തിരുവനന്തപുരം, 2026 ജൂൺ 24 –

സംസ്ഥാനത്തെ വാഹന പ്രേമികൾക്ക് പ്രതീക്ഷ നൽകുന്ന തീരുമാനമായി വാഹനങ്ങളിലെ മോഡിഫിക്കേഷനുകൾ പഠിക്കാൻ സർക്കാർ വിദഗ്ധ സമിതിയെ നിയോഗിച്ചു. ഗതാഗത കമ്മീഷണറുടെ നേതൃത്വത്തിലുള്ള സമിതിയിൽ ഗതാഗത വകുപ്പിലെ ഉന്നത ഉദ്യോഗസ്ഥരാണ് അംഗങ്ങൾ. ജൂലൈ ഒന്നുമുതൽ സമിതി പ്രവർത്തനം ആരംഭിക്കും.

നിയമപരമായി അനുവദിക്കാവുന്ന വാഹന മോഡിഫിക്കേഷനുകൾ ഏതൊക്കെയാണെന്ന് സമിതി പരിശോധിക്കും. നിശ്ചിത ഫീസ് അടച്ച് ചെയ്യാവുന്ന സ്റ്റിക്കർ പതിപ്പിക്കൽ, വാഹനത്തിന്റെ നിറം മാറ്റൽ തുടങ്ങിയ കാര്യങ്ങളും പഠനപരിധിയിൽ ഉൾപ്പെടും. രണ്ട് വിഭാഗങ്ങളായി തിരിച്ചായിരിക്കും പഠനം. സമിതി രൂപീകരിച്ച് 100 ദിവസത്തിനകം ആദ്യ റിപ്പോർട്ട് സർക്കാരിന് സമർപ്പിക്കാനാണ് നിർദേശം. കൂടുതൽ വിദഗ്ധരെയും പിന്നീട് സമിതിയിൽ ഉൾപ്പെടുത്തും.

അതേസമയം, റോഡപകടങ്ങളുടെ യഥാർഥ കാരണങ്ങൾ ശാസ്ത്രീയമായി കണ്ടെത്തുന്നതിനായി ‘പോസ്റ്റ് ആക്സിഡന്റ് കമ്മിറ്റി’ രൂപീകരിക്കാനും തീരുമാനമായി. മോട്ടോർ വാഹന വകുപ്പ്, പൊലീസ്, പൊതുമരാമത്ത് വകുപ്പ്, കെഎസ്ഇബി, തദ്ദേശസ്ഥാപനങ്ങൾ എന്നിവയുടെ പ്രതിനിധികൾ കമ്മിറ്റിയിലുണ്ടാകും. അപകട സ്ഥലങ്ങളിൽ റോഡിന്റെ തകരാറുകളോ മറ്റ് ബാഹ്യ ഘടകങ്ങളോ കാരണമായിട്ടുണ്ടോ എന്ന് പരിശോധിച്ച് ഭാവിയിൽ അപകടങ്ങൾ കുറയ്ക്കാനുള്ള മുൻകരുതൽ നടപടികൾ നിർദേശിക്കുകയാണ് കമ്മിറ്റിയുടെ ലക്ഷ്യം.