ന്യൂഡൽഹി, 2026 ജൂൺ 1 –

പരിശീലന കേന്ദ്രം പ്രവർത്തിച്ചിരുന്ന കെട്ടിടം തകർന്നു

ദക്ഷിണ ഡൽഹിയിലെ സാകേത് മെട്രോ സ്റ്റേഷനു സമീപം വാണിജ്യ കെട്ടിടം തകർന്നുണ്ടായ അപകടത്തിൽ മരിച്ചവരുടെ എണ്ണം ആറായി. നിരവധി പേർക്ക് പരിക്കേറ്റു. ശനിയാഴ്ച വൈകിട്ട് സെയ്ദുലജാബ് മേഖലയിലെ വെസ്റ്റേൺ മാർഗിലായിരുന്നു അപകടം. പരിശീലന കേന്ദ്രം, ഭക്ഷണശാലകൾ, ഓഫിസുകൾ എന്നിവ പ്രവർത്തിച്ചിരുന്ന ബഹുനില കെട്ടിടമാണ് തകർന്നുവീണത്. അപകടസമയത്ത് മുകളിലത്തെ നിലയിൽ നിർമാണ പ്രവർത്തനങ്ങളും നടന്നിരുന്നുവെന്നാണ് റിപ്പോർട്ട്.

അപകട നിമിഷം ദൃശ്യങ്ങളിൽ പതിഞ്ഞു

വിദേശ മെഡിക്കൽ ബിരുദ പരീക്ഷയ്ക്ക് തയ്യാറെടുക്കുന്ന വിദ്യാർഥികൾ അടക്കമുള്ളവരാണ് അപകടത്തിൽപ്പെട്ടവരിൽ ഉണ്ടായിരുന്നത്. മെഡിക്കൽ, എൻജിനീയറിങ് പഠനങ്ങൾക്കായി വിദേശ പ്രവേശന പരിശീലനം നടത്തുന്ന വിദ്യാർഥികളുടെ പ്രധാന കേന്ദ്രമാണ് ഈ പ്രദേശം. കെട്ടിടം തകർന്നുവീഴുന്നതിന് നിമിഷങ്ങൾ മുമ്പ് കല്ലുകളും ഇഷ്ടികകളും റോഡിലേക്ക് വീഴുന്നത് കണ്ട് ഒരു വിദ്യാർഥി ദൃശ്യങ്ങൾ പകർത്താൻ തുടങ്ങിയിരുന്നു. പിന്നാലെ നിമിഷങ്ങൾക്കകം കെട്ടിടം പൂർണമായി തകർന്നുവീഴുകയും വലിയ പൊടിപടലം ഉയരുകയും ചെയ്തു. പതിനാലുപേരെയാണ് അവശിഷ്ടങ്ങൾക്കിടയിൽ നിന്ന് രക്ഷാപ്രവർത്തകർ പുറത്തെടുത്തത്. എട്ടുപേർക്ക് പരിക്കേറ്റപ്പോൾ ആറുപേർ മരിച്ചു. പരിക്കേറ്റവരെ എയിംസ് ട്രോമ കേന്ദ്രത്തിലേക്ക് മാറ്റി. ദേശീയ ദുരന്തനിവാരണ സേന, അഗ്നിരക്ഷാസേന, പൊലീസ്, സിവിൽ ഡിഫൻസ്, ആംബുലൻസ് സംഘം എന്നിവ ചേർന്നാണ് രാത്രി മുഴുവൻ രക്ഷാപ്രവർത്തനം നടത്തിയത്.

അന്വേഷണവും സസ്പെൻഷൻ നടപടിയും

കെട്ടിടത്തിന്റെ ഘടനാപരമായ ബലക്ഷയം, നിർമാണ പ്രവർത്തനങ്ങൾ, ചട്ടലംഘനം എന്നിവയിൽ ഏതെങ്കിലും അപകടത്തിന് കാരണമായോയെന്നാണ് ഇപ്പോൾ അന്വേഷിക്കുന്നത്. സംഭവത്തിൽ മനപൂർവമല്ലാത്ത നരഹത്യ അടക്കമുള്ള വകുപ്പുകൾ ചുമത്തി കേസ് രജിസ്റ്റർ ചെയ്തു. ദക്ഷിണ മേഖല മുനിസിപ്പൽ കോർപ്പറേഷനിലെ അസിസ്റ്റന്റ് എൻജിനീയർ സുധേഷ് സിങ് ചൗഹാൻ, ജൂനിയർ എൻജിനീയർ അമൻ ജെയിൻ എന്നിവരെ മേൽനോട്ടത്തിലെ വീഴ്ച ആരോപിച്ച് സസ്പെൻഷനിൽ ആക്കി. മുഖ്യമന്ത്രി രേഖ ഗുപ്ത സംഭവസ്ഥലം സന്ദർശിക്കുകയും മജിസ്റ്റീരിയൽ അന്വേഷണം പ്രഖ്യാപിക്കുകയും ചെയ്തു.