ഐവിഎഫ് ചികിത്സയിലൂടെ ജനിച്ച പെൺകുട്ടിക്ക് പിതാവിന്റെ പേര് ചേർത്ത് പുതിയ ജനന സർട്ടിഫിക്കറ്റ് നൽകാൻ ഹൈക്കോടതി ഉത്തരവ്

കൊച്ചി, 2026 ജൂൺ 5 –

വിവാഹത്തിനു മുൻപ് ഒരുമിച്ച് ജീവിച്ചിരുന്ന കാലത്ത് പങ്കാളിയുടെ ബീജം ഉപയോഗിച്ചുള്ള ഐവിഎഫ് ചികിത്സയിലൂടെ ജനിച്ച പെൺകുട്ടിക്ക് പിതാവിന്റെ പേര് ഉൾപ്പെടുത്തി പുതിയ ജനന സർട്ടിഫിക്കറ്റ് നൽകാൻ കേരള ഹൈക്കോടതി ഉത്തരവിട്ടു. കുട്ടിയുടെ മാതാപിതാക്കൾ നൽകിയ ഹർജി അനുവദിച്ചാണ് ജസ്റ്റിസ് പി.വി. കുഞ്ഞിക്കൃഷ്ണൻ ഉത്തരവിട്ടത്. ജനന സർട്ടിഫിക്കറ്റിൽ അച്ഛന്റെ പേര് ഇല്ലാതെ “സിംഗിൾ മദർ” എന്നായിരുന്നു രേഖപ്പെടുത്തിയിരുന്നത്. പിന്നീട് പിതാവിന്റെ പേര് ചേർക്കണമെന്ന അപേക്ഷ പഞ്ചായത്ത് ജനന-മരണ രജിസ്ട്രാർ നിരസിച്ചതിനെ തുടർന്നാണ് മാതാപിതാക്കൾ കോടതിയെ സമീപിച്ചത്.

ദുബായിൽ ജോലി ചെയ്യുന്നതിനിടെയാണ് ഹർജിക്കാർ പരിചയപ്പെടുകയും ഒരുമിച്ച് ജീവിക്കാൻ തീരുമാനിക്കുകയും ചെയ്തത്. കുടുംബത്തിന്റെ എതിർപ്പിനെ തുടർന്ന് വിവാഹം നടന്നില്ല. 2012 ൽ യുവാവിന്റെ ബീജം ഉപയോഗിച്ച് യുവതി ഐവിഎഫ് ചികിത്സയ്ക്ക് വിധേയയാവുകയും പെൺകുട്ടി ജനിക്കുകയും ചെയ്തു. പിന്നീട് ഇവർ വിവാഹിതരായി. രണ്ടാമത്തെ കുട്ടിയുടെ ജനന സർട്ടിഫിക്കറ്റിൽ പിതാവിന്റെ പേര് ഉൾപ്പെട്ടിരുന്നു. ആദ്യ കുട്ടിയുടെ സർട്ടിഫിക്കറ്റിലും പിതാവിന്റെ പേര് ചേർക്കണമെന്ന മാതാപിതാക്കളുടെ ആവശ്യം തള്ളിയ സാഹചര്യത്തിലാണ് കോടതി ഇടപെട്ടത്. മാതാപിതാക്കൾ ഒരുമിച്ച് നിന്നുകൊണ്ട് കുട്ടിയുടെ പിതൃത്വം അംഗീകരിക്കുമ്പോൾ നിയമം അതിന് തടസ്സമാകുന്നത് ദൗർഭാഗ്യകരമാണെന്ന് കോടതി നിരീക്ഷിച്ചു.

പിതാവിന്റെ പേര് ഇല്ലാത്ത ജനന സർട്ടിഫിക്കറ്റ് കുട്ടിയുടെ മനസ്സിൽ വലിയ മുറിവുണ്ടാക്കുമെന്ന് കോടതി ചൂണ്ടിക്കാട്ടി. മഹാഭാരതത്തിലെ കർണൻ നേരിട്ട തിരിച്ചറിയൽ പ്രതിസന്ധിയുമായി കോടതി ഇതിനെ താരതമ്യം ചെയ്തു. ഒലിവർ ട്വിസ്റ്റ് നോവലിലെ “ചില സാഹചര്യങ്ങളിൽ നിയമം ഒരു കഴുതയാണ്” എന്ന പ്രസിദ്ധ പരാമർശവും കോടതി ഉദ്ധരിച്ചു. നിയമങ്ങൾക്ക് മനുഷ്യത്വപരമായ വ്യാഖ്യാനം നൽകേണ്ടത് കോടതിയുടെ ഉത്തരവാദിത്തമാണെന്നും വ്യക്തമാക്കി. 30 ദിവസത്തിനകം പിതാവിന്റെ പേര് ഉൾപ്പെടുത്തി പുതിയ ജനന സർട്ടിഫിക്കറ്റ് നൽകാൻ ബന്ധപ്പെട്ട അധികൃതർക്കും കോടതി നിർദേശം നൽകി.