തിരുവനന്തപുരം, 2026 ജൂൺ 24 –

ക്രൈസ്തവ വിഭാഗങ്ങളുടെ വിവിധ ആവശ്യങ്ങളും പ്രശ്നങ്ങളും പഠിക്കാൻ നിയോഗിച്ച ജെ.ബി. കോശി കമ്മീഷന്റെ റിപ്പോർട്ട് വിശദമായി പരിശോധിച്ച് ആവശ്യമായ നടപടികൾ സ്വീകരിക്കുമെന്ന് മുഖ്യമന്ത്രി വി.ഡി. സതീശൻ നിയമസഭയിൽ അറിയിച്ചു. ബജറ്റിന്മേലുള്ള ചർച്ചകൾക്ക് മറുപടി പറയുന്നതിനിടെയായിരുന്നു മുഖ്യമന്ത്രിയുടെ പ്രതികരണം.

കരിമണൽ സ്വകാര്യവത്കരിക്കുമെന്ന പ്രചാരണം തെറ്റാണെന്നും മുഖ്യമന്ത്രി വ്യക്തമാക്കി. പൊതുമേഖലാ സ്ഥാപനങ്ങളെ സ്വകാര്യവത്കരിക്കുമെന്ന ഒരു പരാമർശവും ബജറ്റിൽ ഇല്ലെന്ന് അദ്ദേഹം ചൂണ്ടിക്കാട്ടി. കരിമണൽ മേഖലയെ സംബന്ധിച്ച് സർക്കാർ മുന്നോട്ടുവച്ചിരിക്കുന്നത് കേന്ദ്ര-സംസ്ഥാന സംയുക്ത സംരംഭ മാതൃകയാണെന്നും അദ്ദേഹം പറഞ്ഞു.

കരിമണൽ മേഖലയിലെ മൂല്യവർധിത ഉൽപ്പന്ന നിർമാണമാണ് ലക്ഷ്യമിടുന്നതെന്നും മുഖ്യമന്ത്രി വിശദീകരിച്ചു. വിഷയത്തിൽ പ്രതിപക്ഷം അടിസ്ഥാനരഹിതമായ ആരോപണങ്ങൾ ഉന്നയിക്കുകയാണെന്നും അദ്ദേഹം വിമർശിച്ചു. ആലപ്പുഴയിലെ കരിമണൽ ആരാണ് കൊണ്ടുപോകുന്നതെന്ന് പരിശോധിക്കണമെന്നും മുഖ്യമന്ത്രി ചോദിച്ചു.