തിരുവനന്തപുരം: നവകേരള യാത്രയ്ക്കിടെ മുൻ മുഖ്യമന്ത്രിയുടെ സുരക്ഷാ ജീവനക്കാർ യൂത്ത് കോൺഗ്രസ് പ്രവർത്തകരെ മർദിച്ചെന്ന കേസിൽ പ്രത്യേക അന്വേഷണ സംഘം (SIT) കോടതിയിൽ പുതിയ റിപ്പോർട്ട് സമർപ്പിച്ചു. പ്രതികളുടെ മുൻകൂർ ജാമ്യാപേക്ഷ പരിഗണിക്കുന്നതിന് മുമ്പാണ് റിപ്പോർട്ട് നൽകിയത്.
കഴിഞ്ഞ തവണ കോടതി ഉന്നയിച്ച ചോദ്യങ്ങൾക്ക് മറുപടി ഉൾപ്പെടുത്തിയാണ് റിപ്പോർട്ട് സമർപ്പിച്ചിരിക്കുന്നത്. കേസുമായി ബന്ധപ്പെട്ട ഡയറി തിരുത്തിയെഴുതാൻ സമ്മർദമുണ്ടായിരുന്നുവെന്ന് ഒരു എസ്ഐ വെള്ളിയാഴ്ച അന്വേഷണ സംഘത്തിന് മൊഴി നൽകിയിരുന്നു.
ക്രമസമാധാന ചുമതലയുണ്ടായിരുന്ന എഡിജിപി എം.ആർ. അജിത് കുമാറിന്റെ ഓഫീസിൽ ജോലി ചെയ്തിരുന്ന രണ്ട് എസ്ഐമാരുടെ മൊഴിയും എസ്ഐടി രേഖപ്പെടുത്തി. അന്വേഷണ സംഘത്തിന് മുന്നിൽ മൊഴി നൽകുന്നതിനിടെ ഗ്രേഡ് എസ്ഐമാർ വികാരാധീനരായി കരഞ്ഞുവെന്നാണ് റിപ്പോർട്ടുകൾ.
ഉന്നത ഉദ്യോഗസ്ഥരുടെ നിർദേശങ്ങൾ പാലിക്കുക മാത്രമാണ് ചെയ്തതെന്നും സംഭവത്തിൽ വ്യക്തിപരമായ ഉത്തരവാദിത്തമില്ലെന്നുമാണ് അവർ അന്വേഷണ സംഘത്തോട് വിശദീകരിച്ചത്. ഈ മൊഴികൾ കേസിൽ നിർണായക വഴിത്തിരിവായേക്കുമെന്നാണ് വിലയിരുത്തൽ.
പുതിയ വെളിപ്പെടുത്തലുകളുടെ അടിസ്ഥാനത്തിൽ അന്വേഷണം കൂടുതൽ വ്യാപിപ്പിക്കാനാണ് എസ്ഐടിയുടെ തീരുമാനം. ഉന്നത ഉദ്യോഗസ്ഥരുടെ പങ്ക് ഉൾപ്പെടെ പരിശോധിക്കുന്നതിനുള്ള സാധ്യതയും ഇതോടെ ശക്തമായിരിക്കുകയാണ്.
