ജനീവ, 2026 ജൂൺ 6 –
ലോക പരിസ്ഥിതി ദിനത്തോടനുബന്ധിച്ച് ലോക വ്യാപാര സംഘടനയുടെ വ്യാപാര-പരിസ്ഥിതി വാരം 2026 പരിപാടിക്കിടെ ജനീവയിൽ ഇന്ത്യ പ്രത്യേക പരിപാടി സംഘടിപ്പിച്ചു. ഇന്ത്യയുടെ കാർബൺ ക്രെഡിറ്റ് വ്യാപാര പദ്ധതിയും പുനരുപയോഗ ഊർജ മേഖലയിലെ മാനദണ്ഡവൽക്കരണവും അവതരിപ്പിക്കാനായിരുന്നു പരിപാടി. സുസ്ഥിര വികസനം, ശുദ്ധ ഊർജത്തിലേക്കുള്ള മാറ്റം, പാരിസ് കരാറിന് കീഴിലുള്ള ദേശീയ പ്രതിബദ്ധതകളുടെ നേട്ടങ്ങൾ എന്നിവയാണ് പ്രധാനമായി അവതരിപ്പിച്ചത്.
പരിസ്ഥിതി, വന-കാലാവസ്ഥാ വ്യതിയാന മന്ത്രാലയം, ഊർജ കാര്യക്ഷമത ബ്യൂറോ, വൈദ്യുതി മന്ത്രാലയം, പുതിയ-പുനരുപയോഗ ഊർജ മന്ത്രാലയം എന്നിവയിലെ വിദഗ്ധരും മുതിർന്ന ഉദ്യോഗസ്ഥരുമാണ് പരിപാടിയിൽ പങ്കെടുത്തത്. ഇന്ത്യയുടെ കാലാവസ്ഥാ പ്രവർത്തനങ്ങളും പരിസ്ഥിതി സംരക്ഷണ നടപടികളും വിശദീകരിച്ചു. 2026 മാർച്ച് വരെയുള്ള കണക്കുകൾ പ്രകാരം ഫോസിൽ ഇന്ധനേതര സ്രോതസുകളിൽ നിന്നുള്ള സ്ഥാപിത വൈദ്യുതി ഉൽപാദന ശേഷി 53.21 ശതമാനത്തിലെത്തിയതായി അറിയിച്ചു. 2030-ഓടെ 50 ശതമാനം എന്ന ലക്ഷ്യം ഏകദേശം അഞ്ച് വർഷം മുൻപേ കൈവരിച്ചെന്നും വ്യക്തമാക്കി. 2005 മുതൽ 2022 വരെ സമ്പദ്വ്യവസ്ഥയുമായി ബന്ധപ്പെട്ട ഉദ്വമന തീവ്രത 37.38 ശതമാനം കുറഞ്ഞതായും അവതരിപ്പിച്ചു.
കാർബൺ ക്രെഡിറ്റ് വ്യാപാര പദ്ധതിക്ക് കീഴിൽ രൂപപ്പെടുത്തിയ ദേശീയ കാർബൺ വിപണി ചട്ടക്കൂടും പരിപാടിയിൽ അവതരിപ്പിച്ചു. ദേശീയ ഇലക്ട്രോണിക് കാർബൺ ക്രെഡിറ്റ് വ്യാപാര വേദി സ്ഥാപിക്കുകയും ഹരിതഗൃഹ വാതക ഉദ്വമനം കുറയ്ക്കുന്ന പ്രവർത്തനങ്ങൾക്ക് പ്രോത്സാഹനം നൽകുകയും ചെയ്യുകയാണ് ലക്ഷ്യം. ദേശീയ ഹരിത ഹൈഡ്രജൻ ദൗത്യത്തിന്റെ പുരോഗതിയും വിശദീകരിച്ചു. ഹരിത ഹൈഡ്രജൻ എന്ന നിലയിൽ ഹൈഡ്രജനെ തരംതിരിക്കുന്നതിനുള്ള സാങ്കേതിക മാനദണ്ഡങ്ങളും അവതരിപ്പിച്ചു. ജൂൺ രണ്ടിന് ഇന്ത്യയും ജപ്പാനും തമ്മിൽ വ്യാപാര-കാലാവസ്ഥാ നടപടികളുമായി ബന്ധപ്പെട്ട ചർച്ചകളും നടന്നിരുന്നു. ആഗോള വ്യാപാരവും പരിസ്ഥിതി വിഷയങ്ങളും സംബന്ധിച്ച ഇന്ത്യയുടെ പ്രതിബദ്ധത പ്രകടിപ്പിക്കുന്ന വേദിയായാണ് ഈ പരിപാടി വിലയിരുത്തപ്പെട്ടത്.
.
