കൊച്ചി: യുകെ പൗരനായ മലയാളി യുവാവിന്റെ മൃതദേഹം നാട്ടിലെത്തിക്കണമെന്ന ബന്ധുവിന്റെ ആവശ്യം തളളി ഹൈക്കോടതി . കോട്ടയം മുട്ടുചിറ സ്വദേശിയായ ജോബി തോമസിന്റെ മൃതദേഹം നാട്ടിലെത്തിക്കണമെന്ന ആവശ്യമാണ് ജസ്റ്റീസ് ബെച്ചു കുര്യന് തോമസ് തള്ളിയത്. വിദേശപൗരത്വം സ്വീകരിച്ച ഒരാളുടെ മൃതദേഹം ഇന്ത്യയിലേക്കു കൊണ്ടുവരുന്നത് പൗരത്വനിയമങ്ങളും നിലവിലുള്ള ചട്ടങ്ങളും കണക്കിലെടുത്തു വേണമെന്ന് കോടതി വ്യക്തമാക്കി.
ഇന്ത്യയുമായുള്ള ബന്ധം നിലനിര്ത്താന് സഹായിക്കുന്ന ഓവര്സീസ് സിറ്റിസണ് ഓഫ് ഇന്ത്യ കാര്ഡിനായി അപേക്ഷിച്ചിരുന്നില്ല.
2016ല് ബ്രിട്ടീഷ് പൗരത്വം സ്വീകരിച്ച ജോബി തോമസ് കഴിഞ്ഞ ഫെബ്രുവരി ആറിനാണ് അന്തരിച്ചത്. പൗരത്വം മാറിയശേഷം അദ്ദേഹം തന്റെ ഇന്ത്യന് പാസ്പോര്ട്ട് സറണ്ടര് ചെയ്തിരുന്നു. എന്നാല് ഇന്ത്യയുമായുള്ള ബന്ധം നിലനിര്ത്താന് സഹായിക്കുന്ന ഓവര്സീസ് സിറ്റിസണ് ഓഫ് ഇന്ത്യ കാര്ഡിനായി അപേക്ഷിച്ചിരുന്നില്ല. മൃതദേഹം നാട്ടിലെത്തിക്കാന് നോ ഒബ്ജക്ഷന് സര്ട്ടിഫിക്കറ്റ് നല്കണമെന്നാവശ്യപ്പെട്ടു ജോബിയുടെ ബന്ധുവാണ് കോടതിയെ സമീപിച്ചത്.
ജോബിയുടെ അമ്മയും മകളും ഇന്ത്യയിലാണെന്നും അതിനാല് സംസ്കാരം ഇവിടെ നടത്തണമെന്നുമായിരുന്നു ഹര്ജിയിലെ ആവശ്യം. കൂടാതെ, ജോബിക്ക് കേരളത്തില് സ്ഥിരതാമസമാക്കാന് ആഗ്രഹമുണ്ടായിരുന്നുവെന്നു വ്യക്തമാക്കുന്ന രണ്ടാം ഭാര്യയുടെ ഇ-മെയില് സന്ദേശവും ഹാജരാക്കിയിരുന്നു.
ജോബിക്ക് ഒസിഐ കാര്ഡിന് അര്ഹതയുണ്ടായിരുന്നുവെങ്കിലും ഒരിക്കല്പ്പോലും അദ്ദേഹം അതിനായി അപേക്ഷിച്ചിരുന്നില്ല
എന്നാല് വിദേശപൗരന്മാരുടെ മൃതദേഹം ഇന്ത്യയിലേക്കു കൊണ്ടുവരണമെങ്കില് മരണസമയത്ത് സാധുവായ ഒസിഐ കാര്ഡോ അല്ലെങ്കില് പേഴ്സണ് ഓഫ് ഇന്ത്യന് ഒറിജിന് കാര്ഡോ നിര്ബന്ധമാണെന്ന് കേന്ദ്ര വിദേശകാര്യ മന്ത്രാലയം കോടതിയെ അറിയിച്ചു. ജോബിക്ക് ഒസിഐ കാര്ഡിന് അര്ഹതയുണ്ടായിരുന്നുവെങ്കിലും പത്തു വര്ഷത്തിനിടെ ഒരിക്കല്പ്പോലും അദ്ദേഹം അതിനായി അപേക്ഷിച്ചിരുന്നില്ലെന്നതു മന്ത്രാലയം ചൂണ്ടിക്കാട്ടി. തുടര്ന്നാണു കോടതി ഹര്ജി തള്ളിയത്.
.
.
