മുല്ലപ്പെരിയാറിൽ പുതിയ അണക്കെട്ട് അനുവദിക്കില്ലെന്ന തമിഴ്നാട് നിലപാടിനെതിരെ സമര സമിതി

ഇടുക്കി, 2026 ജൂൺ 19 –

മുല്ലപ്പെരിയാറിൽ പുതിയ അണക്കെട്ട് പണിയാൻ അനുവദിക്കില്ലെന്നും ജലനിരപ്പ് 152 അടിയാക്കി ഉയർത്തുമെന്നുമുള്ള തമിഴ്നാട് സർക്കാരിന്റെ നിലപാടിനെതിരെ മുല്ലപ്പെരിയാർ സമര സമിതി രംഗത്തെത്തി. പെരിയാർ തീരത്ത് ആശങ്കയിൽ കഴിയുന്ന ജനങ്ങളോടുള്ള വെല്ലുവിളിയാണ് ഈ നിലപാടെന്ന് സമര സമിതി ആരോപിച്ചു. അണക്കെട്ടിൽ സുപ്രീം കോടതി നിർദ്ദേശിച്ച കോംപ്രിഹെൻസീവ് ഡാം സേഫ്റ്റി ഇവാലുവേഷൻ ഉടൻ നടത്തണമെന്നും ആവശ്യപ്പെട്ടു.

സമര സമിതി കൺവീനർ ഷാജി പി ജോസഫാണ് പ്രതികരണം അറിയിച്ചത്. പുതിയ ഡാം നിർമ്മിക്കുന്ന കാര്യത്തിൽ കേരളവും തമിഴ്നാടും തമ്മിൽ ധാരണയിലെത്തണമെന്നും ഇക്കാര്യത്തിൽ മുഖ്യമന്ത്രി വി ഡി സതീശനെ നേരിൽ കാണുമെന്നും പറഞ്ഞു. സംസ്ഥാന ബജറ്റിൽ പുതിയ അണക്കെട്ടിനെക്കുറിച്ച് പരാമർശമില്ലാത്തത് നിരാശജനകമാണെന്നും വ്യക്തമാക്കി.

മുല്ലപ്പെരിയാറിൽ പുതിയ അണക്കെട്ട് അനുവദിക്കില്ലെന്ന് തമിഴ്നാട് സർക്കാരിന്റെ നയപ്രഖ്യാപനത്തിൽ വ്യക്തമാക്കിയിരുന്നു. അറ്റകുറ്റപ്പണികളുമായി മുന്നോട്ടുപോകുമെന്നും ജലനിരപ്പ് ഉയർത്തുമെന്നും പ്രഖ്യാപനത്തിൽ പറയുന്നു. നിയമസഭ സമ്മേളനത്തിന് ശേഷം മുല്ലപ്പെരിയാർ വിഷയത്തിൽ ചർച്ച നടത്തുമെന്ന് വി ഡി സതീശൻ പറഞ്ഞതിന് പിന്നാലെയാണ് തമിഴ്നാടിന്റെ നിലപാട് വീണ്ടും വ്യക്തമാക്കപ്പെട്ടത്. സുപ്രീം കോടതി അനുമതി നൽകിയിട്ടും ജലനിരപ്പ് 152 അടിയാക്കി ഉയർത്താൻ അനുവദിക്കാതെ കേരളം പുതിയ അണക്കെട്ട് പണിയാൻ ശ്രമിക്കുകയാണെന്ന വിമർശനവും നയപ്രഖ്യാപനത്തിലുണ്ട്.