റെയിൽ സുരക്ഷ കൂടുതൽ ശക്തമാക്കുന്നതിനായി കിഴക്കൻ തീര റെയിൽവേയിലെ അറുനൂറ്റി മുപ്പത്തൊന്ന് റൂട്ട് കിലോമീറ്റർ ദൂരത്തിൽ കവച് സംവിധാനം സ്ഥാപിക്കാൻ ഇന്ത്യൻ റെയിൽവേ അനുമതി നൽകി. ഇരുനൂറ്റി എഴുപത് കോടി രൂപ ചെലവിലുള്ള പദ്ധതിക്ക് ജൂൺ ഇരുപത്തിരണ്ടിനാണ് അംഗീകാരം ലഭിച്ചത്. ബാഗുഅപാൽ–ബുധപങ്ക്, ഹരിദാസ്പുർ–പറദീപ്, ഖുർദ റോഡ്–ബലാംഗിർ, നൗപാഡ–ഗുനുപുർ, ലാഞ്ചിഗഡ് റോഡ്–ജുനാഗഡ്, ബോബ്ബിലി–സലൂർ എന്നീ ആറു പ്രധാന റെയിൽ പാതകളിലാണ് പദ്ധതി നടപ്പാക്കുന്നത്.

റെയിൽവേ മന്ത്രാലയത്തിന്റെ നേതൃത്വത്തിൽ നടപ്പാക്കുന്ന ഈ പദ്ധതി തദ്ദേശീയമായി വികസിപ്പിച്ച സ്വയമേവ പ്രവർത്തിക്കുന്ന ട്രെയിൻ സംരക്ഷണ സംവിധാനമായ കവചിന്റെ വിപുലീകരണത്തിന്റെ ഭാഗമാണ്. അപകടസൂചന മറികടക്കൽ, അമിതവേഗം, ട്രെയിൻ കൂട്ടിയിടി എന്നിവ തടയാൻ സഹായിക്കുന്ന സംവിധാനമാണിത്. ട്രെയിനുകളുടെ നീക്കം തുടർച്ചയായി നിരീക്ഷിക്കുന്ന കവച് ആവശ്യമായ സാഹചര്യങ്ങളിൽ സ്വയം ബ്രേക്ക് പ്രയോഗിക്കുകയും അതുവഴി പ്രവർത്തനസുരക്ഷ വർധിപ്പിക്കുകയും ചെയ്യും.

കവച് സംവിധാനം സ്ഥാപിക്കുന്നതോടെ ട്രെയിൻ സർവീസുകളുടെ സുരക്ഷയും വിശ്വാസ്യതയും കൂടുതൽ മെച്ചപ്പെടുമെന്നാണ് പ്രതീക്ഷ. കനത്ത മൂടൽമഞ്ഞ് ഉൾപ്പെടെയുള്ള പ്രതികൂല കാലാവസ്ഥയിലും കൂടുതൽ സുരക്ഷിതമായ ട്രെയിൻ സർവീസ് നടത്താൻ ഇത് സഹായിക്കും. ഒഡിഷയിലെയും സമീപ പ്രദേശങ്ങളിലെയും യാത്രാ, ചരക്ക് ട്രെയിൻ സർവീസുകൾക്ക് പദ്ധതിയുടെ ഗുണം ലഭിക്കും. അതോടൊപ്പം തിരക്കേറിയതും തന്ത്രപ്രധാനവുമായ റെയിൽ പാതകളിലേക്ക് കവചിന്റെ വ്യാപനം വർധിപ്പിക്കാനുള്ള ഇന്ത്യൻ റെയിൽവേയുടെ ദൗത്യത്തിനും ഇത് കരുത്തേകും.