ഗ്രാമീണ വികസന നിയമം നടപ്പാക്കാൻ പതിനെട്ട് മന്ത്രാലയങ്ങളുടെ ഉന്നതതല യോഗം

ന്യൂഡൽഹി, 2026 ജൂൺ 25 

ഗ്രാമീണ വികസന മന്ത്രാലയത്തിന്റെ നേതൃത്വത്തിൽ വികസിത ഭാരതം തൊഴിലുറപ്പും ഉപജീവന ദൗത്യവും സംബന്ധിച്ച നിയമത്തിനായുള്ള ഏകോപന ചട്ടക്കൂടിന്റെ കരട് ചർച്ച ചെയ്യാൻ ഉന്നതതല മന്ത്രാലയാന്തര യോഗം ന്യൂഡൽഹിയിലെ കർത്തവ്യ ഭവനിൽ ചേർന്നു. ജൂലൈ ഒന്നുമുതൽ നിയമം പ്രാബല്യത്തിൽ വരുന്നതിനുള്ള മുന്നൊരുക്കത്തിന്റെ ഭാഗമായാണ് യോഗം നടന്നത്. കേന്ദ്ര സർക്കാരിന്റെ പതിനെട്ട് മന്ത്രാലയങ്ങളിലെയും വകുപ്പുകളിലെയും പ്രതിനിധികളും പങ്കെടുത്തു.

ഗ്രാമീണ വികസന സെക്രട്ടറി രോഹിത് കൻസാലിന്റെ അധ്യക്ഷതയിൽ ചേർന്ന യോഗത്തിൽ ഗ്രാമവികസനത്തിൽ വിവിധ പദ്ധതികളെ ഒരുമിച്ച് കൊണ്ടുവരുന്ന സമീപനമാണ് പ്രധാനമായി ചർച്ച ചെയ്തത്. ഗ്രാമപഞ്ചായത്ത് തലത്തിൽ ജനപങ്കാളിത്തത്തോടെ തയ്യാറാക്കി ഗ്രാമസഭ അംഗീകരിക്കുന്ന വികസിത ഗ്രാമപഞ്ചായത്ത് പദ്ധതി മുഖ്യ ആസൂത്രണ രേഖയാകുമെന്ന് വിശദീകരിച്ചു. ഗ്രാമസഭകൾ കണ്ടെത്തുന്ന വികസന ആവശ്യങ്ങൾ പഞ്ചായത്തീരാജ് സ്ഥാപനങ്ങളിലൂടെ ഏകോപിപ്പിച്ച് വിവിധ മന്ത്രാലയങ്ങളുടെ പദ്ധതികളുമായി ബന്ധിപ്പിക്കാനാണ് ചട്ടക്കൂട് ലക്ഷ്യമിടുന്നത്. ജലസുരക്ഷ, അടിസ്ഥാന ഗ്രാമീണ സൗകര്യങ്ങൾ, ഉപജീവനം, അതിതീവ്ര കാലാവസ്ഥയുടെ ആഘാതം കുറയ്ക്കാനുള്ള പ്രത്യേക പ്രവൃത്തികൾ എന്നിവയാണ് പ്രധാന മേഖലകൾ. ജൂലൈ ഒന്നുമുതൽ നടപ്പാക്കാനായി മുന്നൂറ്റിപ്പതിനെട്ട് അനുവദനീയ പ്രവൃത്തികളുടെ ഇടക്കാല പട്ടികയും വകുപ്പ് പുറത്തിറക്കി.

നിയമം പ്രാബല്യത്തിൽ വരുന്നതിന് മുന്നോടിയായാണ് ഈ ചർച്ച സംഘടിപ്പിച്ചത്. സാങ്കേതികവും സാമ്പത്തികവുമായ ഏകോപനം ശക്തമാക്കൽ, വിവിധ പദ്ധതികളെ കൂട്ടിച്ചേർക്കൽ, ഡിജിറ്റൽ സംവിധാനങ്ങൾ തമ്മിലുള്ള ബന്ധം മെച്ചപ്പെടുത്തൽ, സംയോജിത നടപ്പാക്കലിനും നിരീക്ഷണത്തിനുമുള്ള സ്ഥാപന സംവിധാനങ്ങൾ ഒരുക്കൽ തുടങ്ങിയ വിഷയങ്ങളിലും വിശദമായ ചർച്ച നടന്നു. ജൂലൈ ഒന്നുമുതൽ നിയമത്തോടൊപ്പം ഈ ഏകോപന ചട്ടക്കൂടും നടപ്പാക്കി വികേന്ദ്രീകൃത ആസൂത്രണം ശക്തിപ്പെടുത്തുകയും പൊതുനിക്ഷേപം കൂടുതൽ ഫലപ്രദമാക്കുകയും സംയോജിത ഗ്രാമവികസനം വേഗത്തിലാക്കുകയും ചെയ്യുമെന്നാണ് പ്രതീക്ഷ.