ഇടുക്കി, 2026 ജൂൺ 18 –
കട്ടപ്പന റൂറൽ ഡെവലപ്മെന്റ് സൊസൈറ്റിക്ക് മുൻപിൽ നിക്ഷേപകനും വ്യാപാരിയുമായ സാബു തോമസ് ആത്മഹത്യ ചെയ്ത കേസിന്റെ അന്വേഷണം ക്രൈംബ്രാഞ്ചിന് കൈമാറാൻ സാധ്യത. ഇതുസംബന്ധിച്ച് ആഭ്യന്തര മന്ത്രി രമേശ് ചെന്നിത്തല ഉറപ്പ് നൽകിയതായി കുടുംബം അറിയിച്ചു. കേസിൽ തുടരന്വേഷണം ആവശ്യപ്പെട്ട് കുടുംബം നൽകിയ നിവേദനം പരിഗണിച്ചാണ് നടപടി. മുഖ്യമന്ത്രിക്കും കുടുംബം പരാതി നൽകിയിട്ടുണ്ട്.
2024 ഡിസംബർ 20നാണ് കട്ടപ്പന മുളങ്ങാശേരിൽ സാബു തോമസിനെ സൊസൈറ്റിക്ക് മുൻപിൽ തൂങ്ങിമരിച്ച നിലയിൽ കണ്ടെത്തിയത്. നിക്ഷേപിച്ച പണം തിരികെ ലഭിക്കാത്തതും ചിലരുടെ ഭീഷണിയുമാണ് ആത്മഹത്യയ്ക്ക് കാരണമായതെന്നാണ് കുടുംബത്തിന്റെ ആരോപണം. സിപിഎം കട്ടപ്പന മുൻ ഏരിയ സെക്രട്ടറി ഉൾപ്പെടെയുള്ളവരുടെ സമ്മർദവും ഭീഷണിയും സാബുവിനെ ആത്മഹത്യയിലേക്ക് നയിച്ചുവെന്നാണ് കുടുംബം പറയുന്നത്.
സാബുവിനെ ഭീഷണിപ്പെടുത്തുന്നതായി പറയുന്ന ശബ്ദസന്ദേശവും കുടുംബം പുറത്തുവിട്ടിരുന്നു. എന്നാൽ കേസിൽ ബാങ്ക് ജീവനക്കാരെ മാത്രം പ്രതികളാക്കി പൊലീസ് അന്വേഷണം നടത്തിയെന്നും പ്രധാന ആരോപണവിധേയനെ ഒഴിവാക്കിയെന്നും കുടുംബം ആരോപിക്കുന്നു. ഈ സാഹചര്യത്തിലാണ് കേസ് ക്രൈംബ്രാഞ്ചിന് കൈമാറണമെന്ന ആവശ്യം ശക്തമായത്.
