ഗ്രാമവികസനത്തിൽ കൃത്രിമബുദ്ധി പ്രയോജനപ്പെടുത്താൻ ദേശീയ ശിൽപശാല നാളെ

ന്യൂഡൽഹി, 2026 ജൂൺ 25 

ഗ്രാമവികസന മന്ത്രാലയത്തിന് കീഴിലെ ഗ്രാമവികസന വകുപ്പ് ജൂൺ ഇരുപത്തിയഞ്ചിന് ന്യൂഡൽഹിയിലെ ഭാരത് മണ്ഡപത്തിൽ ദേശീയ ശിൽപശാല സംഘടിപ്പിക്കും. ഗ്രാമവികസനത്തിൽ കൃത്രിമബുദ്ധിയുടെ സാധ്യതകൾ പ്രയോജനപ്പെടുത്തുക എന്നതാണ് ലക്ഷ്യം. നൂതന സാങ്കേതികവിദ്യയെ ഗ്രാമീണ ഇന്ത്യയുടെ വികസന ആവശ്യങ്ങളുമായി ബന്ധിപ്പിക്കുന്നതിനുള്ള വേദിയായിരിക്കും ഈ ദിനം മുഴുവൻ നീളുന്ന പരിപാടി.

നീതി ആയോഗ്, ഇന്ത്യ കൃത്രിമബുദ്ധി ദൗത്യം, പ്രമുഖ വ്യവസായ സ്ഥാപനങ്ങൾ, സാങ്കേതിക സംരംഭങ്ങൾ, വിദ്യാഭ്യാസ സ്ഥാപനങ്ങൾ, വിജ്ഞാന പങ്കാളികൾ എന്നിവർ ശിൽപശാലയിൽ പങ്കെടുക്കും. ഗ്രാമവികസനത്തിനായി വ്യാപകമായി നടപ്പാക്കാനാകുന്ന കൃത്രിമബുദ്ധി മാതൃകകൾ കണ്ടെത്തുക, വിവിധ സ്ഥാപനങ്ങളുടെ അനുഭവങ്ങൾ പങ്കുവയ്ക്കുക, രാജ്യവ്യാപകമായി സാങ്കേതികവിദ്യ സ്വീകരിക്കാൻ ആവശ്യമായ വിവരശേഖരണ സംവിധാനങ്ങളുടെയും സ്ഥാപന സംവിധാനങ്ങളുടെയും സന്നദ്ധത വിലയിരുത്തുക എന്നിവയാണ് പ്രധാന ലക്ഷ്യങ്ങൾ. ഗ്രാമഭരണം, പൗരസേവനങ്ങൾ, സാമൂഹിക സംരക്ഷണം, അടിസ്ഥാനസൗകര്യ വികസനം, കാലാവസ്ഥാ പ്രതിരോധം, ഉപജീവനം, നൈപുണ്യ വികസനം, സാമ്പത്തിക ശാക്തീകരണം, ഉത്തരവാദിത്തമുള്ള കൃത്രിമബുദ്ധി, നയരൂപീകരണം എന്നിവ ഉൾപ്പെടെ അഞ്ച് വിഷയങ്ങളിലായാണ് ചർച്ചകൾ നടക്കുക.

വിദഗ്ധർ, നയരൂപകർ, വ്യവസായ രംഗത്തെ പ്രമുഖർ, പുതുമയാർന്ന ആശയങ്ങൾ അവതരിപ്പിക്കുന്ന സംരംഭകർ എന്നിവരുടെ വിശാലമായ ചർച്ചകളും ശിൽപശാലയുടെ ഭാഗമാകും. ഗ്രാമതലത്തിൽ വിജയകരമായി നടപ്പാക്കിയ മാതൃകകളും സാങ്കേതിക പരിഹാരങ്ങളും അവതരിപ്പിക്കും. ശിൽപശാലയിൽ നിന്നുള്ള നിർദേശങ്ങൾ സുരക്ഷിതവും ഫലപ്രദവുമായ കൃത്രിമബുദ്ധി സംവിധാനങ്ങൾ ഇന്ത്യയുടെ ഗ്രാമവികസന മേഖലയുമായി സംയോജിപ്പിക്കുന്നതിനുള്ള നയരേഖ തയ്യാറാക്കാൻ സഹായകരമാകുമെന്നാണ് പ്രതീക്ഷ.