തിരുവനന്തപുരം, 2026 ജൂൺ 19 –

സർക്കാരിന്റെ ആദ്യ ബജറ്റിൽ ഡിഎ കുടിശിക വിതരണം സംബന്ധിച്ച് പരാമർശങ്ങളില്ലെന്ന പ്രതിപക്ഷ നേതാവ് പിണറായി വിജയന്റെ വിമർശനത്തിന് മുഖ്യമന്ത്രി വി ഡി സതീശൻ മറുപടി നൽകി. സംസ്ഥാനത്തെ വലിയ ഡിഎ കുടിശിക രൂപപ്പെട്ടത് പിണറായി വിജയൻ മുഖ്യമന്ത്രിയായിരുന്ന കാലത്താണെന്നും അതിനെക്കുറിച്ച് ഇപ്പോഴത്തെ സർക്കാരിനോട് ചോദ്യം ഉന്നയിക്കാൻ അവകാശമില്ലെന്നും വാർത്താസമ്മേളനത്തിൽ പറഞ്ഞു.

ഡിഎ കുടിശിക സൃഷ്ടിച്ചത് നിലവിലെ സർക്കാരല്ലെന്നും, പിണറായി സർക്കാരാണ് അതിന് ഉത്തരവാദികളെന്നും മുഖ്യമന്ത്രി ആരോപിച്ചു. 85,000 കോടി രൂപയുടെ കടബാധ്യത ബാക്കി വെച്ച ശേഷമാണ് ഡിഎ കുടിശികയെക്കുറിച്ച് ചോദ്യം ഉയർത്തുന്നതെന്നും പ്രതികരിച്ചു. കേരളത്തെ മുന്നോട്ടുകൊണ്ടുപോകുകയെന്ന ലക്ഷ്യത്തോടെയാണ് പുതിയ സർക്കാർ അധികാരത്തിലെത്തിയതെന്നും പറഞ്ഞു.

ആദ്യ ബജറ്റിനെതിരെ പിണറായി വിജയൻ നേരത്തെ രൂക്ഷ വിമർശനം ഉന്നയിച്ചിരുന്നു. ബജറ്റിൽ വികസനത്തിനുള്ള വ്യക്തമായ കാഴ്ചപ്പാട് ഇല്ലെന്നും സാമ്പത്തിക പ്രതിസന്ധിയെക്കുറിച്ചുള്ള സർക്കാരിന്റെ വാദങ്ങൾ ബജറ്റ് വകയിരുത്തലുകളിൽ പ്രതിഫലിക്കുന്നില്ലെന്നുമാണ് വിമർശനം. ഇതിന് പിന്നാലെയാണ് ഡിഎ കുടിശിക വിഷയത്തിൽ മുഖ്യമന്ത്രിയുടെ മറുപടി വന്നത്.