങ്ങൾ എന്നീ വിഷയങ്ങളിലാണ് പ്രധാന ചർച്ചകൾ നടക്കുക. നിലവിലുള്ള പദ്ധതികൾ വിലയിരുത്താനും മികച്ച മാതൃകകൾ പങ്കുവെക്കാനും ഉയർന്നുവരുന്ന വെല്ലുവിളികൾ കണ്ടെത്താനും രാജ്യത്തെ ആരോഗ്യഫലങ്ങൾ മെച്ചപ്പെടുത്തുന്നതിനുള്ള ഏകോപിത പ്രവർത്തനരേഖ തയ്യാറാക്കാനുമാണ് ചർച്ചകൾ ലക്ഷ്യമിടുന്നത്.

ഭരണഘടനയിലെ ഇരുനൂറ്റി അറുപത്തിമൂന്നാം അനുച്ഛേദ പ്രകാരമാണ് ആരോഗ്യ-കുടുംബക്ഷേമ കേന്ദ്ര കൗൺസിൽ രൂപീകരിച്ചിരിക്കുന്നത്. ആരോഗ്യ-കുടുംബക്ഷേമ മന്ത്രാലയത്തിന്റെ പരമോന്നത ഉപദേശക സമിതിയായ കൗൺസിൽ ആരോഗ്യരംഗത്തെ നയങ്ങളും പദ്ധതികളും വിലയിരുത്തുകയും സംസ്ഥാനങ്ങളുടെയും കേന്ദ്രഭരണ പ്രദേശങ്ങളുടെയും സഹകരണത്തോടെ അവ ഫലപ്രദമായി നടപ്പാക്കാൻ ശുപാർശകൾ നൽകുകയും ചെയ്യുന്നു. കേന്ദ്രവും സംസ്ഥാനങ്ങളും തമ്മിലുള്ള നയചർച്ചകളും പൊതുജനാരോഗ്യ പദ്ധതികളുടെ ആസൂത്രണ-നടപ്പാക്കൽ ഏകോപനവും കൂടുതൽ ശക്തിപ്പെടുത്തുന്നതിനുള്ള പ്രധാന വേദിയായും ഈ സമ്മേളനം പ്രവർത്തിക്കും.