ഡൽഹി, 2026 ജൂൺ 20

ഉത്തർപ്രദേശിലെ ഷാജഹാൻപൂർ സ്വദേശിയായ പതിനാറുകാരനെ ഗൗതം ബുദ്ധ് നഗറിലെ കാസ്ന ജയിലിൽ മുതിർന്ന തടവുകാരനായി രണ്ട് മാസത്തിലേറെ അനധികൃതമായി പാർപ്പിച്ചെന്ന റിപ്പോർട്ടിൽ ദേശീയ മനുഷ്യാവകാശ കമ്മിഷൻ സ്വമേധയാ കേസെടുത്തു. പ്രായപൂർത്തിയാകാത്തയാളാണെന്ന് പരിശോധനയിൽ സ്ഥിരീകരിച്ചതിന് ശേഷവും ബാലനെ ബാലഭവനത്തിലേക്ക് മാറ്റാൻ ആറു ദിവസം കൂടി എടുത്തതായി റിപ്പോർട്ടിൽ പറയുന്നു.

തൊഴിലാളികൾ വേതനവർധനയും മെച്ചപ്പെട്ട തൊഴിൽ സാഹചര്യങ്ങളും ആവശ്യപ്പെട്ട് നടത്തിയ പ്രതിഷേധത്തിന് പിന്നാലെയാണ് ബാലനെ പൊലീസ് അറസ്റ്റ് ചെയ്തതെന്നാണ് റിപ്പോർട്ട്. ഏപ്രിൽ പതിനാലിന് തന്റെ പേരിലുള്ള ഒരു പൊതിയെക്കുറിച്ച് ലഭിച്ച ഫോൺവിളിയെ തുടർന്ന് സ്ഥലത്തെത്തിയപ്പോഴാണ് അറസ്റ്റ് നടന്നത്. തുടർന്ന് വിവിധ ഗുരുതര വകുപ്പുകൾ ചുമത്തി കേസ് രജിസ്റ്റർ ചെയ്യുകയും മർദിച്ച് ചില രേഖകളിൽ ഒപ്പിടാൻ നിർബന്ധിക്കുകയും ചെയ്തതായി റിപ്പോർട്ടിൽ പറയുന്നു. കോടതി ജാമ്യം അനുവദിച്ചിട്ടും ജാമ്യവ്യവസ്ഥകൾ പാലിക്കാൻ കുടുംബത്തിന് കഴിയാത്തതിനാൽ ബാലൻ ഇപ്പോഴും ബാലഭവനത്തിൽ തുടരുകയാണ്.

വാർത്തയിലെ വിവരങ്ങൾ ശരിയാണെങ്കിൽ ഇത് ഗുരുതര മനുഷ്യാവകാശ ലംഘനമാണെന്നാണ് കമ്മിഷന്റെ പ്രാഥമിക വിലയിരുത്തൽ. ഇതിന്റെ അടിസ്ഥാനത്തിൽ ഉത്തർപ്രദേശ് ജയിൽ ഭരണ-പരിഷ്കരണ വിഭാഗം ഡയറക്ടർ ജനറലിനും പൊലീസ് ഡയറക്ടർ ജനറലിനും രണ്ടാഴ്ചയ്ക്കകം വിശദമായ റിപ്പോർട്ട് നൽകാൻ കമ്മിഷൻ നോട്ടീസ് നൽകി. കൂടാതെ സ്ഥലത്തെത്തി അന്വേഷണം നടത്തി ഒരാഴ്ചയ്ക്കകം റിപ്പോർട്ട് സമർപ്പിക്കാൻ അന്വേഷണ വിഭാഗം ഡയറക്ടർ ജനറലിനും നിർദേശം നൽകിയിട്ടുണ്ട്.