ന്യൂഡൽഹി, 2026 ജൂൺ 26 

രാജ്യത്തെ ഗ്രാമീണ യുവാക്കളെ സംരംഭകരാക്കി മാറ്റാൻ കേന്ദ്ര സൂക്ഷ്മ, ചെറുകിട, ഇടത്തരം വ്യവസായ മന്ത്രാലയത്തിന്റെ ആസ്പയർ പദ്ധതി കൂടുതൽ വ്യാപകമാകുന്നു. മേഘാലയയിലെ മൗസിൻറാമിൽ നിന്നുള്ള ബൻഷൈലാങ് മാർബാനിയാങ് എന്ന യുവാവിന്റെ അനുഭവമാണ് പദ്ധതിയുടെ നേട്ടമായി ചൂണ്ടിക്കാണിക്കുന്നത്. പ്രാദേശിക കാർഷിക വിഭവങ്ങൾ ഉപയോഗിച്ച് ഭക്ഷ്യസംസ്കരണ സംരംഭം ആരംഭിക്കാൻ അദ്ദേഹത്തിന് പദ്ധതിയിലൂടെ പരിശീലനവും പിന്തുണയും ലഭിച്ചു. ഗ്രാമങ്ങളിലും കാർഷിക മേഖലയുമായി ബന്ധപ്പെട്ട സംരംഭങ്ങൾ പ്രോത്സാഹിപ്പിക്കുകയാണ് പദ്ധതിയുടെ ലക്ഷ്യം.

സംരംഭം തുടങ്ങാൻ ആവശ്യമായ പരിശീലനം, മാർഗനിർദേശം, സാങ്കേതിക സഹായം, ധനസഹായത്തിലേക്കുള്ള വഴികാട്ടൽ എന്നിവ പദ്ധതിയുടെ ഭാഗമായി ലഭിക്കുന്നു. ജീവിതോപാധി ബിസിനസ് ഇൻകുബേറ്ററുകൾ വഴിയാണ് ഈ സഹായങ്ങൾ നൽകുന്നത്. ഉൽപ്പന്ന വികസനം, വിപണിയുമായി ബന്ധം, അംഗീകാരങ്ങൾ, നിയമപരമായ നടപടികൾ എന്നിവയിലും സംരംഭകർക്ക് പിന്തുണ ലഭിക്കുന്നു. ഭക്ഷ്യസംസ്കരണം, തേൻ ഉൽപ്പാദനം, മുള ഉൽപ്പന്നങ്ങൾ, കൂൺകൃഷി, സുഗന്ധവ്യഞ്ജന സംസ്കരണം, കരകൗശല ഉൽപ്പന്നങ്ങൾ, കയർ ഉൽപ്പന്നങ്ങൾ തുടങ്ങിയ മേഖലകളിൽ നിരവധി സംരംഭങ്ങൾ ഇതിനകം പ്രവർത്തനം ആരംഭിച്ചിട്ടുണ്ട്.

രണ്ടായിരത്തി പതിനഞ്ചിലാണ് പദ്ധതി ആരംഭിച്ചത്. തുടർന്ന് രണ്ടായിരത്തി പതിനെട്ടിലും രണ്ടായിരത്തി ഇരുപത്തിമൂന്നിലും മാർഗനിർദേശങ്ങൾ പുതുക്കി. ഈ വർഷം ജൂൺ വരെയുള്ള കണക്കുകൾ പ്രകാരം ഇരുപത്തിയേഴ് സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും നൂറ്റൊൻപത് ജീവിതോപാധി ബിസിനസ് ഇൻകുബേറ്ററുകൾക്ക് അംഗീകാരം നൽകിയിട്ടുണ്ട്. ഒരു ലക്ഷത്തി ഇരുപത്തിമൂവായിരത്തിലധികം പേർക്ക് പരിശീലനം ലഭിച്ചു. രണ്ടായിരത്തി ഇരുപത്തിരണ്ടുമുതൽ ആയിരത്തി ഇരുനൂറിലധികം സൂക്ഷ്മ സംരംഭങ്ങൾ രൂപീകരിക്കാൻ പദ്ധതി സഹായിച്ചു. ഇരുപത്തിയെട്ടായിരത്തി അഞ്ഞൂറിലധികം വനിതകൾക്കും പട്ടികജാതി, പട്ടികവർഗം, മറ്റു പിന്നാക്ക വിഭാഗങ്ങളിൽപ്പെട്ട ആയിരക്കണക്കിന് ഗുണഭോക്താക്കൾക്കും സംരംഭകത്വ അവസരങ്ങൾ ലഭിച്ചു. പിന്നീട് ദേശീയ തലത്തിൽ ബൻഷൈലാങ് മാർബാനിയാങിന് റിപ്പബ്ലിക് ദിനാഘോഷത്തിൽ പ്രത്യേക അതിഥിയായി പങ്കെടുക്കാനുള്ള അംഗീകാരവും ലഭിച്ചു.