റോജി എം ജോണിന്റെ പേഴ്‌സണൽ സ്റ്റാഫ് നിയമനവും വിവാദത്തിൽ; യൂത്ത് കോൺഗ്രസ് പരാതി നൽകി

തിരുവനന്തപുരം, 2026 ജൂൺ 17 –

ഉന്നത വിദ്യാഭ്യാസ മന്ത്രി റോജി എം ജോണിന്റെ പേഴ്‌സണൽ സ്റ്റാഫ് നിയമനം പുതിയ വിവാദത്തിന് വഴിവെച്ചു. ജമാഅത്തെ ഇസ്‌ലാമി ബന്ധമുള്ളതായി ആരോപിക്കപ്പെടുന്ന കായംകുളം സ്വദേശി യു ഷൈജുവിന്റെ നിയമനത്തിനെതിരെയാണ് യൂത്ത് കോൺഗ്രസ് കെപിസിസിക്ക് പരാതി നൽകിയത്. തദ്ദേശ തിരഞ്ഞെടുപ്പിൽ ഷൈജു യുഡിഎഫിനെതിരെ പ്രവർത്തിച്ചിരുന്നുവെന്നും പരാതിയിൽ ആരോപിക്കുന്നു.

വെൽഫെയർ പാർട്ടി സ്ഥാനാർഥിക്കായി ഷൈജു പ്രവർത്തിച്ചുവെന്നാണ് യൂത്ത് കോൺഗ്രസിന്റെ ആരോപണം. വിഷയത്തിൽ അടിയന്തര നടപടി സ്വീകരിക്കണമെന്ന് യൂത്ത് കോൺഗ്രസ് നേതാവ് അഫ്‌സൽ പ്ലാമൂട്ടിൽ ആവശ്യപ്പെട്ടു. യൂത്ത് കോൺഗ്രസ് നൽകിയ പരാതിയുടെ പകർപ്പ് പുറത്തുവന്നതോടെയാണ് വിഷയം കൂടുതൽ ശ്രദ്ധ നേടിയത്.

പുതിയ സർക്കാർ അധികാരമേറ്റതിന് പിന്നാലെ വിവിധ നിയമനങ്ങളെ ചൊല്ലി വിവാദങ്ങൾ ഉയർന്നിരുന്നു. സണ്ണി ജോസഫിന്റെ സഹോദരീഭർത്താവായ ബെന്നി തോമസിനെ അഡീഷണൽ പ്രൈവറ്റ് സെക്രട്ടറിയായി നിയമിച്ചതാണ് ആദ്യം വിവാദമായത്. വിമർശനം ശക്തമായതോടെ ബെന്നി തോമസ് സ്ഥാനം ഒഴിഞ്ഞിരുന്നു. തുടർന്ന് ശബരിമല സ്വർണക്കൊള്ള കേസിലെ പ്രതികളുടെ അഭിഭാഷകനായ കെ ബി പ്രദീപിനെ ദേവസ്വം സ്‌പെഷ്യൽ പ്ലീഡറായി നിയമിച്ചതും വിവാദമായി. പിന്നാലെ കെ ബി പ്രദീപിനോട് സ്ഥാനം ഒഴിയാൻ മുഖ്യമന്ത്രി വി ഡി സതീശൻ ആവശ്യപ്പെട്ടിരുന്നു. ഈ സാഹചര്യത്തിലാണ് പുതിയ നിയമന വിവാദവും രാഷ്ട്രീയ ചർച്ചയാകുന്നത്.