തിരുവനന്തപുരം, 2026 ജൂൺ 18 –

കേരള പി.എസ്.സി പ്രസിദ്ധീകരിച്ച ബുള്ളറ്റിനിൽ ഗുരുതര പിഴവ് കണ്ടെത്തി. കേരളത്തിലെ മികച്ച തിരക്കഥാകൃത്തായി ഫിലിം ക്രിട്ടിക്‌സ് അവാർഡ് നേടിയ രാജേഷ് തില്ലങ്കേരിയുടെ ചിത്രത്തിന് പകരം ഷുഹൈബ് വധക്കേസ് പ്രതിയും സി.പി.എം മുൻ പ്രവർത്തകനുമായ ആകാശ് തില്ലങ്കേരിയുടെ ചിത്രമാണ് പ്രസിദ്ധീകരിച്ചത്. മേയ് 15ന് പുറത്തിറങ്ങിയ പി.എസ്.സി ബുള്ളറ്റിന്റെ അവസാന പേജിലെ സമകാലികം വിഭാഗത്തിലാണ് ഈ പിഴവ് സംഭവിച്ചത്.

2025ലെ ഫിലിം ക്രിട്ടിക്‌സ് അവാർഡ് ജേതാക്കളെ പരിചയപ്പെടുത്തുന്ന ഭാഗത്തായിരുന്നു തെറ്റായ ചിത്രം ഉൾപ്പെട്ടത്. മികച്ച സംവിധായകൻ, നടൻ, നടി, തിരക്കഥാകൃത്ത് എന്നിവരുടെ ചിത്രങ്ങൾ പ്രസിദ്ധീകരിച്ച കൂട്ടത്തിൽ രാജേഷ് തില്ലങ്കേരി എന്ന പേരിനൊപ്പം ആകാശ് തില്ലങ്കേരിയുടെ ചിത്രമാണ് അച്ചടിച്ചുവന്നത്.

പിഴവ് ശ്രദ്ധയിൽപ്പെട്ടതിനെ തുടർന്ന് ബുള്ളറ്റിന്റെ ഇ-പതിപ്പിൽ ചിത്രം തിരുത്തി നൽകിയതായും പിന്നീട് ജൂൺ ഒന്നിന് പുറത്തിറക്കിയ ബുള്ളറ്റിനിൽ ശരിയായ ചിത്രം ഉൾപ്പെടുത്തിയതായും റിപ്പോർട്ടുകളുണ്ട്. പി.എസ്.സി പരീക്ഷകൾക്ക് തയ്യാറെടുക്കുന്ന ഉദ്യോഗാർഥികൾ വ്യാപകമായി ഉപയോഗിക്കുന്ന ഔദ്യോഗിക പ്രസിദ്ധീകരണത്തിലാണ് ഈ പിഴവ് സംഭവിച്ചത്.