തിരുവനന്തപുരം, 2026 ജൂൺ 24 –

സംസ്ഥാന ബജറ്റുമായി ബന്ധപ്പെട്ട സ്വകാര്യവൽക്കരണ ആരോപണങ്ങൾ തള്ളി മുഖ്യമന്ത്രി വി ഡി സതീശൻ. സർക്കാർ ഒരു പൊതുമേഖലാ സ്ഥാപനവും സ്വകാര്യവൽക്കരിക്കുകയോ അടച്ചുപൂട്ടുകയോ ചെയ്യില്ലെന്ന് അദ്ദേഹം നിയമസഭയിൽ വ്യക്തമാക്കി. ബജറ്റിൽ സ്വകാര്യവൽക്കരണത്തെക്കുറിച്ച് എവിടെയും പരാമർശിച്ചിട്ടില്ലെന്നും പുറത്തുള്ള ചർച്ചകൾ ബജറ്റിലുള്ള കാര്യങ്ങളെ അടിസ്ഥാനമാക്കിയല്ലെന്നും മുഖ്യമന്ത്രി പറഞ്ഞു.

കരിമണൽ ഖനനം സ്വകാര്യവൽക്കരിക്കുമെന്ന ആരോപണത്തിനും മുഖ്യമന്ത്രി മറുപടി നൽകി. അത്തരമൊരു പ്രഖ്യാപനം നടത്തിയിട്ടില്ലെന്നും ബജറ്റ് പ്രസംഗത്തിൽ പറഞ്ഞ കാര്യങ്ങൾ വീണ്ടും വായിച്ചുനോക്കിയാൽ അത് വ്യക്തമാകുമെന്നും അദ്ദേഹം പറഞ്ഞു. കേന്ദ്രവും കേരളവും സംയുക്തമായി നടപ്പാക്കുന്ന പദ്ധതിയാണ് ബജറ്റിൽ പ്രഖ്യാപിച്ചിരിക്കുന്നതെന്നും പറഞ്ഞ കാര്യങ്ങളിൽ നിന്ന് സർക്കാർ പിന്നോട്ടുപോകില്ലെന്നും വ്യക്തമാക്കി.

കേരളത്തിന്റെ ഭാവി വികസനം ലക്ഷ്യമിട്ടാണ് ബജറ്റിലെ പദ്ധതികൾ തയ്യാറാക്കിയിരിക്കുന്നതെന്ന് മുഖ്യമന്ത്രി പറഞ്ഞു. ലോകം മാറുന്നതിനനുസരിച്ച് കേരളത്തിന്റെ സാധ്യതകൾ വിലയിരുത്തിയാണ് ബജറ്റ് രൂപപ്പെടുത്തിയതെന്നും ജനങ്ങൾക്ക് നൽകിയ വാഗ്ദാനങ്ങൾ അതിൽ പ്രതിഫലിക്കുന്നുണ്ടെന്നും അദ്ദേഹം പറഞ്ഞു. നികുതി വരുമാനത്തിന്റെ 77 ശതമാനവും ശമ്പളം, പെൻഷൻ, പലിശ എന്നിവയ്ക്കായി ചെലവാകുന്ന സാഹചര്യത്തിൽ ശേഷിക്കുന്ന തുക ഉപയോഗിച്ചാണ് വികസന പ്രവർത്തനങ്ങൾ നടത്തേണ്ടതെന്നും അദ്ദേഹം ചൂണ്ടിക്കാട്ടി. ജനങ്ങളുടെ മേൽ അധിക നികുതി ഭാരം ചുമത്താതെ സമ്പദ് വ്യവസ്ഥയെ ഉത്തേജിപ്പിച്ച് ഖജനാവ് ശക്തിപ്പെടുത്തുമെന്ന ആത്മവിശ്വാസവും മുഖ്യമന്ത്രി പ്രകടിപ്പിച്ചു.