ജൂൺ 20, 21 തീയതികളിൽ പ്രധാനമന്ത്രി നരേന്ദ്ര മോദി പശ്ചിമ ബംഗാൾ സന്ദർശിക്കും. ജൂൺ 20ന് ഹൂഗ്ലി ജില്ലയിലെ താരകേശ്വറിൽ പശ്ചിമബംഗ ദിനാഘോഷത്തിൽ പങ്കെടുക്കുന്ന പ്രധാനമന്ത്രി, റെയിൽവേ, കൃഷി, ഗ്രാമവികസനം, മത്സ്യബന്ധനം, മൃഗസംരക്ഷണം തുടങ്ങിയ മേഖലകളിലെ വിവിധ വികസന പദ്ധതികൾ ഉദ്ഘാടനം ചെയ്യുകയും തറക്കല്ലിടുകയും ചെയ്യും. ജൂൺ 21ന് കൊൽക്കത്തയിൽ നടക്കുന്ന പന്ത്രണ്ടാമത് അന്താരാഷ്ട്ര യോഗദിനാഘോഷത്തിനും അദ്ദേഹം നേതൃത്വം നൽകും. തുടർന്ന് കൊൽക്കത്തയിലെ ശ്യാമ പ്രസാദ് മുഖർജി തുറമുഖത്ത് തദ്ദേശീയമായി രൂപകൽപന ചെയ്ത് നിർമിച്ച മൂന്ന് നാവിക കപ്പലുകളും രാജ്യത്തിന് സമർപ്പിക്കും.

പ്രധാനമന്ത്രി കിസാൻ സമ്മാൻ നിധിയുടെ ഇരുപത്തിമൂന്നാം ഗഡുവായി രാജ്യത്തെ ഒമ്പത് കോടി നാൽപ്പത്തിനാല് ലക്ഷം കർഷകരുടെ ബാങ്ക് അക്കൗണ്ടുകളിലേക്ക് പതിനെട്ടായിരത്തി എണ്ണൂറ്റി എൺപത് കോടി രൂപ നേരിട്ട് കൈമാറും. പശ്ചിമ ബംഗാളിൽ പ്രധാനമന്ത്രി ഫസൽ ബീമ യോജന, കാർഷിക ഡിജിറ്റൽ സേവന വേദി, പ്രകൃതി കൃഷി ദൗത്യം, പ്രധാനമന്ത്രി ധൻ ധാന്യ കൃഷി യോജന എന്നീ പദ്ധതികൾക്കും തുടക്കമിടും. മത്സ്യമേഖലയുടെയും മൃഗസംരക്ഷണ മേഖലയുടെയും അടിസ്ഥാനസൗകര്യ വികസന പദ്ധതികളും ഉദ്ഘാടനം ചെയ്യും. ഏകദേശം അഞ്ഞൂറ്റി തൊണ്ണൂറ് കോടി രൂപയുടെ റെയിൽവേ പദ്ധതികൾക്കും തറക്കല്ലിടും.

പശ്ചിമബംഗ ദിനത്തിന്റെ ഇത്തവണത്തെ പ്രമേയം പൈതൃകം, ഐക്യം, വികസനം എന്നതാണ്. കർഷക ക്ഷേമം, അടിസ്ഥാനസൗകര്യ വികസനം, ഗ്രാമീണ പുരോഗതി എന്നിവ ലക്ഷ്യമിട്ടാണ് പദ്ധതികൾ നടപ്പാക്കുന്നത്. യോഗദിനത്തിന്റെ ഇത്തവണത്തെ പ്രമേയം ആരോഗ്യകരമായ വാർധക്യത്തിനായുള്ള യോഗ എന്നതാണ്. ലോകമെമ്പാടുമായി രണ്ടായിരത്തി അഞ്ഞൂറോളം കേന്ദ്രങ്ങളിൽ യോഗദിനാഘോഷങ്ങൾ നടക്കും. കൂടാതെ തദ്ദേശീയമായി നിർമിച്ച മൂന്ന് നാവിക കപ്പലുകൾ നാവികസേനയുടെ പ്രവർത്തനശേഷിയും തീരസുരക്ഷയും കൂടുതൽ ശക്തിപ്പെടുത്തുമെന്നാണ് വിലയിരുത്തൽ.