തിരുവനന്തപുരം|സെക്രട്ടറിയേറ്റിന് മുന്നില്‍ ആശാ വര്‍ക്കര്‍മാര്‍ നടത്തുന്ന രാപ്പകല്‍ സമരം 48ാം ദിവസത്തിലേക്ക് കടന്നു. ആശാ പ്രവര്‍ത്തകര്‍ അവരുടെ ആവശ്യങ്ങള്‍ക്കായി ഏറെക്കാലമായി സമരത്തിലുണ്ട്, എന്നാല്‍ ഇതുവരെ അവയ്ക്ക് തൃപ്തികരമായ പരിഹാരം ലഭിച്ചിട്ടില്ല.
സമരം അമ്പത് ദിവസം തികയുന്ന മാർച്ച് 31 തിങ്കളാഴ്ച സംസ്ഥാന വ്യാപകമായി മുടിമുറിച്ച് പ്രതിഷേധം കടുപ്പിക്കാനാണ് സമരക്കാരുടെ തീരുമാനം.
സമരത്തിലുള്ള ആശാ പ്രവര്‍ത്തകരും അനുഭാവം പ്രകടിപ്പിച്ചെത്തുന്നവരും മുടി മുറിച്ച് പ്രതിഷേധിക്കും.
നേരത്തെ, സെക്രട്ടറിയേറ്റ് സമര പന്തലില്‍ മാത്രമായിരുന്നു മുടിമുറിക്കല്‍ സമരമെന്നാണ് പ്രഖ്യാപിച്ചത്. എന്നാല്‍, സമരത്തിന് ഐക്യദാര്‍ഢ്യം പ്രഖ്യാപിച്ച് പ്രാദേശിക തലത്തിലും ആശാ പ്രവര്‍ത്തകര്‍ മുടി മുറിച്ച് പ്രതിഷേധിക്കും. സമരത്തിലുള്ള ആശാ പ്രവര്‍ത്തകരും അനുഭാവം പ്രകടിപ്പിച്ചെത്തുന്നവരും ഈ പ്രതിഷേധത്തില്‍ പങ്കെടുക്കും.
നിരഹാര സമരം ഒമ്പതാം ദിവസത്തിലേക്ക്
അതേസമയം, ആശാ വര്‍ക്കര്‍മാരുടെ നിരഹാര സമരം ഒമ്പതാം ദിവസത്തിലേക്കും കടന്നിരിക്കുകയാണ്. സമരത്തിനിടെ, ഉപരോധ സമരത്തില്‍ പങ്കെടുത്ത ആശാ വര്‍ക്കര്‍മാരുടെ ഒരു മാസത്തെ ഓണറേറിയം തടഞ്ഞതിലും കടുത്ത പ്രതിഷേധം ഉയരുന്നുണ്ട്.
തദ്ദേശ സ്ഥാപനങ്ങള്‍ ആശാ വര്‍ക്കര്‍മാരെ കബളിപ്പിക്കുന്നുവെന്ന് തദ്ദേശസ്വയംഭരണ മന്ത്രി.
സമരത്തിനിടെ 23 തദ്ദേശ സ്ഥാപനങ്ങള്‍ ആശാ വര്‍ക്കര്‍മാര്‍ക്ക് അധികസഹായം പ്രഖ്യാപിച്ചിട്ടുണ്ട്. ആയിരം രൂപ മുതല്‍ ഏഴായിരം രൂപ വരെ അധികം നല്‍കുമെന്നാണ് ഇവര്‍ അറിയിച്ചിരിക്കുന്നത്. എന്നാല്‍, തദ്ദേശ സ്ഥാപനങ്ങള്‍ ആശാ വര്‍ക്കര്‍മാരെ കബളിപ്പിക്കുന്നുവെന്നാണ് തദ്ദേശസ്വയംഭരണ മന്ത്രിയുടെ പ്രതികരണം
